प्रेषित 25

फेस्तामुंदार पौलदी चौकशी

1मग फेस्त सुभ्यांत वचीनेन्का मूड नाळा बाद कैसरीयाकेल मिंदीक यरुशलेम शहरकी फोया. 2आप्पुड मुख्य याजक इंगा यहुदीलोन्केल मुख्य मन्सूल इर वान तीकुड पौल विरुद्ध फिर्याद एका फोईर. 3इंगा, कृपाशेशी वान यरुशलेम शहरला कुतेस कोणाला इल्ला वान तीकुड विनंती शेशीर; दावाला दबा फटकोन वान मतेद इर्दी बेत उंड्या. 4फेस्तद उत्तर, “पौल कैसरीयाला कैदला उंडाड; नीन स्वता लगाने आकाड फोयेतोड उंडान. 5दांचांग आ मंशीद येमाना गुन्हा उंटे मीलोन्केल प्रमुखलु नासंगा वची वान मिंदा आरोप फेटाला.”

6मग वार नडमा आठदहा दिवस नीलची कैसरीयाक किंदीक फोया इंगा दुसरानाड न्यायासनमिंदा कुशिनेन्का वाड पौलनी येकोचेद हुकुम इच्या. 7वाड वचीनेन्का यहुदील वानभोवती नीला फडी यवार्दी पुरावा वारकी इया दाल्या इल्ला संगेम इंगा भयानक आरोप वान मिंदा फेटीर. 8पौल उत्तर इच्या की, “नीन यहुदीला नियमशास्रद, परमेश्वर भवनदी किंवा कैसरीयाद येमीच गुन्हा शेया लेद.” 9आप्पुड यहुदयाल मर्जी संपादन शेशे इच्छाता फेस्त पौलनी आन्या, “यरुशलेम शहरला फोई आंदू नामुंदार इ माटला विषयला नीद न्याय कावाला इल्ला नीद इच्छा उंडाद येम?” 10आप्पुड पौल आन्या, “कैसरीया न्यायासन देगार नीन नीला फडीनान; इंदे नाद न्याय कावा बेक, नीन यहुदयाल्दी येमी गुन्हा शेयालेन, इदी मिक पण शिंगारे यरका उंडाद. 11नीन गुन्हा शेस्तीन किंवा सच्चे इचांग योग्य इल्ला येमाना शेशीनिन्टे तर नीन तयार लेन इल्ला लेद ; पण वार ना मिंदा याद आरोप फेटीनार दानलोंदी ओगाट पण खरेम ठराया कुंटे, तर नन्नु वार स्वाधीन शेशेद यवारकी पण अधिकार लेद; नीन कैसर देगार न्याय आडगुतान.” 12आप्पुड फेस्त सभाद मसलत तीस्कोनी उत्तर इच्या, “नु कैसरदेगारा न्याय आडगीनाव तर कैसर मुंदारकी फोयाव.”

अग्रीप्पा इंगा बर्णिका

13मग काही दिवसलू आय्यी नेन्का अग्रीप्पा राजा इंगा बर्णिका इर इद्दार कैसरीयाक वची फेस्तकी भेटाशीर. 14आंदू वार संगेम दिवसलू नीलचीर, आप्पुड फेस्त राजा मुंदार पौलदी प्रकरण तिशी आन्या, “फेलिक्स बंदीला फेटीनोड ओगा मणशी इंदू उंडाड. 15नीन यरुशलेम शहरकी फोइन्टीन आप्पुड यहुदीला मुख्य याजकलु इंगा आब्बागार फिर्याद शेशी वान विरुद्ध ठराव कावाला दांचांग विनंती शेशीर. 16वारकी नीन उत्तर इस्तीन की, आरोपी इंगा दोष आन्चेतोर इर मुंदारमुंदार वची आरोपी विषयला स्वताद उत्तर इचेद आरोपीक संधी शिक्काकाना मुंची यवारकी पण शिक्षाइचांग सोपाशी इचेद रोमी मंदिद रित लेद.” 17दांचांग वार इंदूक वचीनेन्का एमी दावा सुडांदे, दुसरा नाळ न्यायासन मिंदा कुसनी आ मंशीन येकोचेद हुकुम शेशीर. 18वान मिंदा आरोप शेशेतोर यपुड वान विरुद्ध माटलाडदेंक नीला फडीर, आप्पुड ना अपेक्षा लेका येमटी पण गुन्हाल बद्दल वार वान मिंदा आरोप शेया लेर. 19उलटा मना धर्मविषयला इंगा यादो ओगा मणशीविषयला यवांदी फेर येशु उंडाद, वान मिंदकेल यहुदी मंदी आ मणशी संगा जगडाम आडीर, येशुड इड जरी सचीनोड उंड्या, तरी पौलदी इल्ला आनकाम उंडाद की, येशुड जिवंत उंडाड. 20इ प्रश्नद चौकशी येला शेयाला इदी नाक समजाकुंदू, आप्पुड इ यहुदी मनुष्य विरुद्ध यहुदी मंदी याय आरोपलु उंडाय, दान बद्दल वान यरुशलेम शहरकी एका फोई वांदी न्याय शेयाला इल्ला वांदी इच्छा उंडाद येम, इल्ला नीन वान आडगुतीन. 21सम्राटतीकेल मनाद न्यायनिवाडा आय्यी नंताक नीन कैदला उंटान इल्ला यपुड पौल आन्या, आप्पुड नीन आज्ञा शेस्तीन की, कैसरतीकुड आम्पेदेंक शक्य आयी नंताक वान जेलला फेटाला. 22दिनमिंदा अग्रीप्पा फेस्तन आन्या, “नाक स्वताक इ मंशीद आनकाम इना बुदी आताद,” फेस्त वांकी उत्तर इच्या, “रेपकाडा,” वांदी आनकाम “मीर इनी शकाश्यार.”

23दांचांग दुसरानाळ अग्रीप्पा इंगा बर्णिका फेदा थाटमाटता वचीर इंगा लष्करी सरदार इंगा शहरलोन्टोर मुख्य नागरिकला संगा दरबारला प्रवेश शेशीर, आप्पुड फेस्त आज्ञालेका पौलनी आंदूक ऐकोन वचीर. 24मग फेस्त आन्या, “राजा अग्रीप्पा महाराज इंगा मा संगा इंदू उपस्थित उंडीनोर आंदार मंदी, इ मंशीन सूडना! वान विषयला यरुशलेम इंगा कैसरीया इंदूटोर आंदार यहुदी मंदी नातीकुड अर्ज इच्चीनार, इन जिवंत उंडानिया राद, इल्ला विनंती वार शेस्तार. 25पण इनकी सचेद शिक्षा इयाला इल्ला इड एमी शेया लेद, इल्ला नाक आढळाशी वच्या इंगा वाड स्वताने नाक सम्राट तीकेल न्याय शिकाला इल्ला मागणी शेश्या, दांचांग नीन वान कैसरमुंदार न्याय इचांग आम्पेद ठरा मतीनान. 26पण सम्राटकी इन विषयला नक्की इल्ला यरका शेय्याला, इल्ला ना तीकुड एमी लेद, दांचांग नीन इन मी मुंदार इंगा विशेषतः राजा अग्रीप्पानमुंदार ऐकोनवची नीला फडा मतीनान, आदी दिनकस्रोम की, इ चौकशी नंतर नाक इ मणशीविषयला येमतरी लिवादेंक दाला. 27आखरीक ओगाट आर्दाम कैदीक यादू आरोप फेटान्दे कैसर तीकुड आंपडीचकाम नाक बरोबर वाटायाद.”