Zabuli 115

Nguluwi yumwe wa kukomya

1Hatuwele hetwe, gwa Mkulu Nguluwi, hatuwele hetwe,

ila hegwe uliyeka utogoligwe,

kwa chiwalo cha igano lya kwimilila lya hegwe na kukundigwa kwa hegwe.

2Lekachoni wanhu wa isi walonje,

“Kakohi Nguluwi wa hemwe?”

3Nguluwi wa hetwe ka kilanga,

heye kanguditaga geng'ha yalingugana.

4Jimalukolo ja hewo ndo sendi na zahabu,

najigongomanyigwa kwa moko ga wanhu.

5Jina milomo, ila hajilingulonga,

jina meho, ila hajilingona.

6Jina makutu, ila hajilinguhulika,

jina mhenyelo ila, hajilingunusa.

7Jina moko, ila hajilingwabasa.

Jina magulu, ila hajilingujenda.

Hajiweza hebu kulavya lizi.

8Weng'ha walingujigongomanya wochiwhana najo,

hihyo du na weng'ha walingujitumbila.

9Hemwe Waisilaeli mchitumbile kwa Mkulu Nguluwi,

heye ndo utanzi na ngawo ya hemwe.

10Hemwe walelwa wa Aluni, watambika, mchitumbile kwa Mkulu Nguluwi,

heye ndo utanzi wa hemwe na ngawo ya hemwe.

11Hemwe mlingumdumba Mkulu Nguluwi, mchitumbile kwa heye,

heye ndo utanzi wa hemwe na ngawo ya hemwe.

12Mkulu Nguluwi kangutukumbuchila na kotutambichiza,

kowatambichiza wanhu wa Isilaeli,

kowatambichiza walelwa wa Aluni.

13Kowatambichiza weng'ha walingumdumba Mkulu Nguluwi,

kowatambichiza wakulu na wadodo.

14Mkulu Nguluwi yawatambichize leka monjezeche,

yawatambichize monjezeche hemwe na walelwa wa hemwe.

15Mtambichizwe na Mkulu Nguluwi,

yavilumbile ulanga na isi.

16Ulanga uwele kuchanya ng'hatu ndo wa heye Mkulu Nguluwi,

ila isi nakawapa wanhu.

17Wabagame hambe wamtogole Mkulu Nguluwi,

ne wala walingudulika kuli isi iwele tulu.

18Ila hetwe tuwele wakomu twangumtogola Mkulu Nguluwi,

tomtogola sambi mbaka mazuwa gose.

Mumtogole Mkulu Nguluwi.