Zabuli 140

Kulanda kwamilwa na Nguluwi

(Kwa yalingwaluchiza kwimba. Zabuli ya Daudi.)

1Gwa Mkulu Nguluwi, undohole kulawa kwa wanhu wehile,

unyamile na wanhu walingugana kundumiza.

2Wanhu awo wangiwika goya mnhumbula za hewo kudita gehile,

wangwambuza kilewa chila mhela.

3Myango zawo ziha kota za izoka,

kuli milomo jawo muna ulonzi uwele na dunga kota ya izoka.

4Gwa Mkulu Nguluwi, unyamile na ndole za wehile,

unyamile na wanhu walingugana kundumiza,

wawele wewichile goya kungwisa.

5Walingidaya nawambichila midiwa,

nawalambalika ng'weso kota utandawala,

nawavisa midiwa mnzila leka wandibate.

6Ndangumlonjela Mkulu Nguluwi, “Hegwe ndo Nguluwi wa heni.”

Gwa Mkulu Nguluwi, uhulichize lizi lya kulanda kwa heni kwa isungu.

7Gwa Mkulu Nguluwi, Mkulu wa heni, mlohozi wa heni yawele na mong'ho,

nakunyamila goya mhela wa ngondo.

8Gwa Mkulu Nguluwi, uleche kuwapa wehile gowalingugana,

na kiwika goya kwa hewo kwihile kuleche kulutilila goya,

ama wokwinula vitwi vya hewo.

9Wihe wa ulonzi wa hewo uwafiche hewo wawo.

10Makala ga chiluli gawagwile,

watozwe kuli chiluli,

wenjizwe kuli ikulubila, waleche kwinuka kahi.

11Mbuli za walinguwaheha wanji zileche kulutilila goya kuli isi,

wihe uwawinge na kuwadumya wala walingugana kundumiza.

12Ndivizela Mkulu Nguluwi kangulewelaga mbuli za wanhu walingubunzwa,

na kuwapa hachi wazunwa.

13Ndikomya, watanganiche wolitogola itagwa lya hegwe,

wagoloche nhumbula wochikala hali hegwe.