वडार
1 थेस्स 4
पवित्रता वर्तनता शिकामतेडदि
तम्मूडलु, शेवटी मीम मीरक विनंती शेस्ताम व प्रभू येशूनडमा बोध शेस्ताम की, याद वागणुकीगोण द्यावारक संतोष आवाला इदी मीरक मातीकानोल इनी तिस्कूनीर व मीर आप्रमानगोन वागास्तार, दानटल्या मीरद शना-शना वाढ आवाला. कारण प्रभू येशून्द तीकनोल यादयाद आज्ञाल मीम मीरक इस्तीम आदि मीरक यरका उंडाद.
कारण परमेश्वरद इच्छा इदी उडाद की, मीरद पवित्रकरण आवाला, आंटे मीरद जारकर्मानूट दुराम निलवाला इंका मीरदाटलोर प्रत्येकोरक समजायला की, यवार वारक मनाद देहाला पवित्रतेगोन व आदरबुद्धीगोन मनाद स्वाधीन यळा शेशी इयाला. द्यावारक न ओळखाशातोर उन्गोजातीगों वासनेद लोभागोन शय्या कला. यवाड इदी कथालोंद उल्लंघन शेशी मनाद व तम्मून्द गैरफायदा तिस्कूनेद लेद कारण प्रभू इदी आंता कथालबद्दल शासन शिशातोड उंडाद; इदी मीम मीरक पहिला शपीन्द उंड्या व बजावाशीन्द उंड्या. कारण परमेश्वर मनाक अशुद्धपणा कस्रोम लेद तर पवित्रतेकसरोम पाचारण शेशीन्द उंडाद. आणकेन यवाड बी नकार शेस्ताड वाड मंशीद लेद तर मीरक मनाद पवित्र आत्मा इच्च्यातोड द्यावारा वान्द नकार शेस्ताड.
तम्मू प्रेमाविषला मीम मीरक राशेद दान्द मीरक गरज लेद; कारण वगारमेंगारमिंन्दा प्रीती शेयाला, इळा मीरक द्यावाराच नेरपीन्द उंडाद; इंका संपूर्ण मासेदोनियाल्द आंता तम्मूवर्गामिंदा मीर आदि शेस्केन उंडाम. तरी तम्मूलु, मीम मीरक बोध शेस्ताम की, आदि शना-शना शेयाला. मीम मीरक आज्ञा शेशीन्द प्रमाण शांतीगोण निलू. ओगार मेगार्दी फनील शेषेद इंगा स्वताय शेता फनी सेयाबेक दिंदि आवड मिक नीलाला. बयटूडद मंदीबराबर सभ्यतेगोन वागाशेद इंगा मीरक यमटीदबी गजर फडायाद.
सचीने ख्रिस्तनदी शिष्यला बद्दल समाधान
पण तम्मूडलु, नीन इच्छित लेद की, जे सच्चिनार दानइश्यला मीर अज्ञानी उंडाला, आंटे यवारक आशा लेद इळा इतरांप्रमान मीर दु:ख शय्याक. कारण येशु सच्चा व इंन्का लेशा इळा जर मनाम इश्वास फेटताम, तर येशूनडमा जे सचतार वारकबी द्यावारा वान्दबराबर यतकण्यार.
कारण प्रभून्द वचना मिदूडद मीम मीरक इदी शपताम की, मनाम जिता उंडाम व जे प्रभून्द वच्चीनदन्का यक्का नील्ताम, आदि मीम आडदन्का सच्चीन्द मुदारा फयातोर कान. कारण आज्ञा शेशातोरक गर्जणेगोन, आद देवदुतान्द वाणी इंका परमेश्वरद कण्ऱ्यानदी आवाज वच्ची, आप्पुड प्रभू स्वतः स्वर्गानूट उतराशी इंगा ख्रिस्ताला सच्चीन्द प्रथम लेशार. मग मनाम जे जिंता उंडाम व यक्का नीलस्ताम, आदि प्रभून्क अंतराळला भेटायदेन्क मॉडामला उचलाशी फयाम इंगा आंता कालाम प्रभुबराबर निलचेद.
आणकेन मीर इदी वचनाद ओकामेकोर्दी सांत्वन शयडा.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.