Zabuli 85

Kulanda kupegwa kahi kunoga kwa Nguluwi

(Kwa yalingwaluchiza kwimba. Zabuli ya Wakola.)

1Gwa Mkulu Nguluwi,

nakuipa kunoga kwa hegwe isi ya hegwe,

nakumhilulila kahi Yakobo utambichizo wa heye.

2Nakuigubika nongwa ya wanhu wa hegwe,

nakusa gehile ga hewo geng'ha.

3Nakulemeza kuzudila kwa hegwe kweng'ha,

nakuileka ng'halazi ya hegwe ing'ang'ale.

4Utuhiluse kahi, gwa Nguluwi mlohozi wa hetwe,

wuse kuzudila kouwelenako kwa hetwe.

5Ndaze, kotuzudila hetwe mbaka mazuwa gose?

Ndaze, kolutiliza ng'halazi ya hegwe kwa lulelo lweng'ha?

6Ndaze, hambe utuhilusile kahi ukomu unyale,

leka wanhu wa hegwe wasangalale kwa chiwalo cha hegwe?

7Utulajile igano lya hegwe lya kwimilila, gwa Mkulu Nguluwi,

utupe ulohozi wa hegwe.

8Ndohulichiza choyalingulonga Mkulu Nguluwi,

kwa vila kangulagana kuwapa wanhu wa heye kikala goya,

vitumagwa wa heye yuye wone woleka kuwila kahi upoka.

9Kukomya kowalohola walingumdumba

leka ukulu wa heye ulutilile kikala kuli isi ya hetwe.

10Igano lya kwimilila na kukundigwa vyoting'hana,

kutanganika na kikala goya vyochilamsa.

11Kukundigwa kozuchila kuli isi,

kutanganika kolola hasi kulawa kilanga.

12Mkulu Nguluwi kolavya chiwele chinojile,

isi ya hetwe yolavya mbena nyinji.

13Kutanganika komlongola Nguluwi

na kumuwichila goya nzila ya heye.