Zabuli 42

Chitabu cha Keli

(Zabuli 42-72)

(Kwa yalingwaluchiza kwimba. Ilanguso lya Wakola.)

Kulanda kwa yabilimiswe kuli isi ya heye

1Kota ibala vyolilingugana mazi ga kazanda,

ndo vyondilingukugana, gwa Nguluwi.

2Ndina ng'halu ya Nguluwi, ng'halu ya Nguluwi yawele mkomu.

Ndofika hanili kwa heye na kukona kumeho kwa heye?

3Mahozi nagawa chilyo cha heni nemisi na nechilo,

lowandonjele chila zuwa,

“Kakohi Nguluwi wa hegwe?”

4Ndangukumbuka kahi mbuli azi kwa masinzo mnhumbula ya heni,

ndaze vyondutile na chilundo cha wanhu,

nandiwalongoza kuluta haluga ha Nguluwi,

wotowa luchenze lwa lutogo,

hali chilundo cha wanhu wodita mnvina.

5Lekachoni ndangutweguka nhumbula?

Lekachoni ndangusumajila ahyo mgati mwa heni?

Ndochitumbila kwa Nguluwi,

kwa vila ndomtogola kahi

heye yawele ulohozi wa heni na Nguluwi wa heni.

6Nanzungulutwa na masinzo mnhumbula mwa heni,

lelo ndangukukumbuchila hegwe, gwa Nguluwi,

kulawa kuli honhu ha Yolodani,

kulawa chidunda cha Helimoni na Misali.

7Nafikwa na mazi tendema,

mazi tendema ga hegwe ganguchema kubuguma,

nhigu na magazo ga hegwe,

vya mchanya mwa heni.

8Mkulu Nguluwi kongana heni kwa igano lya heye lya kwimilila nemisi,

nakamha heni lwimbo lwa lutogo nechilo,

lwimbo lwa kumlanda Nguluwi wa ukomu wa heni.

9Ndangumlonjela Nguluwi, italawe lya heni,

“Lekachoni nakusemwa heni?

Lekachoni ndute aku na ako ndilombocheza,

kwa kubunzwa na wang'honyo wa heni?”

10Mhondigwa kwa maligo ga hewo,

vyowombuza chila zuwa,

“Kakohi Nguluwi wa hegwe?”

11Lekachoni ndangutweguka nhumbula?

Lekachoni ndangusumajila ahyo mgati mwa heni?

Ndochitumbila kwa Nguluwi,

kwa vila ndomtogola kahi

heye yawele ulohozi wa heni na Nguluwi wa heni.