गलती 6

व्यवहारकि फनिफडेळदि बोध

1तमुलू इंगा शेल्यालु, यवरना मनशी ओको गुन्हाला शिक्या, तर मीर जे आत्मिक उंडार आदी वान सौमेताद आत्माता इंगा स्थापित एक्का दांडा; नु स्वता पण परीक्षाला फडारोद आंका स्वता तीकुड लक्ष इ. 2मीर एकमेकरदी बोरू, येतना म्हणजे इल्ला ख्रीस्तद नियम पूर्ण शेश्यार. 3येनटिक्की मनाम यवार लेकुंटे यवार तरी उंडार इल्ला मानास्ताम, वार स्वतान फसामत्तुतार. 4पण आंदार स्वता फनीद परीक्षा शेयाला इंगा, वांकी दुसरोंदी संबंध लेद, पण फक्त मनाला अभिमानला जागा शिक्की. 5येनटीक की, प्रत्येकजन स्वताद बोरू येत्ताने बेक.

6यवार की वचन दी शिक्षण शिक्ताद वाळ शिक्षण इचेटोरकी आन्नी प्रकारी शिंगार पदार्थद भाग इयाला.

7फसाया कानडा, द्यावार्दी उपहास काक फोई येनटिक्की मनशी येम पण पेरास्ताळ आद्दे पिक वानकी शिक्ताद. 8येनटीक की यवार मना शरीर कोळोन्ग पेरास्ताळ वांकी शरीर तीकेल नाशदी पीक शिक्ताद, पण यवार द्यावार आत्मा कोळोन्ग पेरास्तार वानकी आत्मातीकेल सर्वकाळदी जीवनदी पिक शिक्ताद. 9इंगा मंचीद शेशेळदी मनाम कंटाळ शेयारोद; येनटिक्की मनाम निराश का रोद, तर ठहरासने वेळेला कोयाला. 10येनटिक्की मनाक संधी उंटे आले मनाम आंदारदी शिंगार शेयाला इंगा विशेषतः विश्वासता वगा इलुटोर ओकातळा वचीनेर विश्वास फेटेतोरदी शिंगर शेयाला.

संपास्काम

11सूडना, यंता फेदाद अक्षरला, नीन मिक स्वता: शेईतोंन लीवास्तुनान. 12यंता शारीरिक माटालदी शहाणपणा मीरवादेंग सुस्तार आंता वारदी ख्रीस्तद क्रूस कोळोन्ग वारदी छळ का रोद दानचांग मींलान सुंता शेयदेंग भाग केळपुतार; 13येनटीक की यवार्दी सुंता आयनाद वार स्वत: त नियमशास्त्र पाळायार पण मी शरीर दा गर्व शयला, दानचांग, मिद सुंता काला इल्ला वारदी इच्छा फेटतार. 14मना प्रभू येशु ख्रिस्त इनदी क्रूस अभिमानशिवाय याद पण अभिमान शेस्काम ना देगारकेल दुराम उंडाला पण यवार द्वारा दुन्याम नाक शिक्या इंगा नीन जगनी क्रूस मिंदा खिळाशीनान. 15येनटिक्की सुंता आईदेंग किंवा सुंता का कुंटे एमी लेद, तर कोत्ताद शुरुवात इदे येम आदी का. 16इंगा यवार इ नियमता नळस्तार इल्ला आंदार मींदा इंगा द्यावार इस्राइल मिंदा शांती इंगा मया उंडाला.

17इपूड नुस यवार नाक त्रास इया रोद, एनटिक्की नीन स्वता शरीर मिंदा येशुन निशानलू धारण शेशिना.

18'तामुल इंगा शाल्यालू, मना प्रभू येशु ख्रीस्तद कृपा मी बरोबर उंडाला. आमेन.