1 करिंथ 9

ना अधिकारलाद उपयोग शेय्यान आंका पौलदी उदाहरण

1इंगोगोर लेका नीन स्वतंत्र लेन येम? नीन प्रेषित लेन येम? नीन मना प्रभु येशुन सुडालेद येम? प्रभुला मीर ना मेहनतदी फळ लेर येम? 2जरी नीन इंगोगोर कसोम प्रेषित लेकुंडा, तरी नीन मीकसोम प्रेषित उंडान येनटीक की मीर प्रभुला नीन प्रेषित उंडान आंका शिक्का उंडार. 3येवार नाक दोष आंचतार वारकी उद्दे नाद उत्तर उंडाद: 4माक येम मी इंटल्या नीलची तिनेदतागेद अधिकार लेद यम? 5इंगोगोर प्रेषितलु, प्रभुन तम्मुळलु इंगा कैफाड, शेस्तार आल्ले मिम यादाना विश्वासी शेल्यालनी वडती बनाय मतकेन, मा संगा येतकेन तीरगेद माक अधिकार लेद येम? 6का फक्त नाक इंगा बर्णबानकी फनी शेशेद लेद इल्ला अधिकार उंडाद? 7स्वतः खर्चता सैनिक आंकेन सेवा शेशेतोड इल्ला येवाड उंडाड? येवाड अनगुरदी बगीचा आंचताड इंगा दानलोनी फळलु तिनाड? इंगा येवाड मेंढर्यालदी खांड राखास्ताड इंगा मेंढर्यालदी फाल तागाड? 8नीन इ माटलु मनशी रीतलेका शेपतुनान येम? मोशेन नियमशास्त्र पण इद्दे शप्पाद येम? 9येनटीक की, मोशेन नियमशास्त्रला राशिनेद उंडाद की, 'मळणी शेशे यद्दद मुती कट्टाक.' द्यावारकी फक्त यद्दद चिंता उंडाद येम?1 10इंगा विशेष शेशी मना कसोम आंटाड? इदी नक्की मना कसोमे राशिनेद उंडाद येनटीक की नागराशेतोड आशाता नागरायाला इंगा येवाड पेरणी शेस्ताड वाड मनाक हिस्सा शिक्के आशाता शेय्याला. 11मिम जर मी कसोम आत्मिक माटा पेराशीनाम, तर माक मी तीकनुस दैहिक माटलाद कापणी शेशेद उंडाद इदी शेंगेम फेद्दाद माटा उंडाद येम? 12जर इंगोगोर मी मिंदुडदी इदी अधिकार फंचकुंटार, तर मीम विशेष शेशी इल्ला येनटीक शेय्याराद? इंगा तरी मीम इ अधिकारदी उपयोग शेय्यालेद, पण ख्रिस्तन शुभवर्तमाननी मिम थांबाय मताराद दिन कसोम, मिम आंताच सहन शेस्ताम. 13येव्वार गुडी लोन पवित्र वस्तुलाद सेवा शेस्तार वार गुडीलोन वंटा तीन्टार इंगा येव्वार वेदी मुंदार सेवा शेस्तार वार वेदी संगा भागीदार आतार, इदी मिक येरका लेद यम? 14प्रभुड आल्ले आज्ञा इच्चीनाड की, येव्वार शुभवर्तमानदी घोषणा शेस्तार वार शुभवर्तमानताने जगाश्यार, 15पण नीन दिंटल्योन यादुच अधिकारदी उपयोग शेय्यालेद इंगा नीन इ माटलु दिन कसोम रायान की ना कसोम येमाना शेय्याबेक येवाडाना नन्नु ना ई गर्वनुस दुराम शेशी दिनकाना नीन नाद सच्ची फोय्येद शिंगार समजास्तान. 16येनटीक की जरी नीन शुभवर्तमानदी घोषणा शेस्तान, तरी घमंड शेशेद नाक येमीच कारण लेद येनटीक की इदी नाक शेय्याने बेक; नीन शुभवर्तमान शप्पान, तर ना मिंदा धिक्कार उंडाद. 17येनटीक की, नीन जर नाच्छाता शुभवर्तामानदी घोषणा शेस्तान, तर नाक पगार शिक्ताद, पण ना इच्छा विरुध्दला उंटे, तरी नाक इदी जबाबदारी इच्चीनेद उंडाद. 18तर नाद पगार येम उंडाद? इद्दे की, नीन शुभवर्तमान शेप्पेताप्पुड आदी फुकट शेप्पाला इंगा शुभवर्तमान अधिकारदी नीन दुरुपयोग शेय्याराद.

आंदारदी सेवा

19येनटीक की नीन आन्नी तीकनुस स्वतंत्र उंडी पण इंगा शेंगेम मंदी शिक्काला आंकेन नीन आंदार दास आयतीन. 20नीन यहुद्योर कसोम यहुदी आयतीन; नीन नियमशास्त्र अधीन लेकुंटीन तरी नीन नियमशास्त्र अधिन आयतीन दिन कस्रोम की, वारनी जक्का दावाला येव्वार नियमशास्त्र अधीन उंडार. 21(नीन द्यावार नियमला बैट्या लेन, पण ख्रिस्तन नियमला अधीन उंडान) नीन नियमशास्त्र अधीन उंडीनोरनी जक्का दावाला, आंकेन नियमशास्त्र अधीन इल्ला आयतीन. 22इंगा नीन कमजोर उंडीनोरनी जक्का दावाला, आंकेन नीन कमजोर उंडीनोर कसोम कमजोर आयतीन. नीन आंता मंदी कस्रोम आंताच आयतीन, दिन कसोम की यल्लाना यल्ला वार लोन वगानदी तरी तारण कावाला. 23इंगा नीन इदी आंता शुभवर्तमान कस्रोम शेस्तान, दिन कसोम नीन पण दांटल्या सहभागी कावाला.

ख्रिस्ती फारेद स्पर्धा

24स्पर्धाला फारेताप्पुड तर आंदारुच फारतार पण बक्षीस वगानके शिकताद, इदी मीक येरका लेद यम? दिन कसोम इल्ला फारना की, मिरे झिकायाला. 25स्पर्धा कसोम मेहनत शेशेतोड प्रत्येक मनशी प्रत्येक माटाला दम फटेतोड उंटाड. वार नाशवंत मुकुट शिक्के कसोम इल्ला शेस्तार पण मनाम अविनाशी मुकुट मिळाय मतेदेंक इल्ला शेस्ताम. 26दिन कसोम नीन तर इल्ले फारतान पण व्यर्थ लेद, नीन पण आल्ले गुद्दीगास लढास्तान, घालीमिंदा गुद्दलाडेतोन तीरना लढायान. 27पण नीन ना फईक वगा खिलाडी लेका शिस्त आंचतान इंगा दानकी आदी शेयदेंक नेरपुतान याद दानकी शेय्याबेक लेकाते इल्ला कावारादकी नीन इंगोगोरकी नेरपी स्वताने अयोग्य ठरायाराद.