लूक 8

येशुनदी सेवा शेशेतोर आंडेर

1आंन्टेका वार लगाना इळा आय्या कि, येशु उपदेश शेस्ताड व परमेश्वर राज्याद सुवार्ता शपतुन्ड्या नगरीनगरला उरू-ऊर तिरगत उंड्या, आप्पुड वाड बारा शिष्युल वानसंगा उंड्या. 2दुष्ट आत्माल व नपूल द्यग्गार नुट मुक्त शेशीनिव इळा यंता तरी आन्डेर वानसंगा उंड्या, आंटे मग्दालिया उरुद मरीये नुट योड द्ययाल यळइड्या, आधी, 3राजा हेरोदाद कारभाऱ्याड खुजा वानीद वडती योहान्ना आळेच सुसान्ना व इप्पुड संगेम आंडेर, इदी मनाद द्रव्य गोन वानदी सेवा शेयदुर.

पेरणी शेशेतोंदी उदाहरण

मत्तय 13:1-9; मार्क 4:1-9

4इंका व्हदाद समुदाय वगातडा कुडइनडीर ऊरऊर मंदी वानद्यग्गारा वस्तू उंडीर वाड दाखला इच्चीर आन्या, 5“पेराशीतोड मनाद बिजनाम इसदेन इळीइन्ड्या; इंका वार पेराशेद आप्पुड यम बिजनाम दावामिन्दा व्हड्या इंका वाड तोक्या व आकाशातील गुआल आदी तिने कुकीर. 6इंका यम खडकाळ राई मिंदा मंदा व्हड्या इंका आय्यी हुटीनिव यन्डी हो, आंटे दाटल्या व्हच्चीद लेकुंड्या. 7इंका येम मूडलामिन्दा माकुलझुडपूल बराबर वाढाशी वारीव वाढ खुंटाशा. 8इंका यम मन्ची भुमीमिंदा व्हड्या इंका वाड फुटीगेस वानिक नूरपट फनटा वच्ची.” इळा आनी वाड बैग्या कीरली आन्या, “वानिक इनदेन्क गुम्माल उन्डाय वाड आय्कायांडा.”

9आप्पुड वान शिष्याड आप्पुड वाड आडग्गा, दाखल्याद अर्थ येम उन्डाद? 10आंटे येशु आन्या, “परमेश्वर राज्यालोन गुजाल जाणाशी देणगी मिक इच्चीम, टीम आंन्टेगा मंदीमंदीला आदी दाखलाशी शप्पीमटीम, दिनइच्चाका वानिक कुमस्तूउंड्या सुडाराद व वाड इनटू उंड्या तलवारद.1 11तर आदी दाखला इदी उन्डाद बोजनाम इदी परमेश्वर द वचनाम उन्डाद. 12इंन्का इप्पुड दावामिंदुडद वाड इनातुर उनडार, इंन्का आंन्टेका सैतानानूड वस्ताड इंन्का वाड इस्वास व्हटी तारण सुडाराद आनकेन वान अंत:करणातुन वचन तिशीर तीस्कूणार. 13इंन्का जो खडकामिंदाइर उंडार की, वार इन्टार आप्पुड वचनाल आंनदाने तिस्कूनटार, इंन्का वारीक मुळानुट लेकुंड्याद; आप्पुड आदीयम यळादणका इश्वास व्हटटतार व परिक्षेला यळाला गळाशी फडताय. 14इंका काटेरीला माक ला फडीनीव बीजनाम इन्यातोर उंटीम, पण मुन्दारा फोता-फोता चिंता इंगा धन इंगा इ जीवनालोद सुखुम वार गुदमारशी फोतार इंगा भरदार फळुल इयाव. 15पण बागा भुमीमिंदा फडीणी बीजाल आवी ईवी ऊंडाय, की वार वचन ईनी बागा मंची अंतकरणला घट्ट शेशी व्हेटताद आन धीरामगोन धान्याम ईचकेन होतात.

दिवामिन्दिकेल धडा

मार्क 4:21-25

16आन येवार दिवा आंचीनेंका भांडालकिंदा मुशी व्हेटेले किंवा पलंग किंदा व्हेटेले तर नवनीक वंचेतोरक यलगु कंपीया बेक आनकेन आदी फईक फेटताम. 17कारण प्रकट आय्येद लेद ईळा येम मुशीनद लेद किंवा तेलचेद लेद आन कंप्पीयाक व्हय्येदकाद इळा येम गुप्त लेद. 18आनकेन मीर येळा ईनटार दानविषयी जपस्केन उंडना, कारण यवार दैगारा ऊंडाद वारीक ईच्चार आन यवार दैगारा लेद ईला की रवा उन्डाद वानिक वाटासताद वारद येम ऊंडाद आदी पण वानतिकेड तुस्कुण्यार.”

प्रभू येशुन देगाटोर

मत्तय 12:46-50; मार्क 3:31-35

19आप्पुड येशु द आम्मा इंगा तंमुड वानदैगारा वंचिर आन गर्दी गोन वारीक वानदैगारा व्हयदेक दावाले. 20आप्पुड येवार वानिक शप्पीर, नी आम्मा शीना तंमुडल नीक भेटाशेंक बैट्या नीलाफडीनार. 21आन वाड वारीक उत्तर ईची आन्या, “द्यावार वचन ईनेतोर व पाळाशेतोर इर ना आम्मा इंगा शीना तंमुडल.”

येशु घालीधुंदाळ शांत शेस्ताड

22आन हा दिवसला ईळा आय्या की, वाड मना शिष्यल् बरोबर नावला कुस्नीन्या आन “मनाम सरोवर मुंदारा फोदाम” ईळा वाड वारीक आन्या आन वार नाव तोलीर. 23आन्ट्यागा वार नाव तोलेतापुड येशुड फंड्या. आन सरोवर ला घालिद वादळ ईड्या आन नाव नेळागोन निंड्या आन वार संकट ला फडीर. 24आप्पुड वार वानदैगारा वची वानिक जागा शेशी आनिर, गुरुजी, मनाम बुडाजेग आन्टीनाम. आप्पुड वाड नीदारनेळ लेशी घालीक आन खवळाशिन नेळाख ताकिद शेशा; आन आदी बंद आय्यी शांत आय्या. 25आप्पुड वाड वारिक आडग्या, “मिद विश्वास यकाडा ऊंडाद?” आन वार यरस्केन थक्क ऐईर आन वगामेगारक आनिर, वीड ऊंडाड तरी यवाड? की, घाली आन नेळ वीरीक आज्ञा ईस्काड आन वार विनदी ईनटार.

गरसेकरादी प्रदेशलोनटोर दयामफटीनेर

मत्तय 8:28; मार्क 5:1-20

26आन्ट्यागा येशु इंगा वान शिशाल गलील सरोवर मुंदारा गरसेकर प्रदेश ला पोहचाशिर. 27आन वाड भुमी मिंदा दिग्या, आप्पुड उरलोन्ट्योड यवाड वगाड मंनशी वानीक भेटाशा; वानिक सना धैय्याम, आंन्टीन्या आन वाड सना वर्षे ल बंटाल येस्कुना लेकुन्या आन वाड ईन्ट्या निलवा कुन्या वाड थडग्यालमिंदा नीलस्तुन्या. 28आप्पुड वाड येशु नक सूशी सना किरल्या आन वानमुंदारा फडी बेग्याता आन्या, हे येशु, परात्पर परमेश्वर बिडा, नाद नीद येम संबंध? निन नीक विनंती शेस्तान, नाक त्रास ईय्याक. 29येनटीक की वाड इ अशुद्ध आत्माक हा मनषीनेळ यळी फैयेद आज्ञा ईस्तुन्या; कारण वाड वानिक सना दमुल फेटीन्या; आन मंदि वानिक पहारामिंदा फेटी साखळ्यानगोन आन बेड्यालगोन कट्टूतूनीर पण वाड आवी बंधनलु तेंम्पी धैय्यामतिकेळ शेलाला हाकलाशी होतूण्या. 30आन येशुड वानीक आडग्या, “नी फेर येम?” आप्पुड वाड आन्या, सेन्य, कारण वानदांटल्या संगनेम दयामलू घुसाशिन्या. 31आन नु माक अगाधकुपला व्हयेद आज्ञा शेशेद लेद, इळा आदी दैयाम विनंती शेसतू उनड्या. 32आप्पुड आदू पुष्कळ फनदुलात कळप कोडा मिन्दा मेस्तून उड्या; इंका दान मिन्दा सोरशा वाड मनाख परवानगी इन्डा, वार विनंती शेशीर. आंटे वाड वारक परवानगी इच्चा. 33आप्पुड आदी दैयाम आ मनशी मिन्दुड येळी आदी फमदुलाला शिराशा इंगा वाड कळप कडामिन्दुडधडक व्हारकेन व्हई किन्दा सरोवराला व्हड्या व गुदमारशी मरणपावाश्या. 34मग कळप मिन्दुडी जे आय्या आदी सुशी व्हारीर व वार आन्द नगरला व शेयलाला व्हई शप्पीर. 35आप्पुड इदी आय्या आदि सुसदेन्क वार मिन्दा बयट्या येळीर इंगा येशु द्ग्गारा वच्चीर इंका आ मन्शिनोट दैयाम येळीनिव उन्डया वाड वस्त्र कपकुड्या व शुद्धीमिन्दा वच्चीड्या इळा येशुन्द काळा द्ग्गारा कूसनिन्द वारीक आढळाशा; इंगा वार येस्कुनीर. 36इंगा यवार इदी सुशीन्द उन्डया वार वानिक भूतग्रस्त येळा बागा आय्या इदी वारीक शप्या. 37आप्पुड गरसेकराथ नालुग भागानुट आंता मदी वारक विनंती शेशीर की नू मादग्गारानुट फो कारण वार व्हेदाद भायगोन व्याप्त आइ नीर. मग वाड जहाजला कुसनी यंका वच्चीर. 38इंका आदी मन्शिनोट दैयाम फइन उन्डया, वानबरबर निलवान इच्चेद इळा येशु दग्गारा विनंती शेशेन्द उनडीर परंतु वाड वान्क निरोप इच्ची आन्या. 39“नु मना इल्लक यन्काक हो व परमेश्वर नीइच्चाका यन्ता व्हेदाद व्हनी शेशा आदी शेप.” मग वाड यळी येशुड वानइच्चाका आंता व्हेदाद फनी शेशिन्द उनडीर वार वाड संबंधनगरानुट घोषीत शस्केन हो.

याईरदी कुतुर इंगा रक्तस्त्रावी आंडीद

40नंतर येशुड यन्का वचीनेन्का समुदयाने वारीख आनंदाने स्वीकारशीर, कारण वार आंदार वान्द दावा सुसतून उन्डया. 41आप्पुड सूड, याइर व्हेरद यवार मनशी वच्चा; वाड इंगा यहुदी सभास्थानाला अधिकारी उनडया; इंका वाड येशुन्द काळाममोकी, नु ना इल्लुक वच्चेद, इळा वान्क विनंती शेशीर.

42आंका वानिक सुमोर बारा यडलुद एकुलती वगा आडबीदा उनड्या व आदी सच्चीदेन्क टेकाशिन्द उन्डया. आंटे वाड होताड आप्पुड लोकसमुदाय वानदग्गारा दाटी शेशतूण्डया. 43इंका बारा यडलुद रक्तस्त्राव आईन्द उन्डीर यवार वगा आरवाती, आदी (मनाद आंता उपजिविकता वैद्या मिन्दा खर्च येशी) यवार द्ग्गार नुटबी बागा आवाद, 44आदी वाद येन्का वच्ची वान्द बडटलद काटाला स्पर्श शेशा इंका लगाना दान्द रक्तस्त्राव बंद आय्या. 45इंका येशु आन्या, “नाक यवार स्पर्श शेशीर?” आप्पुड आंदार नाकरास्केन उन्डीर पेत्र व वार वानबराबर उन्डीर वार वान्क आनीर हे गुरुजी समुदाय गर्दीशेशकेन्द मिरक चेंगरास उन्डया. 46आप्पुड येशु आन्या, “यवराणा नाकस्पर्श शेशीर कारण नातिकनोळ सामर्थ्या यळ्या इदी नाक तेलच्या.” 47इंका आदी आरवातीमिम, तप्पाका नीलावा लेद इळा सुशी, थरथर कांपास्केन वच्चा इंका वान मुदारा बोरकालका फडी नीन याद कारण इच्चाका स्पर्श सेशा व लगाना मनाम यळा बागा आतिम, इदी आदी आंता मंदी मुदारा शेप्या. 48आप्पुड येशु दानिक आन्या, “आन्बीडा, नीद ईश्वसगोन निक तारा शिन्द उनडाद. शांतीगोन हो.”

49वाड इंका माटलाडस्केन उनडाद इनताला सभास्थानाला अधिकारी आदनुट यवार वच्चा व आन्या. नी आनबिडा सच्चीनाद; गुरूजींनक यींक्का त्रास ईयांकना. 50पण येशुड आदी ईनी उत्तर ईच्चा, “यरस्कुनाक, विश्वास फक्त व्हेट, आंटे दानिक बेस आय्यी.” 51आंन्ट्यागा ईनट्ल्या वंचिन्नका पेत्र, योहान, याकोब आन आनबिडागार आब्बाड, दान आम्मा विर शिवाय नौना यवारकच दानी इय्याले. 52आन आंदार दानईच्चागा येडशीगेन शोक शेश्तुनीर, पण वाड आन्या, “येडवाकना, कारण आदी सयालेद, निद्दारला ऊंडाद.” 53आदी सच्चींनद ऊंडाद ईदी सुशी वार नगदेंग आंटीर. 54पण वाड दांदी शेइ शेतल्या तुस्केन आवाज ईच्ची आन्या, “आनबिडा, लैई.” 55आपूड दान आत्मा परत वच्चा आनी आदी लैशा; दानिक तिनदेंक ईना आनकेन आज्ञा ईच्चा. 56आन दान आब्बाड आम्माक आश्चर्य आय्या; परंतु येम आईनेद यवारक् शप्पाकना ईळा ताकीत शप्पी ईच्चा.