वडार
1 करिंथ 16
यरुशलेम शहरलोन मंडळीक दान
इप्पुड, पवित्र मंदी कसोम वर्गणी जमा शेशे बद्दल, यल्ला नीन गलतीलोन मंडळीक आज्ञा इच्चीनान मीर पण आल्ले शेयांडा. मी पैकी प्रत्येक मनशी, वानकी शिक्कीने पगारलोन्केल, प्रत्येक हफ्ता पहिला दीनमुनाड दुडलु जमा शेशी फेटना. इंगा यप्पुड नीन वच्यान, मीर स्वीकार शेशीने मंदीक मीद देणगी यरुशलेम शहरलोंग येतकेन फोयेदेंक आमश्यान; इगा जर नादसुध्दा फोयेद योग्य उंटे तर वार ना संगा वच्यार.
पौलदी यात्राद योजना
नीन मासेदोनिया प्रांतनुस फोयान आप्पुड मीतीकुड वच्यान येनटीक की मासेदोनियानुस फोयेद नाद योजना उंडाद. इंगा जमास्ते तर नीन मी संगा निलच्यान इंगा सली कालाम घालवाशान, आंटे नीन फोयान आकाडा मीर नन्नु दावाक आमशार. पण नाक रव्वा वेळ कसोम मीमलान भेटाशेद नाद इच्छा लेद येनटीक की जर प्रभुनदी इच्छा उंटे तर मि देगारा काही वेळ निल्वाला इल्ला नीन आशा फेटतान. याबय दिनमुद फंडगा (पेन्टेकॉस्ट) नंताक नीन इफीसला नीलच्यान येनटीक की ना कसोम फेद्दाद इंगा सामर्थ्यशाली कवाड तेरशीनेद उंडाद इंगा इल्लोन शेंगेम मंदी उंडार येव्वार नाक विरोध शेस्तार.
जर तीमथ्य वच्या तर वाड मीर देगार आदरान्दे यल्ला निलची दानतिकुड लक्ष इंडा येनटीक की वाड पण ना लेकाने प्रभुनदी फनी शेस्ताड. दिन कसोम येवारुच वान तुच्छ मानायाकुना. पण वाड नातीकुड दावाला आंकेन वान शांतीता आमस काडना आंटे इंगोगो विश्वासी तम्मूळला संगा वानदी वच्चेद नीन दावा सुस्तुनान. गान तम्मूड अपुल्लोन बदल इल्ला उंडाद की, वाड इंगोगो तम्मूळला संगा मीतिकुड दावाला, इल्ला नीन वानकी शेंगेम विनंती शेस्तीन पण वारदी इप्पुड वच्चेद खरेमे इच्छा लेकुंड्या गान वानकी यप्पुड वानकी वेळ शिक्की आप्पुड वाड वच्ची.
आखरी आदेश
सावध उंडाडा, मीरद विश्वासला मजबूत निलुंडा. धैर्यशाली कांडा. सशक्त कांडा. प्रत्येक माटा याद मीर शेश्यार आदी प्रेमता शेयांडा.
इप्पुड तम्मूळलू इंगा शेल्यांलू स्तेफन घरानाद मीक शिंगार माहिती उंडाद. वार अखया प्रांतलोंन पहिला फळ उंडार; इंगा पवित्र मंदी सेवा कसोम वार तैयार उंटार. नीन मिक विनंती शेस्तान की, प्रत्येक व्यक्ती येवाड इ फनीला कुडताड इंगा प्रभुन कसोम श्रम शेस्ताड मीर इल्लोन मंदी अधीन नीलुंडा. स्तेफन, फर्तुनात, इंगा अखायिक इर वच्चीर आंका नाक आनंद आय्या येनटीक की वार नाद आदी गरज पूर्ण शेशीर याद मीर शेशी शकाया कुंटीर. येनटीक की वार ना इंगा मी आत्मान पण प्रसन्न शेशीर. इल्लोन मंदीन मानायंडा.
आशिया खंडलोन मंडळीला तीकनुस मिक नमस्कार. अक्कीला, प्रीस्कील्ला इंगा याद मंडळी वार इंटल्या जमा आयताद, आदी प्रभूला मिक नमस्कार आंटार, आंदार तम्मुळलु मीक नमस्कार शपतार, प्रेमता शेतल्या शेय इच्ची वगामेगारकी दंडाम शेयंडा.
नीन, पौल स्वत: ना शेयता इदी सलाम रास्तान. जर येवाडाना प्रभुन मिंदा प्रेम शेय्याड, तर वाड शापीत कावाला, “हे मा प्रभु दा” प्रभु येशुनदी कृपा मीसंगा उंडाला! ख्रिस्त येशूला नाद प्रेम मी आंदार संगा उंडाला. आमेन.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.