प्रेषित 11

पेत्रद येरुश्लेम्क शहर वापस वचेद

1यहुदी लेनेर मंदी पण द्यावार वचनदी स्वीकार शेशीर इदी यहुदिया प्रांतलोन प्रेषितलु इंगा विश्वास फेटेटोर बंधूल ऐकाशीर. 2पण यपुड पेत्र यारुशलेम शहर की वच्या, आप्पुड सुंता आईनेद यहुदी विश्वासी गट वान मिंदा टीका शेशेदेंक आंटीर. 3वार आनीर, “यवार सुंता काणेर इंगा इंगोगो राष्ट्रटोर उंडार इल्ला विश्वास फेटेटोर मंदी इल्काडा मीर फोतीर, इंताने लेद तर मीर वार संगा रोट्या पण तींटीर.” 4दांचांग पेत्र वारकी आंता घटना सविस्तर स्पष्ट शेशी शपीर. 5पेत्र आन्या, नीन यापो शहरला प्रार्थना शेस्तांना नाक तंद्री आंटीने लेका आय्या इंगा नीन वगा दृष्टांत सुस्तीन की, फेदा सुकाल लेका नालुग कोपर्याल फटी ईळशिनेद वगा चादर ना देगारा वच्या. 6नीन दान तीकुड टक सुशी विचार शेसुदुन, नीन वार्दिन्त्ला पृथ्वी मिन्दुद नालुग काळलाय प्राणील, जंगली पशुल, जरगेटी प्रानील इंगा मोळामला उडाशेटी पक्षीळ नीन दानटल्या सुस्तीन. 7ओकाट वाणी ना संगा माटलाळतांना नीन ऐकास्तीन, “पेत्र लेय, मतेस गास मुड!” 8पण नीन आंटीन, “प्रभू, नीन इल्ला यपुडूच शैयान, नीन अपवित्र किंवा अशुद्ध इल्ला यपुडूच इल्ला तीना लेन.” 9मोळाम लोन्केल आ वानिता इंगा उत्तर इच्छा, “द्यावार इ माटलु शुद्ध शेशिनाद, आटलान अशुद्ध आनाक.” 10इल्ला मूळ तीकुला घाडाश्या, इंगा वाड आन्नी इंगा मिंदा मोळामला तीस्कोन्या. 11इंताळला सूळना, मुगुर मनसलु या इंटल्या मिम उंटीम दान मुंदार कैसरीया नुस ना तीकुड आम्पडीचिनेर मुगुर मनसलू वची नीला फेडीर. 12आत्माता नाक यादू प्रकारदी शक न शैयांदे वार संगा फोयेदेंक शप्तीन, इदी सहा बंधूल यवार उंडार, वार पण ना संगा उंडीर, मिम कर्नेल इल्लुक फोतीम. 13कर्नेलकी स्वता इलकाडा द्यावार दूत येला नीला फडीनेळ काम्पिच्या इदी माक शप्या, द्यावार दूत कर्नेलनि आन्या, “काही मनसलू यापो नगर आम्पडी, शिमोन पेत्रन कुतेस्को. 14वाड नीनु माटलाळी, वाड याय माटलु निक शपी, दांचांग नीद इंगा नि परीवारदी तारण आई.” 15दान नंतर नीन ना भाषण की सुरुवात शेस्तीन, सुरुवातला यला पवित्र आत्मा मना मिंदा वच्या आले वाड वार मिंदा पण वच्या. 16आप्पुड नाक प्रभुंदी शब्द आठवण वच्या, प्रभूड आनिंड्या, “योहान मंदिद बाप्तिस्मा न्यळाता शेयदू इदी खरेम, पण मिद बाप्तिस्मा पवित्र आत्माता आय्यी.” 17मनाम प्रभू येशु ख्रिस्त मिंदा विश्वास फेट्या आप्पुड यला मनाक आले वारकी पण सारखाने दान इच्चीन्या, मग द्यावारणी अडामतेटोळ इल्ला नीन यव्वार? 18यपुड इर इ माटलू ऐकाश्या, आप्पुड वार शांत निलचीर, वार द्यावार्दी स्तुती शेशीर इंगा आनीर, “तर मग द्यावर यहूदी लेनोर की पण जीवन शिकाला दांचांग पश्चात्ताप बुद्धी इच्चीनाड.”

अन्थिकिया ला शौल इंगा बर्नाबास

19स्तेफननि सचिन बाद काळला याद छळ आय्या, दांचांग विश्वास फेटेटोर यरुशलेम शहरकेल दुराम जागाला फेनिका प्रांत, कुप्र बेत इंगा अंत्युखीया शहर पर्यंत पसरास फोईर, विश्वास फेटेटोर इ जागाला फक्त यहुदी मंदीक सुवार्ता शपीर. 20दिन लोन्केल काही विश्वास फेटेटोर कुप्र इंगा कुरेने इंदू नीलचेटोर उंडीर, यपुड इ मंदी अंत्यखीयाला वचीर, आप्पुड वार यहूदी लेनोर येशुन विषयला सुवार्ता शपीर. 21प्रभू विश्वास फेटेटोरकी मदत शेयदू इंगा बगाने फेदा गटता विश्वास फेट्या इंगा वार प्रभून दावाता फोईर. 22इविषयदी बातमी यरुशलेम शहरलोन विश्वास फेटेटोर मंडळी गुमा मिंदा वच्या, दांचांग यरुशलेम शहरलोन विश्वास फेटेटोर बार्णबान अंत्यखियाक आम्पडीचीर. 23यपुड बर्णबा अंत्यखियाक फोया, आप्पुड वाड सुश्या की, द्यावार इ मंदी मिंदा संगेम कृपा शेशिनाळ, दांचांग बर्णबा संगेम खुश आय फोया, अंत्यखियालोन आंदार विश्वास फेटेटोरणी वाड उत्तेजन इच्या, वाड वारकी शप्या, यपुड पण मिद विश्वास गमामता कुंडा, येपुड भी प्रभुंदी आज्ञा अंतकरनकेल पाळाय. 24वाड शिंगार मणशी उंड्या इंगा पवित्र आत्माता इंगा विश्वासता पूर्ण उंड्या; आप्पुड प्रभूनकी संगेम मंदी शिकीर. 25यपुड बर्णबा तार्सासकी फोय आप्पुड वाड शौलनी फुळकुदू. 26यपुड बार्णबा वान फुडक्या आप्पुड वाड शौलनि स्वता संगा अंत्यखियाक ऐकोन वच्या, शौल इंगा बर्णबा वर्षभर आंदू मंडळीला नीलची संगेम मंदीक शिका मत्या, अंत्यखियाला येशुन अनुयायील 'ख्रिस्त इदी फेर पहल्यांदा शिक्या.

बार्णबा इंगा शौल यरुशलेम शहरला फोतार

27इडे काळला काही संदेष्ट्याल यरुशलेम शहरकेल अंत्यखियाक वचीर. 28वार पैकी ओकोनदी फेर अगब उंड्या, अंत्यखियाला वाड नीला फड्या इंगा माटलाळदेंक आंट्या, पवित्र आत्मा मदतता वाड आन्या संगेम खराब काळ आंता पृथ्वी मिंदा वस्तूनाद, मंदीक तिनदेंक आन्नाम शिका फोई, सम्राट क्लौदिया राजा राज्य शेस्का उंड्या आप्पुड वान काळला इदी घडाश्या. 29विश्वास फेटेटोर ठरामतीर की, यहुदिया इंदूटोर मना तम्मुडलू इंगा शेल्यानलू की जास्तीत जास्त मदत आम्पडीचेळदी प्रयत्न शेयाला वगा-वगा शिष्य जास्तीत जास्त मदत आम्पडीचेळदी ठहरामतीर. 30वार दुडलु जमा शेशी बार्णबा इंगा शौल इर तीकुड इच्या, मग बार्णबा इंगा शौल इर आय्यी दुडलु यहुदिया लोन आब्बागार तीकुड आम्पडीचीर.