1 करिंथ 13

प्रेम आन्नी वरदानला काना फेद्दाद

1जरी नीन मन्सुलाद इंगा द्यावारदूत भाषाला माटलाडतुन्याला पण ना नोना प्रेम लेद, तर नीन वाशेद तल्या इंगा झणझनाशेद झांज उंडान. 2इंगा जरी ना नोना संदेश इच्चेद वरदान उंडाद, नाक आन्नी रहस्यल इंगा आंता ज्ञान अवगत उंडाद इंगा कोंडाल हलाय मत्यान इंता ना नोना विश्वास उंडाद पण ना नोना प्रेम लेकुंड्या, तर नीन येमीच लेन. 3इंगा जरी नीन नाद आंता धन कंगाल इंगा गरीबोरकी तिनदेंक इच्यान इंगा नाद फय होमार्पण कसोम इच्यान पण जर नानोना प्रेम लेकुंड्या तर नाक येमीच फायदा लेद. 4प्रेम शेशेतोड व्यक्ती मना जीवनला दम फटताड, इंगा इंगोगोरमिंदा प्रेम शेस्ताड; इंगा इंगोगोरमिंदा कालाड, इंगा वाड स्वताद बढाई शेय्याड, इंगा वाड घमंडी पण लेकुंटाड. 5वाड इंगोगोरमिंदा अन्याय शेय्याड, वाड फक्त स्वतादे फायदा सुडाड, वानकी लग्गान कोफाम दाद, इंगा येवाराना वान संगा वाईट वागास्ते तर वाड वारनुस बदला तीस्कुनाड. 6इंगा वाड वाईट फनुलाता यप्पुडूच आनंदित काड. पण सत्यता आनंद मानास्ताड. 7वाड आन्नी माटलु सहन शेस्ताड, वाड आन्नी माटला मिंदा विश्वास फेटताड, इंगा वाड आन्नी माटलाद आशा फेटताड. 8वानदी प्रेम यप्पुडूच संपायाद; भविष्यवाणील संपाशी, अन्य भाषाल उंटे आय गायब आयफोई, ज्ञान उंटे तर नष्ट आयफोई; 9येनटीक की मनाद ज्ञान अपूर्ण उंडाद, नीन अपूर्ण भविष्य शपतान. 10पण यप्पुड पूर्णत्व वच्ची आप्पूड जे अपूर्ण उंडाद आदी नष्ट आयफोई. 11यप्पुड नीन बिडा उंटीन, आप्पुड बीडालेका माटलाडतुंटीन, नीन बीडालेका विचार शेस्तुंटीन. बीडालेका समजास्तुंटीन. पण यप्पुड नीन फेद्दावोड आतीन, आप्पुड नीन शिन्नावोरी माटलु इड्सकाडतीन. 12इप्पुड मनाक आरसाला अस्पष्ट कमस्ताद, पण यप्पुड पूर्णत्व वच्ची आप्पुड कंडला मुंदार सुशाम. इप्पुड मनाक आन्नी माटलाद ज्ञान लेद, पण यप्पुड मनाम स्वर्गलोंक फोयाम मनाद ज्ञान आल्ले आयफोई, यल्ला इप्पुड द्यावारदी मना बद्दल उंडाद, 13दिन कसोम इप्पुड मुड माटलु उंडाय याय मनाक शेस्केन उंडा बेक द्यावार मिंदा विश्वास फेट्टेद, आत्मविश्वासता वाड येम मनाक इच्ची आदी शिक्केद आशा फेट्टेद, इंगा इंगोगोर संगा प्रेम शेशेद. पण इ मुड माटलाला आंदारकाना फेद्दाद इंगोगोर संगा प्रेम शेशेद उंडाद.