Zabuli 75

Nguluwi ka mtagusa

(Kwa yalingwaluchiza kwimba. Kwa kiwhana na “Uleche kuwifya.” Zabuli ya Asafu. Lwimbo.)

1Twangulonga malumbo, gwa Nguluwi,

twangulonga malumbo.

Twanguwikula ukulu wa itagwa lya hegwe

na kusimila mbuli za madito ga hegwe makulu.

2Nguluwi kangulonga, “Nambika mihela jondijihagule,

kuli mihela ajo ndotagusa kwa hachi chila mhela.

3Isi hoikakama na vyeng'ha viwele amo,

heni ndo ndilingwimiza misisi jake.

4Ndanguwalonjela wawele walingidaya,

‘Mleche kidaya,’

na wehile, ‘Mleche kwinula mbalati kota namsumya.

5Mleche kiwona kota mwa wanhu mtanganiche ng'hatu,

ne kulonga ulonzi wa kidaya.’ ”

6Kusumya hakulingulawa kolilawilaga isanya ne kolizinjilaga isanya,

ne kuchiwala ne kuli chidunda.

7Nguluwi yuye ndo mtagusa,

kangumdulisaga yumwe na kumkwiniza yunji.

8Mkulu Nguluwi kangibata chizombe mmoko,

chimemile divai ing'ang'ale ya ng'halazi ya heye, kanguijida.

Kukomya wehile weng'ha wanguinwa,

ena, wanguinwa mbaka kuduma.

9Ila heni ndowikula mazuwa gose,

ndomwimbila lutogo Nguluwi wa Yakobo.

10Kowifya ludali lweng'ha lwa wanhu wehile,

ila mong'ho wa watanganiche kowimiza nzinzili.