Tulatulana Manga Rasulu 2

Eona Raraeana Pentakosta

2:1-13

11

Wakutuuna akawa raraeana Pentakosta,2 bhari-bharia mia moparacaeana tee Isa aporomusaka i saangu bhanua. 2Saanampuu atorangomo minaaka i laiana o nduu momakaa mboomo soona ngalu. Nduuna atorango i saangua bhanua i tampana manga incia aporomusaka. 3Kasiimpo manga incia akamatamo mboomo manga rorena waa apekapolapolaka tee asampa i bhaana manga incia samia-samia. 4Manga incia bhari-bharia akuasaia Rohina Aulataʼala, kasiimpo manga incia apepuu apogau i nuncana manga pogauna lipu mosagaanana, mboomo opea mopadhana idhawuakana Rohina Aulataʼala i manga incia to apogauakea.

5Wakutuuna incia sumai dhaangia manga miana Yahudi mosaalihi minaaka i bhari-bharia lipu i saangua dunia momboorena i Yerusalem.3 6Wakutuuna arango nduu incia sumai, abhari mpuu o mia moumbana moporomusaka. Manga incia atokidha arango manga mia moparacaeana tee Isa sumai apogau i nuncana pogauna manga incia samia-samia. 7Manga incia amente mpuu tee atokidha sabutuna apogau, "Bhari-bharia manga mia incia sumai o miana Galilea! 8Tuaapa amembali manga incia apake pogauna liputa samia-samia? 9Garaaka ingkita o mia mominaakana i Partia, Media, Elam, Mesopotamia, Yudea, Kapadokia, Pontus, Asia, 10Frigia, Pamfilia, Mesir tee manga lipu i Libya moposarina tee Kirene. Tee uka dhaangia i tanga-tangata sii manga mia moumbana minaaka i Roma, 11malape miana Yahudi atawa o mia mominaakana i lipu mosagaanana moosena agama Yahudi, miana Kreta tee miana Arabu. Moomini mboo sumai, bhari-bharikita tarangoa manga incia apogau apake pogauta to manga parakara maoge mopadhana ipewauna Aulataʼala!" 12Manga incia amente mpuu tee atokidha sabutuna manga incia apogau podho-podho manga incia, "Opea o maʼanana bhari-bharia sii?" 13Maka dhaangia manga mia mosagaanana mopotawaikina manga incia, tee apogau, "Manga mia incia sii amalango. Manga incia abhari laulauna asumpu angguru mameko."

Hotubaana Petrus

2:14-40

14Sabutuna akakaromo Petrus tee sapulu samia rasulu mosagaanana, kasiimpo apogau tee suara momakaa, "E manga miana Yahudi, tee bhari-bharikomiu momboorena i Yerusalem! Mataua tee uperangoia pekalape opea ipogauakaku sii. 15Manga mia incia sii inda amalango mboomo ifikirimiu, roonamo sii-sii siimpo arambi sio mata saeona. 16Maka satotuuna o Aulataʼala padhamo apakawaakea o hali incia sii alaloi Nabii Yoʼel4 i piamo itu. Yoʼel apogau,

17'Siimo bhemomembalina i eo-eo kapadhaa,

mboo sumaimo firimanina Aulataʼala,

"Iaku bhekudhawuaka Rohiku i bhari-bharia maanusia.

Kasiimpo manga anamu umane tee bhawine bheapakawaaka kasameana Aulataʼala to manga mia bhari.

Manga mia mangura bheapekilala manga giu bheipakamataakaku i manga incia,

tee manga mancuana i tanga-tangamiu bheapotibhaaka pongipi minaaka i Iaku.

18Tee uka, i manga bhatuaku, umane atawa o bhawine,

bhekudhawuakea Rohiku i eo-eo incia sumai,

tee manga incia bheapakawaaka kasameana Aulataʼala.

19Iaku bhekupadhaangia manga giu inda momentela i bhawona laiana,

tee manga tanda i alamu i tambe.

Bheadhaangia tee raa, o waa, tee ombu momakapa,

20matanaeo bheabhalii amembali agalapu,

tee bula bheamembali amaleʼi mboomo raa.

Mboomo sumai bhemomembalina wakutuuna

indapo akawa Eona Kawasana Opu momaoge tee momulia sumai.

21I eo incia sumai, incema-incema mogoraakana sarona Kawasana Opu bheatopasalaamati." ' "

22"E manga miana Israel, perangoia o pogau incia sii! Isa miana Nazaret sumai akobukutiimo ande Incia alambokoa Aulataʼala tee manga muuzizatina, tee manga giu inda momentela, tee manga tanda ipewauna Aulataʼala alaloi Incia i tanga-tangamiu. Ingkomiu samia umataua o hali incia sumai. 235Aulataʼala aose haejatina karona mopadhana ipatotapuakana minaaka i piamo itu, abhotukiakea to apasarakaaka Isa to ingkomiu, tee ingkomiu ubhawea to upekamatea tee upasaraakaakea i nuncana limana manga mia modorohaka to aloeakea i kau salib. 246Maka o Aulataʼala apadhadhia pendua minaaka i mate, roonamo inda mungki Incia asadhaadhaa i tampana mia mate. 257Sababuna o Daud padhamo apogau,

'Iaku kukamata Kawasana Opu sadia i aroaku,

Incia adhaangia i weta kaanaku.

Inda dhaangia momembalina mojoli-joliaku.

26Rampaakanamo sumai o incaku akaunde-unde,

ngangaku asambo-sambo akaunde-unde,

tee uka o badaku mofanaana sii bheaponiunto

i nuncana kaharapuna janjina Aulataʼala.

27Sababuna Ingkoo, e Aulataʼala, inda bheutaroaka badaku

amboore i nuncana koburu,

Ingkoo inda bheutaroaka Bhatuamu Momangkilo sii

anamisi kapabinasa.

28Ingkoo ususuakaaku dhala idhadhiaka;

alaloi umbaamu bheupaunde-unde ngangarandaku tee kasanaa.' "

29"Manga witinaiku, undaakaaku kupogau jujuruaka Daud opu-opuata. Incia amatemo tee apadhamo atokoburu. Sakawana eo incia sii uka o koburuna sumai dhaangiapo i tanga-tangata. 308Incia samia nabii tee incia amataua ande o Aulataʼala padhamo ajanjia tee apotunda ande o Aulataʼala bheaangka samia minaaka i siwuluna to amembali raja i bhawona kauncuramakana pamarintana Daud. 31Daud padhamo akamatea opea bheipewauna Aulataʼala naile itu. Rampaakanamo sumai, incia apogauaka to dhadhina Isa Al Masi pendua minaaka i mate wakutuu incia apogau,

'Incia inda atotaroaka amboore i duniana mia mate,

badana inda atoundaaka anamisi kapabinasa.'

32Isa siimo ipadhadhina pendua Aulataʼala minaaka i mate, tee bhari-bharikami satotuuna o sakusiina. 33Aulataʼala padhamo aangkea i sorogaa tee Incia auncura i weta kaanana i tampa motohoromati mpuu, kasiimpo Isa atarima Rohina Aulataʼala mopadhana ijanjiakana Ama, sabutuna Incia alaliakea Rohi incia sumai to ingkami, mboo opea irangomiu tee opea ikamatamiu sii-sii. 349Daud samia inda apene i sorogaa, maka incia apogau,

'Kawasana Opu afirimani i Opuku Momalanga,

"Uncuramo iwe sii i weta kaanaku

35sakawana kupewau manga musumu amembali polandakana aemu." '

36Rampaakanamo sumai, bhari-bharia miana Israel tabeana amataua mpuu-mpuu ande o Isa iloemiu i kau salib sumai, padhamo aangkea Aulataʼala amembali Oputa Momalanga tee uka amembali Al Masi!"

37Wakutuuna manga mia arango hali incia sumai, manga incia amaasimo mpuu. Kasiimpo aabha i Petrus tee i manga rasulu mosagaanana, "Manga witinai, opea tabeana bheipewaumami?" 38Petrus alawani, "Ingkomiu samia-samia tabeana utoba tee utopapebhaho i nuncana sarona Isa Al Masi mamudhaakana o dosamiu aʼamponia Aulataʼala, sumaimo o Aulataʼala bheabarakatiakakomiu Rohina. 39Roonamo janjina Aulataʼala sumai apatujuakea to ingkomiu tee manga anamiu tee bhari-bharia manga mia i tampa momaridho, siitumo bhari-bharia mia ikembana Kawasana Opu, Aulataʼalata to aumbatia."

40Mboomo sumai o Petrus tee mpuu-mpuuna incana aadhariakea to manga incia tee abhari apaumbaakea uka pogau mosagaanana. Incia apogau, "Usahaakea mamudhaakana ingkomiu usalaamati minaaka i kahukumuna Aulataʼala bheipakangkanaiakana to lipu momadhakina pewauna sii."

Jamaʼa Mobhaa-bhaana

2:41-47

41Manga mia moparacaeana tee opea ipogauakana Petrus sumai abhawa karona to atopapebhaho. I eo incia sumai uumati moparacaea ajulu o kabharina kera-kera talu rewu mia. 4210Manga incia bhari-bharia apengkaadhari mpuu tee manga rasulu sumai tee sadia aposaangu i nuncana rombongana manga mia mosaalihi. Manga incia sadia aporomusaka to akande tee aemani doʼa apobawa-bhawa.

43Abhari mpuu o muuzizati tee tanda inda momentela ipewauna manga rasulu sumai sabutuna bhari-bharia mia amente tee amaeka. 4411Bhari-bharia moparacaeana tee Isa sadhaadhaa aposaangu amembali saangu rombonga, tee bhari-bharia harataana manga incia apakea amembali harataa kabharia. 45Manga incia aaso harataana tee abage-bagea o hasilina i bhari-bharia mia mboomo opea ifaraluuna samia-samia. 46Saesaeo manga incia aporomusaka tee asaangu fikiri i Baitulla. Manga incia akande apobhawa-bhawa i bhanuana manga incia tee akaunde-unde tee kakatena inca, 47tee apuji-puji Aulataʼala. Manga incia amaasiakea bhari-bharia mia;12 saesaeo manga incia ajulu o kabharina, roonamo ahandamo abhari o mia mopotibhaakana kasalaamati minaaka i Kawasana Opu.