Waddar
मार्क 2
येशुड वगा लकवा आंटीने मनशीन शिंगार शेस्ताड
काही नाळा बाद येशुड कफर्णहुम नगरकी वापस वच्या आप्पुड वाड इल्काडा उंडाड इल्ला मंदी गुम्मामिंदा फड्या. आप्पुड इंता मंदी जमा आय्यीर की इंटल्या वारकी जागा मिग्लाले, इंते लेद तर दरवाजा बैट्या पण जागा लेकुंड्या. आप्पुड वाड वारकी वचन शपदू. मग काही मंदी वान देगार लकवा आंटीने मंशीन येकोचीर. वान नलगुर मोस्का वचीर. पण गर्दी कस्रोम वारकी आ मंशीन येशुन देगार एका फोवा दाकुंदू, मग येशुड येंदू नीला फडीन्या वान मिन्दुडदी छप्पर वार तीशीर इंगा या मंचाम मिंदा आ मणशी उंड्या, आदी मंचाम वार छप्पर नुस किंदा वान देगार इडशीर. वारदी विश्वास सुशी येशुड लकवा आंटीने मनशीन आन्या, “कोडका, नि पापलाद क्षमा आयनाद.” आंदू काही नियमशास्त्र शिक्षकलु कुशींडीर. वार स्वता मनला आनेदेंक आंटीर की, “इ मनशी इल्ला येनटीक माटलाडताड? इड द्यावारदी अपमान शेस्तुनाड! द्यावारनी इडशी येवारूच पाप क्षमा शेशी शकायार?” इंगा आप्पुड वार स्वता ने विचार शेस्तुणार, इदी येशुड आप्पुडे मना आत्माला ओळखाशी वारनी आन्या, “मीर मी मनला इल्ला येनटीक विचार शेस्तार? नि पापलाद क्षमा आयनाद, इल्ला इ लकवा आंटीने मंशीन आनेद का लेय इंगा नीद मंचाम येतकेन नडू; दिंटल्या याद सोपा उंडाद?” पण मनशी कोडकुक पृथ्वी मिंदा पाप क्षमा शेशेद अधिकार उंडाद वारकी तेल्वाला आंका, वाड लकवा आंटीने मंशीन आन्या, “नीन नीक शेप्तान, लेय, नीद मंचाम येतकेन इल्लुक येल्ली फो.” मग वाड लगेच लेश्या. वाड वानदी मंचाम येतकेन आंदार मुंदार वाड इल्लु बैटीक फोया; दिन कस्रोम वार आंदार आश्चर्य चकीत आय्यीर इंगा द्यावारदी गौरव शेस्का आनीर, “मिम इल्ला येप्पुडूच सुडा लेकुंटीम.”
लेवीद पाचारण
येशुड वापस गालील सरोवर तीकुड फोया इंगा संगेम मंदी वान देगार वच्चीर इंगा वाड वारकी शिक्षण इच्या. यंकसार वाड फोयेताप्पुड अल्फीन कोडकु लेवी इन जकात नाका मिंदा कुस्नीनोन सुश्या. इंगा येशुड लेवीन आन्या, “नायंका दा.” आप्पुड लेवीड लेश्या इंगा येशुन यंका फोया.
इंगा इल्ला आय्या की येशुड लेवीन इंटल्या तिनदेंक कुसन्या; आंदू जकातदार इंगा पापी मन्सूल येशुन इंगा वान शिष्यल संगा तिनदुर येनटीक की वार संगेम मंदी उंडी वान यंका वचीनीर. तिनेताप्पुड काही नियम शास्त्र शिक्षकलु यवार परुशी उंडीर वार येशुन पापी मंदी इंगा जकातदारला संगा तिनेताप्पुड सुशीर. वार वान शिष्यलनी आनीर, “इड पापी इंगा जकातदारला संगा येनटीक तिनटूनाड?” इदी इनी येशुड वारनी आन्या, “शिंगार मंदीक वेद्यद गरज लेकुन्टाद, बिमारोरकी उंटाद. नीन नीतिमान मंदीन लेद, पण पापी मंदीन कुतेदेंक वचीनान.”
उपवास बद्दल प्रश्न
यप्पुड योहान शिष्यल इंगा परूशील उपवास शेयदूर आप्पुड काही मंदी येशुन तीकुड वचीर इंगा वान आनीर, “योहान शिष्यल इंगा परुशी मंदी उपवास शेस्तार पण नी शिष्यल येनटीक उपवास शेय्यार?” येशुड वारनी आन्या, “वर्हाड जताक फेंडली कोडकु उंडाड आड नंताक उपवास शेशेद शक्य उंडाद येम? फेंडली कोडकु जताक उंडाड आड नंताक वारकी उपवास शेशेद शक्य लेद. पण इल्ला दिन्मुल वच्ची की, फेंडली कोडकु वार देगाटेल तीस्कून कामला वच्ची इंगा मग वार आ दिन्मुला उपवास शेश्यार. यवार कोत्ता बट्टालकी फाता बट्टा जोडवार, जर वाड इल्ला शेस्ताड तर कोत्ता बट्टा फाता बट्टालनी शिंपी इंगा आदी पहिला काना जास्त शिंगी फोई. आल्ले कोत्ताद दाखरस फाता तोल थैलीला येय्यार. जर वाड इल्ला शेस्ताड तर दाखरस तोल थैलीन तेगी फोई इंगा दाखरस खराब आय्यी इंगा दाखरस तोल थैलीद नाश आय्यी. दिनकस्रोम कोत्ता दाखरस कोत्ता तोल थैलीला ने येस्तार.”
येशुड शब्बाथ प्रभूड
मग इल्ला आय्या की, शब्बाथ दिन्मु नाबद शेल्लोन्केल फोयेताप्पुड, वान शिष्यल उंब्याल तेम्पुदूर. आप्पुड परूशील येशुन आनीर, “सूड, शब्बाथ दिन्मु येम शैयाराद आदी इर येनटीक शेस्तार?” येशुड वारनी आन्या, “यप्पुड दावीद इंगा वान संगा उंडीन मंदीक आकाल आय्या इंगा वारकी तिनदेंक बेकुंड्या. आप्पुड वार येम शेशीर दिन बद्दल मीर वाचायलेद येम? अब्याथार महायाजक उंडीनाप्पुड, वाड द्यावार गुडीला यल्ला फोया इंगा द्यावारकी एकपिचीने रोट्याल, याय नियमशास्त्रला राशीने लेका याजक शिवाय यवारूच तिना राद आय यल्ला तीन्या इंगा यवार वान संगा उंडीर वारकी पण यल्ला इच्या?” वाड वारनी आन्या, “शब्बाथ दिन्मु मंदी कस्रोम बनाशिनाद. मंशीन शब्बाथ दिन्मु कस्रोम बनाया मतालेद. दिन कस्रोम मनशी कोडकु शब्बाथ दिन्मुक पण प्रभूड उंडाड.”
Waddar. Copyright © Bridge Connectivity Solutions Pvt. Ltd. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.