Zabuli 4

Kulanda utanzi

(Kwa yula yalingwaluchiza kwimba na vinhu vya ng'weso za muziki. Zabuli ya Daudi.)

1Gwa Nguluwi wa heni ulingundewela, ndangulanda unyidichile hondilanda.

Lombele kuli kugaya, hegwe nakunhanza,

umbonele isungu na kuhulichiza kulanda kwa heni.

2Mwela yoo, mowifya ukulu wa heni kwa soni mbaka nili?

Ndaze, mogana upoka na uhadi mbaka nili?

3Ila mvizele kota Mkulu Nguluwi nakehagulila munhu wa heye yalingumhulichiza mazuwa gose.

Mkulu Nguluwi kanguhulichizaga hondimchema.

4Mdumbe na mleche kudita gehile,

mijese ng'hatu kuli vinhanda vya hemwe na minyamalile.

5Mlavye nhambiko za hachi,

na kitumbila kwa Mkulu Nguluwi.

6Wanhu wenji wangulongaga, “Whaani yalinguweza kutulajila ganojile?”

Gwa Mkulu Nguluwi, utulole kwa isungu.

7Ila nakumha heni kusangalala kukulu mnhumbula,

kusinda hewo wawele na divai na nyhule kwa winji.

8Ndanguwasaga na kuwa na usinjizi kwa kikala goya,

kwa vila gwa Mkulu Nguluwi, hegwe uliyeka kwangumbika honhu hanojile.