Zabuli 2

Mndewa yahaguligwe na Nguluwi

1Lekachoni wanhu wa isi wangubelenhuka?

Lekachoni wanhu wangiwika goya kwa uviso kwa mbuli za hihi hela?

2Wandewa wa isi wangiwika goya,

na wakulu wangikungajiza hamwe

kwa chiwalo cha kihanza majesa ga kumlema Mkulu Nguluwi na yabakalizwe mafuta wa heye.

3Wandewa awo wangulonga, “Tiwuse kuli ulongozi wa hewo,

tutoze kutali minyololo ja hewo.”

4Yula yalingulongoza kilanga kanguwaseka,

Nguluwi kanguwabeza.

5Hamba kanguwang'hanuchila kwa ng'halazi ya heye,

na kuwadumbiza kwa kuzudila kwa heye, yolonga,

6“Nani nandimuwika mndewa wa heni, mchanya mwa Siyoni,

chidunda cha heni chelile.”

7Ndowikula mzilo wa Mkulu Nguluwi,

“Hegwe ndo mwanangu,

heni lehano nandiwa mhaza wa hegwe.

8Undande, nani ndokupa wanhu wa isi wawe uhalizi wa hegwe,

na mbaka ja isi jowa ja hegwe.

9Kowatowa kwa ng'hweku ya chuma,

na kuwabena kota chijilo.”

10Lelo hemwe wandewa, muwe na luhala,

hemwe wakulu wa isi, mwangukanyigwa.

11Mumkolele mijito Mkulu Nguluwi kwa kudumba na kusangalala.

12Mumfugamile na kukakama,

leka yaleche kuzudila na kuwadumya baho du,

kwa vila heye kanguzudilaga himahima.

Wangutambichizwa weng'ha walingubilimila kikala goya kwa heye.