Zabuli 64

Kulanda kwamilwa na Nguluwi

(Kwa yalingwaluchiza kwimba. Zabuli ya Daudi.)

1Gwa Nguluwi, uhuliche kung'ung'uta kwa heni,

wamile ukomu wa heni na kukabusa kwa wang'honyo.

2Unyamile na majesa gehile ga wehile,

na ivuche lya wanhu wehile.

3Wangunola umyango wa hewo kota ipanga,

wangulavya ulonzi wihile kota misale.

4Kulawa kuli kivisa wangumtowa munhu yagoloche,

baho du wangumtowa ne kudumba.

5Wangilumba kuli kunuwila kwa hewo kwihile,

wangikundiza honhu ha kuvisa midiwa ja hewo,

wangulonga, “Kuduhu yoweza kujona.”

6Wangijesaga kunuwila kwa hewo kwihile na kulonga,

“Sambi natweneza gotuganile kudita ne kulemwela.”

Kunuwila kwihile kwa uviso nakuvisigwa mnhumbula mwa munhu.

7Ila Nguluwi kowatowa kwa misale,

na kuwalumiza baho du.

8Wodumigwa kwa chiwalo cha ulonzi wa hewo wawo,

chila hoyowona kotigasa mutwi kwa kubeza.

9Aho wanhu weng'ha wodumba,

wowikula goyaditile Nguluwi,

na kijesa kwa chiwalo cha madito ga heye.

10Watanganiche wosangalala kwa chiwalo cha Mkulu Nguluwi,

na kubilimila kikala goya kwa heye,

wanhu weng'ha wagoloche womtogola.