प्रेषित 19

इफिस नगर इंदू पौल

1आप्पुड इल्ला आय्या की, अपुल्लो करिंथ इंदू उंडतांना पौल वेगवेगळा भागलोन्केल प्रवास शेस्तांना इफिस इंदू वच्या, आंदू वांकी काही शिष्यल आढळाशीर. 2पौल वारणी आळग्या, “यपुड मीर विश्वास फेटतीर, आप्पुड मीक पवित्र आत्मा शिकीनाद येम?” वार अनुयायी आनीर, “पवित्र आत्मा उंडाद इदी पण मिम ऐकालेम.” 3वाड आन्या, “इंगा याद बाप्तिस्मा मीर तीस्कोनटीर?” वार आनीर, “योहानदी बाप्तिस्मा.” 4पौल आन्या, “योहानदी बाप्तिस्मा पश्चात्तापदी उंड्या, वाड मंदीक शप्या की, दान नंतर यवाड वस्तूनाळ, वान मिंदा मंदी विश्वास फेटाला, वाड वचेटोळ म्हणजे येशुड उंडाळ.” 5यपुड वार इदी ऐकाशीर, आप्पुड वार प्रभू येशुन फेरता बाप्तिस्मा तीस्कोन्या. 6इंगा यपुड पौल वांदी शेई वान मिंदा वच्या इंगा वेगवेगळा भाषा माटलाळदेंक आंटीर इंगा भविष्य शपतुनार. 7इ गटला आंदार मिळाशी बारा मनसलू उंडीर.

इफिस इंदू पौल

8पौल यहुदी सभास्थानला फोदूर इंगा मूड महिनालधेर्यता माटलाळदू, द्यावार राज्य विषयला चर्चा शेस्का इंगा यहुदी मंदी मनलु तीपुदु. 9पण वार लोन्केल काही कठीण मनता आय्यीर इंगा वार विश्वास फेटीदेंक नकार इच्चीर इंगा ख्रिस्त दावाविषयला खराब माटलाळीर, मग पौल वार लोन्केल येली फोया इंगा शिष्यलान पण वार लोन्केल वेगडा शेश्या इंगा तुरंना शाळाला दिनाम वार संगा चर्चा शेशीर. 10इदी इल्ला दोन वर्ष नळश्या, दिंदी परिणाम इल्ला आय्या की, आशियाला प्रान्त निलचेटोर आंदार यहुदीळ इंगा ग्रीक मंदी पर्यंत प्रभू येशुनदी वचन पोहोचाश्या.

एफिसिस ला सामर्थ पनील

11द्यावार पौल शेईता असामान्य चमत्कार घडमत्या. 12पौल शरीर मिंदा द्स्ती इंगा बटाल पण येकोची काही, मंदी इ माटलू बिमार मंदी मिंदा फेटूदू, यपुड वार इल्ला शेयदूर आप्पुड बिमार मंदी शिंगार आतार इंगा दृष्ट आत्मा वारणी इडशी फोदू. 13काही यहुदील सुद्धा आंता तीकुड प्रवास शेस्का उंडदूर इंगा मंदीलोन्केल दृष्ट आत्मा तिदूर, वार दृष्ट आत्माता आंटीने मणशीलोन्केल प्रभू येशुन फेरता वार आत्माल तीदूर. 14वार आंदुर, “पौल या येशुन फेरता घोषणा शेस्ताड आ फेरता नीन निक आज्ञा शेस्तान,” स्कीवा फेरोन यहुदी मुख्य याजक सात कोडकूल इल्ला शेयदूर. 15पण वगा तुक ओगाट दृष्ट आत्मा वारणी आन्या, “नीन येशुन ओळखास्तान, पौल नाक यरका उंडाड, पण मीर यवार उंडार?” 16मग यावान दुष्ट आत्मा आंटीन्या आ मणशी वार मिंदा उडी मत्या, वाड वार मिंदा ताबा तीस्कोन्या इंगा वारणी हारा मत्या, आप्पुड वार इद्दार भोन्गळा इंगा जखमी आय्यी इंटलोन्केल फारीर. 17इफिस इंदू नीलचेटोर आंदार यहुदी इंगा ग्रीक मंदीक इदी समजाश्या, आप्पुड आंदारकी येर्पू आय्या इंगा मंदी प्रभू येशुन फेरुद जास्तने आदर शेशेदेंक आंटीर. 18संगेम विश्वास फेटेटोर पाप कबुली इद्देंक आंटीर इंगा याय खराब माटलु वार शेशीनीर आय्यी शपतुनीर. 19काही विश्वास फेटेतोर जादुय फनील शेशिनीर, इ विश्वास फेटेतोर स्वताय जादूय पुस्तकलु मंदी मुंदार येकोचीर इंगा कालचीर, आ पुस्तकलाद किंमत पन्नास हजार येंडी शिकाल इंता निन्ड्या. 20इ रीतीता प्रभून वचनदी दुराम नंताक प्रसार आय्या इंगा आदी संगेम परिणाम कारक ठराश्या.

पौलदी मुंदारदी बेत

21इ माटलु घडाशी नेन्का पौलकी आत्मा सुचा मत्या की, मासेदोनीया इंगा अखया इ प्रांतलोन्केल प्रवास शेस्का मुंदार यरुशलेम शहरकी फोवा बेक, वाड आन्या, “नीन आंदू फोई नेन्का नाक रोम शहर पण सुडाने बेक.” 22दांचांग वान इद्दार मदत शेशेतोर तीमथ्य इंगा एरास्त इरनी वाड मासेदोनीयाक आंपडीच्या इंगा वाड इंगा काही काळ आशियाला नीलच्या.

इफिस इंदूळदी दंगल

23इ काळला 'आ दावा विषयला1 फेदाद गोंधळ येगर्या. 24देमेत्रीय फेरोड ओगा मणशी उंड्या, वाड सोनार उंड्या, वाड अर्तमी द्यावारी गुडील बनामतुदू, यवार कारागीर उंडीर वारकी आटलाकेल संगेम दुडलु शिकुदू. 25वार आंदारनी इंगा धंदा जताक संबंध उन्डीनोर आंदारनी वाड ओगातळा शेश्या इंगा वाड आन्या, मंदीलाला, मिक यरका उंडाद की, इ धंदालोन्केल मनाक शिंगार दुडलु शिकताय. 26पण सूडना वाड पौल फेरटोड मणशी येम शेस्तुनाड वाड येम आंटूनाड आदी ऐकांडा! पौल संगेम मंदीन प्रभावित शेशिनाड इंगा बदलाशीनाड, वाड इदी इफिसला इंगा आंता आशियाला शेशिनाड, वाड आंटाड, मणशी शेयता बनामतीने द्यावारलु खरेम द्यावारलु लेव. 27दिनकस्रोम इ मना धंदालदी बदनामी आय्येद धोका उंडाद; इंते लेद तर या महादेवी अर्तमिद पूजा आंता आशिया प्रांत किंवा जगपण शेस्ताद दांदी मंदिर निरूपयोगी ठरायमतेद इंगा दांदी स्वताद महत्व नष्ट आय्येद धोका उंडाद.

28यपुड वार इदी इनीर आप्पुड वार संगेम कोफाम फडीर इंगा बेग्गे कीरली आनेदेंक आंटीर, “इफिसटोरदी अर्तमीद फेदाद उंडाद.” 29शहर लोन मंदीला गोंधळ येगर्या इंगा मंदी गायस इंगा अरीस्तार्ख इ पौल संगा आनी प्रवास शेशेतोरनी मासेदोनीयाला निलचेतोरनी फटी नाट्यगृहला एका फोईर. 30पौलकी मंदी मुंदारकी फोयेद इच्छा उंड्या पण येशुन अनुयायील वान इल्ला शेयानिया कुंदुर. 31पौलुय काही सोबतील यवार प्रांत अधिकारी उंडीर, वार निरोप आंपडीची वाड नाट्यगृहाला फोवारोद इल्ला कळकळीद विनंती शेशीर. 32ओगातळा जमा आयनेंका मंदी ओगाट घोषणा शेशेदेंक आंटीर तर दुसरा मंदी इंगोगाट घोषणा शेशेदेंक आंटीर, दांचांग आंता जमा आईनोर गोंधळाशी फोइर इंगा दान्टल्योन संगेम मंदीक यरका लेकुंड्या की, मनाम इ न्याय भवनला ओगातळा येनटीक वचीनाम. 33यहुदी मंदी आलेक्स्रांद्र फेरोन ओगा मंशीन दोबुका एका फोई आंदार मुंदार नीला फडामतीर, वाड वान स्वता शेतलाता खुनवाशी वारकी समजा मतेद प्रयत्न शेशेदेंक आंट्या. 34पण यपुड मंदीक समजाश्या की, वाड यहुदी उंडाड, आप्पुड देगा-देगार रोंड घंटाल सारखा वार वगा आवाजता किर्लुका निलचीर, “इफिसटोरदी अर्तमी द्यावार फेदाद उंडाद.” 35शहरटोड लेखनिक मंदीन शांत शेस्का आन्या, “इफिसटोर मंदी, फेदा अर्तमी द्यावार्दी इंगा स्वर्गकेल फडीने पवित्र गुंडूद इफिस इदी रक्षणकर्ता उंडाद, इदी यवार्की यरका उंडाद इल्ला ओगाड तरी मणशी दुन्यामला उंडाड येम? 36या अर्थता इ माटलु नकार शैया दाव दांचांग मीर शांत नीलवाने बेक, उतावळा पना शेया राद. 37मीर इ इदारणी इंदूक ऐकोन वचीणार, खरेम तर वार मंदिर लोंदी येमटीद पण दोंगा शैया लेद किंवा मना द्यावार्दी निंदा शेया लेद. 38जर देमेत्रीय इंगा वान संगा उंडीने कारागीरलाय येमाना तक्रारील उंटे, तर दांचांग न्यायलयलु उघडा उंडाय, आंदू वार वगामेगार मिंदा आरोपलु येशी शकास्तार. 39पण जर मिक यादाना माटाद चौकशी शेशेद उंटे तर हमेशा सभाला दान संबंधला विचार शेस्काम्ला वच्ची. 40इफोद इंदू येम पण घडाशीनाद, दान बदल योग्य इदी कारण मनाक शपा दाद, दांचांग मनामे इदी दंगल चालू शेस्टतीम इल्ला आरोप मना मिंदा वचेद येरपु उंडाद.” 41इल्ला शपकाम आय्यी नेन्का वाड जमा आईनोरनी फोयेदेंक शप्या.