प्रेषित 17

थेस्सलनिका इंदू पौल

1नंतर वार अंफीपुली इंगा अपुल्लोनिया इ शहर नोनिकेल फोई थेस्सलनीका शहरकी फोईर, आंदू यहुदीलदी सभास्थान उंड्या. 2आंदू पौल स्वता रिती रिवाज लेका वान तीकुड फोई मूड शब्बाथ वार संगा शास्त्रलेख मिंदकेल वादविवाद शेश्या. 3वाड शास्त्र लेखदी उलागडा शेशी इल्ला प्रतीपादन शेश्या की, ख्रिस्तड दुख येताला इंगा सचीने नुस इंगा लेपाला दिंदी आवश्यक उंड्या इंगा या येशुनदी नीन मी मुंदार घोषणा शेस्का वाडे वाळ ख्रिस्त उंडाद. 4आप्पुड वार पैकी काही जनदी खात्री आयी पौल सिला इरनी वची मिळाशीर; इंगा ग्रीक उपासक इर्दी फेदाद समुदाय वारकी शिक्या, दांटला प्रमुख आंडेर काही रवा रवाने लेकुंडीर. 5पण याहुदील शिगक मना बरोबर संता लोन्टोर रवा गुंडाळ मंदी ऐकोन इंगा घोळका जमा शेशी नगरला अधीर निर्माण शेश्या इंगा यासोन इल्लु मिंदा हल्ला शेशी वारणी मंदी तीकुड बेटीक तिशी ऐकोन वचेळदी खटपट शेशी सुश्या. 6पण वारदी शोध आंटाल्या आप्पुड वार यासोन नि इंगा रवा मंदीन नगर लोन अधिकारीला तीकुड जगुका फोई किर्लुका आनीर, यवार जगदी उलटा पालटा शेशीर वार इंदू पण वचीणार. 7वान यासोन स्वता इलकाडा तीस्कोनडार इंगा इदी आंदार कैसर आज्ञा उलटा वागास्तार, आटे येशु आंका दुसरोळे यवार राजा उंडाळ इल्ला आंटार. 8इदी ऐकाशी वार मंदीक इंगा शहर अधिकारीक खवळाशी इडशीर 9मग वार यासोनदी इंगा इंगोगोरदी जामीन तीस्कोनी वारणी ईळशेशीर.

बिरुया इंदू पौल

10नंतर बंधूजनलू पौल इंगा सिला इरनी लगेच मोबुलोन मबुला बिरुया शहर की आंपडीचीर, वार आंदू पोहोचाशी नेन्का यहुदाल सभास्थानला फोईर. 11आंदूटोर मंदी थेस्सलनीटोर मंदी पेक्षा फेदा मनटोर उंडीर; वार फेदा उत्सुकताता स्वीकार शेशीर इंगा इ माटलु इले उंडाय की येम दिन विषयला वार शास्त्रलेखला दीनांम फुळकुका फोईर. 12दान लोन्टोर इंगा संगेमे प्रतीष्टीट ग्रीक आंडेर इंगा मनसलू इर विश्वास फेटीर. 13तरी पण पौल द्यावार्दी वचन बिरुयाला पण शप तुणार इदी थेस्सलनिकालोन यहुदील की समजाश्या आप्पुड वार आकाड पण फोई मंदीन खवलाशी चिता मतीर. 14दान मिंदकेल बंधूजनलू पौलनी समुद्र तीकुड फोयेदेंक लगाने आंपडीचीर; इंगा सिला इंगा तीमथ्य इर आंदे निलचीर. 15आप्पुड पौलनि पोहोचा मतेटोर वान अथेनै पर्यंत एका फोईर इंगा सिला इंगा तीमथ्य इर स्वता तीकुड आय्यी आंता लगान दाला इल्ला इर्दी आज्ञा तीस्कोनी वार यलीर.

अथेनै शहर इंदू पौल

16पौल अथेनैस वारदी दावा सुस्तांना, वार शहर मूर्तील निंडीनेय उंडाय इल्ला सुशी वान मनुद संताप आय्या. 17दिनकस्रोम वाड सभास्तानला यहुदील संगा इंगा उपासक मंदी संगा इंगा संताला यवार वांकी आढळादूर वार संगा दिन्नाम जगडाम आळदू. 18आप्पुड एपिकुरपंथी इंगा स्तोयिकपंथी इर संगा यंता तरी तत्वज्ञानलु वानदी विरोध शेशीर, यंता तरी जन आनीर, “इड बडबडेळ येम माटलाळ तुनाळ?” दुसरोर आनीर, “ईद इंगोगो द्यावारलाड घोषणा शेशेतोळ काम्पीस्ताळ” येनटीक की येशु इंगा पुनरुत्थान इ विषयदी सुवार्ताद घोषणा शेस्का उंडदू. 19नंतर वार वान फटी अरीयपग टेकडी मिंदा एका फोई आन्या, “मीर इचीनेद इदी कोताद शिकवण येम इदी माक समजाशी शप्यार येम? येनटीक की मीर माक अनोळखी माटलु ऐका मतुतूनार दिंदी अर्थ येम इदी समजाशी तीस्कोनाला इल्ला माड इच्छा उंडाद. 20येनटीक की मीर माक अनोळखी माटलू ऐका मतुतुणार; दिंदी अर्थ येम उंडाद इदी समजाशी तीस्कोनाला इल्ला माड इच्छा उंडाद.”

21येम तरी कोताद विषय शप्या ऐकाशीन शिवाय आंदार अथेनेकर इंगा आंदू नीलचेटोर इंगोगार मंदी इर्दी वेळ फोवा कुंदु.

अरियपगला पौल शेशिनेद भाषण

22आप्पुड पौल अरियपग नाडमा नीला फडी आन्या अरे अथेनैकरटोर, मीर आन्नी बाबतीला द्यावार द्यावारलाक संगेम मान इचेटोर इल्ला नाक कंपीस्ताद. 23येनटीक की नीन तीर्गुका-तीर्गुका मी उपासनाय वस्तूल सुस्तांना, अनोळखी द्यावार्की इ अक्षरलु लीवाशिनेद वेदी नाक आढळाश्या येमटीद मीर अज्ञानता भजन शेस्तार आदी नीन मिक जाहीर शेस्तान. 24या द्यावार दुन्याम इंगा दांटलोनी आंताच निर्माण शेश्या वाड स्वर्ग इंगा पृथ्वीटोळ उंडी शेईता बनामतीने इंटल्या नीलवाड. 25इंगा वांकी एमी कमी लेद, दांचांग मणशी शेईकेल वांदी सेवा घडाला इल्ला पण लेद; येनटीक की जीवन जेम इंगा आंताच वाड स्वता आंदारकी इस्ताळ. 26इंगा वाड ओकोन देगार नुस मनुष्यलाय आन्नी राष्ट्रल निर्माण शेशी वार पृथ्वी संबंध बेनु मिंदा नीलाला इल्ला शेशिनाळ; इंगा वांदी नेमाशिनेद वेळ इंगा वारदी इनलाद सीमा वाळे ठहरा मतीनद उन्डाद1. 27दिनकस्रोम की, वार द्यावारनी फुळकुकाम इ आशाता शेइयाला इंगा दान यला तरी शिकाआला, वाड मना पैकी यवार तीकेल पण दुराम लेळ.2 28येनटीक की मनाम वान इचांग जगास्ताम, वागास्ताम इंगा उंडाम आले मी कवील पैकी पण यंता तरी जन आनीर की, मनाम वास्तविक वान वंश उंडाम.

29तर मग मनाम द्यावार वंशज उंडतांना माणशी हुशारीता इंगा कल्पनाता कोराशिनेर बंगार, रूप किंवा राय, इर आकृती लेका द्यावार उंडाम इल्ला मनाक वाटा रोद. 30अनोळखी काळ तीकुड द्यावार कनलू मुस्कोन्या, पण इपुड आंदार आन्नी तीकुड पश्चात्ताप शैयाला इल्ला वाड मनुष्यलाक आज्ञा शेस्ताळ. 31वाड इल्ला वगा दिवस नेमाशीनाळ की, यफोद वाड मनाम नेमाशीने मणशी3 इन तीकेल जगदी न्याय निवाडा नीतीमत्वता शेशेतोळ उंडाळ; वाड वांकी सचीनेन्का लेपीगात इ विशयदी प्रमाण आंदारकी पटामतीडाड.

32आप्पुड सचीनोर पुनरुत्थान विषयला ऐकाशी यंता तरी जन थट्टा शेस्तुनार, यंता तरी जन आनीर, “इ विषयला मिम मिद इंगा ऐकशाम.” 33इंता आय्यी नेन्का वार लोकेंल येली फोया. 34तरी काही मनसलू वांकी चीपकाशी उंडी विश्वास फेटीर; दांटल्या दिओनुस्य अरिय-पगकर, दमारी फेरूद यादू आंडीद इंगा वार संगा इंगोगोर यंता तरी जन उंडीर.