लूक 3

बाप्तिस्मा शेशेतोड योहान इंगा वानदी संदेश

मत्तय 3:1-6; मार्क 1:2-6; योहान 1:19-23

1इप्पुड तीबिया कैसर इन पंधरा यंडला राजकारणला, यप्पुड पंत पिलात यहुदीया प्रांतोड शासक उंड्या इंगा हेरोद अनतिपस चौथाई गालील प्रांतोड शासक उंडी इंगा वान फेद्दा तम्मुड फिलीप्प 1इड चौथाई इतुरीया इंगा त्राखोनीती इ देशला शासक इंगा लुसनिय इड चौथाई अबिलेनकी शासक उंड्या.2 2हन्नाड इंगा कयफाड इर मुख्य याजकलु उंडीर, आप्पुड मरू भुमीला द्यावारदी वचन जखऱ्यान कोडकु योहान तीकुड वच्या. 3वाड यार्देन देगार आंता परिसरला पापला क्षमा कस्रोम पश्चाताप शेशी बाप्तिस्मा तिस्कुनाला इल्ला घोषणा शेस्का तिरग्या.

4यशया संदेष्ट्यान पुस्तकला राशीनेलेका इदी आय्या:

“मरू भुमीला घोषणा शेशेतोनदी आवाज आय्या आदी इल्ला,

‘प्रभुनदी दावा तैयार शेयांडा,

वानदी दावा सरळ शेयांडा.

5प्रत्येक दरी निंडी फोई,

इंगा प्रत्येक कोंडा इंगा टेकड्या सपाट आय्यी,

वर्रांग सरळ आय्यी,

इंगा खडबड दावाल सपाट शेशी.

6इंगा आंता मनुष्य जाती परमेश्वरदी तारण सुशी.’”

7वान तीकनुस बाप्तिस्मा तीस्कुना वच्चीने मंदीन योहान आन्या; “हे, जहरी फामला फिल्लालाला, वच्चे शिट्टनुस फारदेंक मिमलान येवार सावधान शेशीर? 8पश्चात्तापकी योग्य इल्ला फळ इयांडा इंगा मी मनलाला इल्ला आनाकुंडा की, ‘अब्राहम मा आब्बानलेका उंडाड.’ येनटीक की नीन मिक शेपतान की, अब्राहम कस्रोम इ राळानुस बीळ्ळू पैदा शेशेदेंक द्यावार समर्थ उंडाड. 9इप्पुडे माक बोड्याक गोडली फेट्टी उंडाद. दिन कस्रोम प्रत्येक माक याद शिंगार फळ इयाद आदी तेंपिगास आग्गीला येयदेंक वच्ची.”

10यंकसार समुदायलोन मंदी वान आडगीर, “इप्पुड मीम येम शेशेद?” 11वाड उत्तर इच्या, “यवार देगार रोंड आंगुल उंडाय वार येवानकी लेव वानकी वगाट इय्याला इंगा येवार देगार आन्नाम उंडाद वाड पण आल्ले शेय्याला.”

12काही जकातदारलु पण बाप्तिस्मा तीस्कुनदेंक वच्चीनीर. वार आनीर, “गुरुजी, मिम येम शेय्याला?” 13वाड वारनी आन्या, मिक येम नेमाशी इच्चीनेद उंडाद दानकाना जास्त दुडलू तीस्कुनाकुंडा. 14इंगा शिपाइल पण वान आडगी आनीर, “इंगा माबद्दल येम, मीम येम शेशेद?” वाड वारनी आन्या, “येवार तीकनुस जबरदस्ती दुडलू तिस्कुनाकुंडा, यवार मिंदा खोटाद आरोप येय्या कुंडा, मीक शिक्कीने पगारलाने समाधानी उंडांडा.”

15आप्पुड मंदी आनंदता दावा सुदूर प्रत्येक मनशी मना अंत:करणला इडे ख्रिस्त उंडी येम आंका विचार शेयदुर. 16वार आंदारकी योहान उत्तर इच्या, “नीन मीद बाप्तिस्मा नेळाता शेसतान, गान वगाड येवाड नाकाना सामर्थ्यशाली उंडाड वाड वस्तुनाड इंगा नीन वान शपूलाद दाराम ईडशेदेंकबी पात्र लेन3, वाड मीद बाप्तिस्मा पवित्र आत्माता इंगा आगीता शेशी. 17वानी खडाल स्वच्छ शेशेदेंक इंगा गोदमाल वान कोठारीला जमा शेशेदेंक वानदी शाटा वान शेतल्या उंडाद, पण वाड फोटटू आराक फोई इल्लोन आग्गीला कालचेस काडी.”

18योहान इंगा शेंगेम उत्तेजन इच्चे माटलाता वारकी बोध शेशी सुवार्ता शेप्या. 19योहान चौथाई शासक हेरोद इन बेद्रीच्या येनटीक की वानदी वान फेद्दा तम्मुन वडती हेरोदीया दानसंगा अनैतिक सबंध उंड्या, इंगा आले इंगा शेंगेम वाईट माटलु वाड शेशीन्या. 20इदी आंता शेशी सूद्धा वाड इंगा वगा दुष्कर्म शेशा आदी आंटे वाड योहाननी जेलला येश्या.

येशुनदी बाप्तिस्मा

21आप्पुड इल्ला आय्या की, यप्पुड आंता मंदीद बाप्तिस्मा योहान शेयदु, आप्पुड येशुनदी पण बाप्तिस्मा आय्यी वाड प्रार्थना शेशेताप्पुड मोडाम उघडाश्या. 22इंगा पवित्र आत्मा फयरुपता कबुतरलेका वानमिंदा दिग्या इंगा मोडामलेल इल्ला आवाज आय्या की, “नू ना प्रिय कोडकु उंडाव, निन नी बद्दल शेंगेम संतुष्ट उंडान.”

येशुनदी वंशावळ

23यप्पुड येशुड वान सेवाक सुरुवात शेशा आप्पुड वाड सुमारे तीस यंडलावोड उंड्या. मंदी वान योसेफ कोडकु समजायदुर. योसेफ एलीन कोडकु उंड्या 24एली मत्ताथान, मत्ताथ लेवीन, लेवी मल्खीन, मल्खी यन्रयान, यन्रयाड योसेफ कोडकु उंड्या. 25योसेफ मत्तीथ्यान कोडकु उंड्या मत्तीथ्याड अमोस, अमोस नहुमान, नहुम हेस्लीन, हेस्ली नग्गयान, 26नग्गय महथान, महथ मत्तीथ्यान, मत्तीथ्य शिमयीन, शिमयीड योसेखान, योसेख योदान कोडकु उंड्या. 27योदा योहान कोडकु उंड्या. योहान रेशान, रेशा जरुब्बाबेल, जरुब्बाबेल शल्तीएलान, शल्तीएल नेरीन,4 28नेरी मल्खीन, मल्खी अद्दीन, अद्दी कोसोमान, कोसोम एल्मदामान, एल्मदाम एरान. 29एर येशुन, येशु अलिएजर, अलिएजर योरीमान, योरीम मत्ताथन, मत्ताथ लेवीन कोडकु उंड्या. 30लेवी शिमोन कोडकु उंड्या. शिमोन यहूदान, यहूदा योसेफान, योसेफ योनामान, योनाम एल्याकीम, 31एल्याकीम मल्लयान, मल्लया मिन्नान, मिन्ना मत्ताथान, मत्ताथ नाथानान, नाथान दाविदान,5 32दावीद इशायान, इशाय ओबेदान, ओबेद बवाजान, बवाज सल्मोनान, सल्मोन नहशोन कोडकु उंड्या.6 33नहशोन अम्मीनादाब कोडकु उंड्या, अम्मीनादाब अदामीन, अदामीन अर्णयान, अर्णय हेस्रोनान, हेस्रोन पेरेसान, पेरेस यहूदान, 34यहूदा याकोबान, याकोब इसहाकान, इसहाक अब्राहामान, अब्राहम तेरहान, तेरह नाहोरान,7 35नाहोर सरुगान, सरुग रऊन, रऊ पेलेगान, पेलेग एबरान, एबर शेलहान कोडकु उंड्या. 36शेलह केनान कोडकु उंड्या. केनान अर्पक्षदान, अर्पक्षद शेमान, शेम नोहान, नोहा लामेखान, 37लामेख मथुशलहान, मथुशलह हनोखान, हनोख यारेदान, यारेद महललेलान महललेल केनानान, 38केनान अनोशान, अनोश शेथान, शेथ आदामान, आदाम द्यावारद कोडकु उंड्या.8