Skip to content
BibleKenya

Waddar

1 तीमथी 1

दंडाम इंगा लबाड शिक्षण संबंधता इशारा

परमेश्वर मनालनी ताराशेतोड इंगा ख्रिस्त येशुड मना आशा इर आज्ञाता ख्रिस्त येशु न प्रेषित पौल तीकनुस: विश्वासला ना खरेम कोडकु तीमथ्य मना परमेश्वर आब्बाड इंगा ख्रिस्त येशुड मना प्रभू इन तीकनुस निक कृपा, दया इंगा शांती उंडाला.

मासेदोनिया प्रांतकी फोयेतापुड यला नीन निक कळकळीद विनंती शेशीन्टीन आल्ले इप्पुड पण शेस्तान की, नु इफिसला नील्वाला, दिन इचांग नु संगेम जनकी निक्षून शपाला की, वार इंगोगो शिक्षण शिका मतारोद. इंगा या परमेश्वर व्यवस्था विश्वास लेका उंडाद दान उपयोगी न फडेळदी पण वाड पण उत्पन्न शेशेळ कथाल तीकुड इंगा संगेम वंशावळ तीकुळ लक्ष इया कुंडा. आद्दे नीन इपूळ पण शप्तान. इंगा इ आज्ञा द उदिष्ट प्रेम उंडाद, याद शुद्ध अंतकरण लोन्केल, शिंगार विवेक भाव लोन्केल इंगा निष्कपट विश्वासलोंदी उंडाला. इ माटलू इळशी यंता जन व्यर्थ माटला तीकुड वळा शिंडार. वारकी नियम शास्त्र शिक्षक आयेळदी उंड्या पण वार या माटा विषयला फेदा आत्मविश्वासता माटलाळतार इंगा शप्तार आय्यी वारके तेलवाव.

पण माक इदी यरका उंडाद की, यवारू नियम शास्त्रद खरेमे यथार्थ उपयोग शेस्ते आदी शिंगार उंडाद. इंगा मनाक इदी यरकाने उंडाद की, नियमशास्त्र इदी नीतिमान मंदी इचांग शेशिनेद लेद तर आज्ञाभंग शेशेटोर इंगा विद्रोही, पापी, भक्ती लेनोर, अधर्मी, अशुद्ध, आबागारणी मतेशेतोर इंगा आमान मतेटोर, मनुष्यघात शेशेटोर जारकर्मी, समलैंगिक, मनुष्यलाद व्यापार शेशेतोर, खोटाडेर, खोटा वटू तीस्कोनेटोर वार इचांग उंडाद इंगा शुद्ध शिकवण उलटा जर येमाना दुसराद उंटे तर दान इचांग पण उंडाद. गौरवदी सुवार्ता याद धन्यवाद परमेश्वर तीकेल वस्ताद इंगा याद ना मिंदा सोपवाशी इचीणाळ, दांकी इदी अनुसरून उंडाद.

पौल दी साक्ष

यवाळ नाक शक्ती इच्चीनाड आ ख्रिस्त येशु मना प्रभुंदी नीन उपकार मानास्तान येनटीक की वाळ नाक विश्वासी मानाशी सेवाला फेटीनाळ. जर नीन पहिले परमेश्वर निंदा शेशेतोळ, छळाशेतोळ इंगा हिंसक उंटीन पण नीन आदी अनजानता इंगा अविश्वासता शेस्तीन दांचांग ना मिंदा दया आय्या. पण विश्वास इंगा प्रेम याद ख्रिस्त येशुला शिक्ताद आदी मना प्रभू कृपाता ओसाडीची वाहाशीर. इदी माटा विश्वासदी इंगा पूर्ण अंगीकार शेशेळ योग्य उंडाद की, ख्रिस्त येशु पापी मंदीन तारादेंक दुन्यामला वच्या इंगा आ पापी मंदी पैकी नीन फेदा पापी उंडान. पण फक्त इदे हेतुगोन ना मिंदा दया सुपिचीर की नालेका संगेम पापील मिंदा ख्रिस्त येशु ळ पूर्ण सहन शीलता सुपिच्या आ उदाहरण मिन्दकेल, मुंदार काळळा यवार वान मिंदा विश्वास फेट्यार वारकी सर्वकाळद जीवन शिकाला.

इपूळ आन्नी काळटोळ राजा यवार अविनाशी इंगा अदृश्य उंडाद इल्ला ओकाते परमेश्वरकी सन्मान इंगा गौरव हमेशा काळ इचांग उंडाळा. आमेन.

तीमथ्य, ना कोडकु लेका उंडाव, नीन निक नि विषयला पाहिलाने शपीने संदेशलेका इदी आज्ञा सोपास्तुनान. दिनकस्रोम की नु आटलाता शिंगार लढाई शेयाला. इंगा विश्वास इंगा शिंगार विवेक भाव फट. यंता जन इदी झुगारून इच्चीन्या इचांग वारी विश्वास रूपता जहाज मुंग्या. दांटला हुमनाय इंगा आलेक्स्रांद्र उंडार वारनी नीन शैतान की इचेस्तीन दिनकस्रोम की, निंदा शैयारोद आंका शिकायला.

Waddar. Copyright © Bridge Connectivity Solutions Pvt. Ltd. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.