Zabuli 147

Inoga kumtogola Nguluwi

1Mumtogole Mkulu Nguluwi.

Ndaze vyoiwele goya kumwimbila lutogo Nguluwi wa hetwe.

Heye ka yanojile na kanguganigwa kwimbilwa lutogo.

2Mkulu Nguluwi kanguuzenga kahi muji wa Yelusalemu,

kanguwahilula Waisilaeli wawele kuli ujenzi.

3Kanguwatanza watweguche nhumbula,

na kuwopa vilonda vya hewo.

4Kangwamula hisabu ya nhondwe,

na kuzigalila zeng'ha matagwa gake.

5Mkulu wa hetwe ka mkulu, kana mong'ho ng'hatu,

luhala lwa heye lwahela chipimilo.

6Mkulu Nguluwi kanguwakwinizaga wala walingunyenyetela,

ila kanguwatozaga wehile, wagwe kuli nhimbwisi.

7Mumwimbile Mkulu Nguluwi nzimbo za kulonga malumbo,

mumtowele ching'weleng'wele Nguluwi wa hetwe.

8Kangugubikaga ulanga kwa ng'hungugu,

kanguigalilaga isi nhonya,

na koteza misolo kuli vidunda.

9Kangujigalilaga migongolo chilyo chawo

na mibofu ja mibondwa hojilila.

10Hambe yagane mong'ho wa falasi

na hambe yanojezwe na uzidahe wa wamizi,

11ila Mkulu Nguluwi kangunojezwaga na walingumdumba,

wanhu walingitumbila igano lya kwimilila lya heye.

12Umtogole Mkulu Nguluwi, gwa Yelusalemu.

Umtogole Nguluwi wa hegwe, gwa Siyoni.

13Kwa vila kanguwikaga nzinzili lwizi lwa hegwe,

kanguwatambichizaga wanhu wawele mgati mwa hegwe.

14Kangwamilaga mbaka ja hegwe,

kangukugutizaga kwa mhau inojile.

15Kanguhilikaga mzilo wa heye muisi,

na ulonzi wa heye wangwenezwaga himahima.

16Kangwanzanza seluji kota igolole lya sufu,

kangusambalulaga nungwi kota mivu.

17Kangigalaga nhonya ya maganga kota maganga madodo.

Whaani yoweza kwimilila kung'ang'ala kwa chipute cha heye?

18Hamba kangulavyaga ulonzi, leka seluji ayo isungulumuche,

kangigalaga mbeho ya heye, nayo yanguchililikaga.

19Kanguwikulaga usenga wa heye kwa walelwa wa Yakobo,

mizilo ja heye na nhaguso zake kwa Isilaeli.

20Ila haditile ahyo kwa wanhu wa isi zinji,

wanhu wanji hawagazelele malajizo ga heye.

Mumtogole Mkulu Nguluwi.