Zabuli 110

Kuwichigwa kwa mndewa na mtambika yahaguligwe

(Zabuli ya Daudi.)

1Mkulu Nguluwi kangumlonjela Mkulu wa heni,

“Wikalise ubanzi wa kudilo kwa heni,

mbaka ndiwawiche wang'honyo wa hegwe hasi ha magulu ga hegwe.”

2Mkulu Nguluwi koweneza undewa wa hegwe kulawa Siyoni,

hegwe kolongoza mchanya mwa wang'honyo wa hegwe weng'ha.

3Wanhu wa hegwe wokuyila kwa kunuwila,

zuwa lyouluta kuwatowa wang'honyo.

Mchanya mwa vidunda vyelile wokuyila wasongolo wa hegwe,

kota nungwi ilingulawa lufuku ng'hatu.

4Mkulu Nguluwi nakelaha, hogalula kunuwila kwa heye,

“Hegwe ndo mtambika mazuwa gose kwa kuwinza utambika wa Melekisedeki.”

5Mkulu ka ubanzi wa hegwe wa kudilo,

kowahonda wandewa hoyozudila.

6Kowatagusa na kuwakopola wanhu wenji wa isi zinji,

kowahonda vilongozi chila honhu muisi.

7Mndewa konwa mazi ga mnzila,

naye kokwinula mutwi kuchanya kwa kusumya.