1 करिंथ 11

सभेला अप्रशस्त वर्तन

1नीन यल्ला ख्रिस्तद अनुकरन शेस्तान आल्ले नाद अनुकरण शेशेतोर कांडा.

नत्ती मुस्कुने संबंधला निर्देश

2नीन मीद प्रशंसा शेस्तान येनटीक की मीर नाद नेहमी ध्यानाम तीस्तार इंगा नीन मीक नेमाशी इच्चीने शिक्षान, मजबुतीता पाळास्तार. 3पण मीक इदी येरका कावाला इल्ला नाक वाटास्ताद की, ख्रिस्त इड प्रत्येक मणशी प्रमुख उंडाड इंगा प्रत्येक मनशी इड आंडीदान प्रमुख उंडाड इंगा द्यावार ख्रिस्तन प्रमुख उंडाड 4प्रत्त्येक मणशी यवार प्रार्थना शेशेताप्पुड इंगा संदेश इच्चेताप्पुड मनाद नत्ती मुस्कुंटाड वाड मना प्रमुखदी आंटे ख्रिस्तद अपमान शेस्ताड. 5पण प्रत्येक आंडीद याद मनाद नत्ती मुस्कुनान्दे प्रार्थना शेस्ताद इगा मंदीला द्यावारदी संदेश शपताद आदी मनशीद आंटे मोगुनदी अपमान शेस्ताद येनटीक जी आदी आंडीद टकली शेस्कुन्ने आंडीदान लेकाने उंडाद. 6जर आंडीद मनाद नत्ती मुस्कुनाद तर आदी मना यंडकाल कोस्काडाला येनटीक की यंडकाल कोशेद लेकुटे टकली शेस्कुनेद आंडीदानकी शिग्गुद माटा उंडाद. तर आदी मनाद नत्ती मुस्कुनेद. 7येनटीक की मनशी द्यावार स्वरूप इंगा गौरवदी चित्र उंडाड दिन कसोम मनशी नत्ती मुस्कुनेद शिंगार लेद. पण आंडीद मणशी गौरव उंडाद. 8येनटीक की मनशी आंडीदान तीकनुस कालेद पण आंडीद मणशी तिकनुस आय्यीनाद. 9इंगा मनशी आंडीदान कसोम निर्माण कालेद, तर आंडीद मनशी कसोम निर्माण शेशीदेंक वच्चीनाद. 10येनटीक की देवदूतलु सुस्तुनार दिन कसोम वगा आंडीदानकी मना नत्तीमिंदा आधीकारदी चिन्ह धारण शेशेद इदी योग्य उंडाद. 11तरीपण प्रभूला आंडीद मनशी नुस वेगळा लेद इंगा मणशी आंडीदान नुस वेगळा लेड. 12येनटीक की आंडीद मणशी तीकनुस उंडाद, आल्ले मनशीक पण आंडीदे जन्म इच्चीनाद. पण आन्नी माटलु द्यावार तिकनुस उंडाद. 13इदी मीर स्वताने ठराय मतना की, नत्ती मुस्कुनान्दे आंडीद द्यावारदी प्रार्थना शेशेद इदी योग्य उंडाद यम? 14मनशी फेद्दा यंडकाल वाढाय मतुते तर इदी वान कसोम शिग्गुद माटा उंडाद. इल्ला निसर्ग सुध्दा मीक नेरपाद यम? 15पन आंडीद फेद्दा यंडकाल फेटते इदी दानकी गौरव उंडाद येनटीक की दानकी दानी यंडकाल मुशेदेंक इच्चीनेय उंडाय. 16जर यवारकी आना वाद शेशेद उंटे तर वारकी इदी येरका बेक, माद इल्ला रीत लेद इंगा द्यावार मंडळीलादबी लेद.

प्रभुभोजन बद्दल

17इप्पुड मुंदारदी आज्ञा इच्चेताप्पुड नीन मीद प्रशंसा मंडळीला शेय्याक वच्चीनान येनटीक की मीद वगातळा वस्ते फायदा लेद पण नुकसान आयताद. 18पहिला, नीन इदी इंटान की, यप्पुड मीर मंडळीला वगातळा वस्तार, आप्पुड मिनडमा फुट उंटाद इंगा काही प्रमाणला दानमिंदा विश्वास फेटताम. 19दिन कसोम की, येव्वार मी नडमा खरेम उंडार वार प्रकट कावाला आंकेन मीनडमा फुट उंडा बेक. 20यप्पुड मीर वगातळा वस्तार आप्पुड मीर येम तीन्टार आदी प्रभू भोज लेद. 21येनटीक की मीर भोजन शेस्तार आप्पुड मी दांटल्योन प्रत्येक मनशी मुंदारकी फोई स्वताने तिनका फडताड. वगाड आकालता आल्ले निलस्ताड तर इंगोगोड अतीतृप्त आय फोइतार. 22तीनदेंक तागदेंक मीक इल्लु लेद यम? का मीर द्यावार मंडळीन तृच्छ मानास्तार इंगा या गरीब तम्मूळलु इंगा येल्यांलु येव्वार देगार येमीच लेद वारनी शिग्गुना केडपुतार? नीन मीमलान यम आनाला? नीन मीद प्रशंसा शेयदून यम? इ बाबतीला नीन मीद प्रशंसा शेय्यान.

प्रभू भोज

मत्तय 26:26-29; मार्क 14:22-25; लूक 22:14-23

23येनटीक की प्रभुन तीकनुस याद शिक्षा नाक शिक्या आद्दे नीन मीक इस्तीन. प्रभु येशुन, या मोब्बुला विश्वासघात शेशी फट्टी इद्देंक वच्या. वाड रोट्या तिस्कुन्या, 24इंगा उपकार माना आदी इरगा मत्या इंगा आन्या, “इदी नाद फय उंडाद, याद नीन मी कसोम इस्तान. नाद ध्यानाम शेशे कसोम इदी शेयांडा.” 25इल्ले वाड भोजन शेशीनेंका प्याला तिस्कुन्या इंगा आन्या, “इदी प्याला ना रक्तामगोन आईनेद कोता करार उंडाद. यप्पुड पण मीर इदी ताग्यार आप्पुड नाद ध्यानाम शेशे कसोम इदी शेयांडा.” 26येनटीक की यन्नी तुकुला मीर इदी रोट्या तीन्टार इंगा इदी प्याला तागतार, आन्नी तुकुला मीर प्रभुन सावनी वाड वच्ची नंताक घोषणा शेस्तार. 27दिन कसोम येवाडाना अयोग्य रितीता प्रभुनदी रोट्या तिनी लेकुटे प्याला तागी वाड प्रभुन फय इंगा रक्ताम विषयी दोषी ठराशी. 28आंकेन मनशी स्वतःद परीक्षा शेयाला इंगा आप्पुड इदी रोट्या तीनाला इंगा इ प्यालान तागाला. 29येनटीक की जर प्रभुन फइद अर्थ तेल्चकुनान्दे येवाड इ रोट्यान तिन्टाड इंगा प्यालान तागताड तर वाड तिनीगेस इंगा तागीगेस स्वतःमिंदा दंड जक्कुंटाड. 30इद्दे दिन कसोम मी दिंटल्योन शेंगेम मंदी कमजोर, बिमार उंडार इगा काही मंदी सच्ची पण फोइनार. 31पण जर मीम माद परीक्षा शेशाम तर मा मिंदा न्यायदी प्रसंग दाकाफोई. 32पण प्रभुड माद न्याय शेशी आप्पुड माक शिस्त आंची, दिन कसोम की, दुन्याम लोन बाकी मंदी लेका माक पण शिक्षा कावाराद. 33आंकेन ना तम्मूळलु इंगा शेल्यांलु यप्पुड मीर भोजन शेयदेंक वगातळा वस्तार, आप्पुड वगामेंगार कसोम थाबायंडा. 34जर येवारकी आना खरेमी आकाल आय्यींटे वाड इंटल्या तीनाला दिन कसोम की मिद वगातळा वच्चेद दंडकी कारण ठरायाराद. नीन वच्यान आप्पूड इंगोगो माटलान शिंगार शेशान.