Zabuli 137

Kulombocheza kwa Waisilaeli kuli ujenzi

1Hafungo ha nzanda za Babuloni, natikalisa

natwali tulila vyotukumbuchile Siyoni.

2Kuli migodi ja isi yila,

natupatika migombogombo ja hetwe.

3Watuholile tuwe wapogozi wa ngondo nawagana tuwembile,

walingutugaza nawatugana tuwasangalaze,

“Mtwimbile lwimbo lumwe hali nzimbo za Siyoni.”

4Toweza ndaze kwimba lwimbo lwa Mkulu Nguluwi,

kuli isi ya chijenzi?

5Gwa Yelusalemu, wone ndikusemwe,

moko wa heni wa kudilo usemwe uwanzi wa kutowa igombogombo.

6Umyango wa heni unanahile na kulemwela kwimba,

wone sikukumbuchile hegwe, gwa Yelusalemu,

ena, wone ndogana choneche kusinda kusangalala kwa Yelusalemu.

7Gwa Mkulu Nguluwi, uleche kusemwa gowaditile Waedomu,

zuwa lila Yelusalemu vyoiholigwe kuli upogozi,

ukumbuchile gowalonjile,

“Mbomole muji wa Yelusalemu.

Mng'humbule misisi jake.”

8Gwa Babuloni, kodumigwa.

Kotambichizwa yula yawele yokuhilusila chibida kwa gehile goutuditile,

9yula yowahola wana wa hegwe,

na kuwahondanga kuli mitalawe.