Zabuli 48

Siyoni muji wa Nguluwi

(Kwa yalingwaluchiza kwimba. Lwimbo. Zabuli ya Wakola.)

1Mkulu Nguluwi, ndo mkulu, kanguganigwa yatogoligwe ng'hatu

kuli muji wa heye, chiwele ndo chidunda cha heye chelile.

2Chidunda cha Siyoni ako kasikazini ndo kota chidunda cha Safoni,

changunojeza kwa ung'wemang'wema,

muji wa Mndewa mkulu, ndo kusangalala kwa isi zeng'ha.

3Nguluwi kangwamila ngome za muji awo,

ena, heye ndo ngome.

4Ulole, wandewa nawekungajiza,

nawaluta hamwe kuutowa,

5ila lowauwene muji wa Siyoni, nawabubuwala,

nawebatigwa na lunhwinhwi, nawabilima.

6Kudumba kukulu nakuwebata,

nawali na usungu kota wa mdala yalinguponda.

7Nakuwadumya kwa chivuluvumbi cha kolilawilaga isanya,

nachiwabenanga kota meli za Talishishi.

8Geng'ha gotuhuliche natugona twetwe baha,

kuli muji wa Mkulu Nguluwi Yawele na Mong'ho,

ena, kuli muji wa Nguluwi wa hetwe,

Nguluwi kowimiza nzinzili mazuwa gose.

9Gwa Nguluwi, twangijesa igano lya hegwe lya kwimilila,

tuwele kuli ng'handa ya hegwe.

10Itagwa lya hegwe, gwa Nguluwi lyangutogoligwa chila honhu,

lutogo lwa hegwe lwangwenela honeche muisi.

Kwa moko wa hegwe wa kudilo nakudita kwa hachi,

11leka wanhu wa Siyoni wasangalale.

Wanhu wa Yuda watowe luchenze,

kwa chiwalo cha utaguso wa hegwe.

12Mjende ako Siyoni muuzungulute muji weng'ha,

kuno muwaza milingo jake.

13Mlole ng'hanzi zake

na kupugajiza ngome za hewo,

leka msimile kuli lulelo lulinguya kota,

14“Ayu Nguluwi ndo Nguluwi wa hetwe mazuwa gose.

Kowa chilongozi wa hetwe mazuwa gose.”