Skip to content
BibleKenya

Waddar

1 करिंथ 10

इस्त्राएल मंदी इतिहासनुस चेतावणी

हे तम्मुडलु इंगा शेल्यांलु, नाक इल्ला वाटास्ताद की मिक इदी येरका उंडाला, मना आंदार पूर्वजलु मोडाम किंदा सुरक्षित उंडीर. वार आंदार तांबडा समुद्र दाटी फोईर.1 मोशेन अनुयायी रूपला वार आंदार मोडाम इंगा समुद्रला बाप्तिस्मा तिस्कुनीर. वार आंदार वक्काटे आत्मिक आन्नाम तीनीर. 2 इंगा वार वक्काटे आत्मिक नेळ तागीर येनटीक की वार-वार यंका नडशे आत्मिक खडकनुस तागतुनीर इंगा आदी खडक ख्रिस्त उंड्या.3 गान द्यावार वारदिंटल्या शेंगेम मंदी बद्दल आंनदी लेकुंड्या इंगा वारी फिनग्याल मरू भुमिला फडीन्या. इंगा इ माटलु मना कसोम उदाहरण आंकेन घडाश्या, दिन कसोम की मनाम पण वार लेका वाईट माटलाद लालुच शेय्याराद यल्ला वार शेशीनीर. वारपैकी काहीमंदी मूर्तिपूजक उंडीर आल्ला कावाकुंडा. पवित्रशास्त्रला राशीनेद उंडाद, “मंदी तीनदेंक तागदेंक किंदा कुसनीर इंगा वार मूर्तीलामुंदार नाचायदेंक लेशीर.” यल्ला वार दिंटल्या काही मंदी शेशीर आल्ला व्यभिचार मनाम पण यप्पुडूच शेय्याराद. दानदी परिणाम इल्ला आय्या की, वगा नाळाला तेविस हजार मंदी सच्ची फोइर.4 इंगा वारदिंटलोन काही-काही मंदी सुशीर आल्ला मनाम ख्रिस्तद परीक्षा सुडाराद. दानदी परिणाम इल्ला आय्या की, वार फामलु कोरक्या आंका सच्ची फोइर. कुरकुर शेयाकुंडा, यल्ला वार दिंटल्योन काही मंदी शेशीर, दानदी परिणाम इल्ला आय्या की, वार मृत्यूदूत शेयता सच्ची फोइर. इ माटलु वार संगा दिन कसोम आय्या की मनाक उदाहरण कावाला आय मना चेतावणी कसोम मनाम यवारमिंदा युगदी शेवटला नीलस्तुनाम राशे दिंटल्या वच्चीन्या. दिन कसोम नीन विश्वासला मजबूत नीला फडी उंडान इल्ला येवार विचार शेस्ताडर वाड मनाम फडाराद आंकेन जपायाला. याद मनशिक सामान्य लेद इल्ला यादुच परीक्षाला मिर फडालेद. पण द्यावार विश्वसनीय उंडाड. मी सहनशक्ती काना आतुक वाड मिद परीक्षा तिस्कुनाक फोई. पण आ परीक्षासंगा, दांटलेल बैटीक फडेद दावा पण तैयार शेशी. आंटे मिक सहन शेय्या दावाला.

मुर्तीपुजा विरोधला चेतावनी

दिन कसोम, ना प्रिय मंदी मूर्तीपूजा नुस फारी फोंडा. नीन मीमलान बुध्दीमान समजाशी माटलाडतुनान. नीन यम माटलाडतुनान दानदी मीरे न्याय शेयांडा. याद अंगूरदी रस मनाम प्रभुभोज वेळला द्यावारकी धन्यवाद इच्ची तागताम आदी ख्रिस्तन रक्तामदी सहभागीता उंडीनेद प्याला लेद येम? याद रोट्या मनाम इरगा मतुताम आदी ख्रिस्तन फइद सहभागीताद रोट्या लेद येम? इंगा मनाम सनामंदी उंडी वगाटे रोट्या तेम्पी तिन्टाम, दिन कसोम शेंगेम उंडी पण मनाम वगाट उंडाम, येनटीक की मनाम आंदार वगाटे रोट्याक भागीदार उंडाम. इंगा येवार फुट्टीनगाला इस्रायली उंडार वारनी सुडांडा.येम पण वेदीमिंदा अर्पण शेस्तार आदी वार तीनीगास वेदीक भागीदार आयतार. तर नीन यम दानदी अर्थ येम उंडाद? मुर्तिक येक्पिचीने वस्तुद येमाना महत्व उंडाद येम? का आ मूर्तीद येमाना महत्व उंडाद? लेद, पण उलटा नाद आनेद अर्थ इल्ला उंडाद की, याद अर्पण द्यावार कसोम यहूदी लेनोर मंदी शेस्तार आदी अर्पण दैयालकी शेस्तार, द्यावारकी शेय्यार इंगा मीर दैयालकी भागीदार कावाला इल्ला नाक वाटायाद. मीर द्यावार इंगा दैयाम इल्ला रोंडू प्यालाल तागी शकायार. मीर प्रभुन मेज इंगा दैयामदी मेज इल्ला रोंडू इटलाक भागीदार आय्यी शकायार.5 मनाम प्रभुनकी कोफाम येका वस्ताम यम? मनाम द्यावारकाना सामर्थ्यशाली उंडाम येम?

आंताच द्यावार गौरव कसोम

“इंगा मी दिंटल्योन्टोर काही मंदी आंटार मिम येमी पण शेयदेंक स्वतंत्र उंडाम.” पण आन्नी माटलु मंदी कसोम हितकारक लेव. “दिंटल्योन्टोर काही मंदी आंटार मिम येमी पण शेयदेंक स्वतंत्र उंडाम.” पण आन्नी माटलु मंदीक सामर्थ्ययुक्त आयदेंक मदत शेय्याव. येवारुच स्वतादे फायदा सुडाराद तर इंगोगोरदी पण सुडाला. संताला याद नंजूर आम्मुतार विवेक बुद्धीता चौकशी शेय्यानदे आ नंजूर बद्दल यादुच प्रश्न आडगांदे तिनांडा. येनटीक की यल्ला पवित्रशास्त्र आंटाद, “पृथ्वी मिदुंडदी आंताच प्रभुनदी उंडाद.”6 अविश्वासी मंदी पैकी येव्वाराना मीमलान तीनदेंक फिलची इंगा मीक फोयेद उंटे तर विवेक बुद्धीता चौकशी शेय्यानदे यादुच प्रश्न आडगानदे मी मुंदार सदरीनेद आंता तीनांडा. पण जर येवाडाना मीक शप्पीर की, “इदी नंजूर मुर्ती कसोम अर्पण इच्चीनेद उंडाद,” तर विवेक बुद्धी कसोम इंगा या मनशी शेप्या वान कसोम तीनाकुंडा. इंगा यप्पुड नीन “विवेक” आंटान तर नाद आनेद अर्थ नीद विवेक लेद तर इंगोगोरदी इदी फक्त वगाट कारण उंडाद येनटीक की ना स्वतंत्र्यद इंगोगोर सदसदविवेक बुध्दीता न्याय येनटीक कावाला? जर नीन धन्यवाद शेशी रोट्या तीनटान तर नन्नु दोषी येनटीक ठराय मतुतार येनटीक की इ माटला कसोम तर नीनद्यावारकी धन्यवाद इस्तान. दिन कसोम मीर तीनना का तागना, इंगा येमाना शेस्ते आंताच द्यावार गौरव कसोम शेयंडा. यहुदी मंदी, यहूदी लेनोर मंदी इंगा द्यावार मंडळीलाक अडखळन आय्येद कारण कावाकुंडा. यल्ला नीन प्रत्येक बाबतीला आंदारनी संतुष्ट शेशेद प्रयत्न शेस्तान इंगा ना कसोम यम हितकारक उंडाद इदी शेय्यान पण इंगोगोर कसोम शेस्तान की शेंगेम मंदीद तारण कावाला.

Source notes (6)
  1. Cross-reference हे तम्मुडलु इंगा शेल्यांलु, नाक इल्ला वाटास्ताद की मिक इदी येरका उंडाला, मना आंदार पूर्वजलु मोडाम किंदा सुरक्षित उंडीर. वार आंदार तांबडा समुद्र दाटी फोईर. निर्गम 14:29.
  2. Cross-reference वार आंदार वक्काटे आत्मिक आन्नाम तीनीर. निर्गम 16:3.
  3. Cross-reference इंगा वार वक्काटे आत्मिक नेळ तागीर येनटीक की वार-वार यंका नडशे आत्मिक खडकनुस तागतुनीर इंगा आदी खडक ख्रिस्त उंड्या. निर्गम 17:6.
  4. Cross-reference यल्ला वार दिंटल्या काही मंदी शेशीर आल्ला व्यभिचार मनाम पण यप्पुडूच शेय्याराद. दानदी परिणाम इल्ला आय्या की, वगा नाळाला तेविस हजार मंदी सच्ची फोइर. गणना 25:1-9.
  5. Cross-reference मीर द्यावार इंगा दैयाम इल्ला रोंडू प्यालाल तागी शकायार. मीर प्रभुन मेज इंगा दैयामदी मेज इल्ला रोंडू इटलाक भागीदार आय्यी शकायार. मत्तय 6:24.
  6. Cross-reference येनटीक की यल्ला पवित्रशास्त्र आंटाद, “पृथ्वी मिदुंडदी आंताच प्रभुनदी उंडाद.” स्तोत्रसंहिता 24:1.

Waddar. Copyright © Bridge Connectivity Solutions Pvt. Ltd. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.