Zaburu 101

Tolauna Onina Raja

101:1-8

1Zaburuna Daud.

Iaku bhekulaguaka lagu to kaasina molagina tee kaʼadili,

to Ingkoo, e KAWASANA OPU, iaku bhekulaguaka lagu kapujia.

2Iaku bhekupengkaadhariaka carana mamudhaakana kudhadhi inda tee kasalahaku.

Naepia bhekupotibhaaka dhala sumai?

Iaku bhekudhadhi tee kakatena totona incaku i nuncana bhanuaku.

3Iaku inda bhekudhikaia i aroaku

giu inda mokoampadhea.

Iaku kubancia o pewau motagalina Aulataʼala;

giu incia sumai amaridho tee iaku.

4Iaku bhekupekaridho karoku tee fikiri inda mototo,

tee kumendeu kumatau tee saangu giu uka momadhaki.

5Incemapo uka mofitanaana sarimbanuana i talikuna

bhekupabinasea.

Iaku inda bhekusabara

to mia mosombo tee momalangana incana.

6Iaku kumaasiaka manga mia motaʼatina tee Aulataʼala,

mamudhaakana manga incia amembali amboore tee iaku.

Mia modhadhina i dhala inda mosala,

inciamo bhemolaianiaku.

7Pande gau-gau

inda bheamboore i bhanuaku;

mia mobhoasakana kagau-gau

inda bheasadhaadhaa i aroaku.

8Saesaeo bhekupabinasea

bhari-bharia mia madhaki i lipu sii,

mamudhaakana kupomofu bhari-bharia mia mopewauna kadhaki

minaaka i kotana KAWASANA OPU.