Yoshua 15

Honhu howapegwe wanhu wa Yuda

1Wanhu wa nhanzi ya Yuda nawapegwa honhu ha isi kota vyoziwele ng'holo za hewo, nahenela kulawa ubanzi wa kusini wobakana na Edomu. Honhu ha kusini ng'hatu nakwali kuchiwala kuchemigwa Sini. 2Mbaka wa hewo ubanzi wa kusini nawaluchila ubanzi wa kusini mwa Bahali ya Mwino, 3naulutilila kusini mbaka kuli chidunda cha Akilabimu, naukolela hafungo ha Sini na kusini ya Kadeshi-balineya, ukolela Hesiloni mbaka Adali na kulawila aho nauhinduka kuluta Kalika. 4Kulawa aho naukolela habehi na Asimoni na kuwinza chikolola kuli mbaka wa Misili, kuza kuli bahali ya Mediteleniyani. Aho ndo houkolile mbaka wa kusini. 5Mbaka wa hewo wa ubanzi wa kolilawilaga isanya ndo Bahali ya Mwino kuza hala hali lwanda lwa Yolodani lulingwinjilila kuli bahali. Mbaka wa hewo ubanzi wa kasikazini naukola kulawa ubanzi wa Bahali ya Mwino honhu hawele lwanda lwa Yolodani lulingwinjilila mbahali. 6Mbaka awo naukola Beti-hogila na kasikazini mwa Beti-alaba mbaka kuwele na iganga lya Bohani mwana wa Lubeni. 7Hamba naulutilila mbaka Debili kulawa ibindi lya Akoli nauhinduka kasikazini kuza Giligali, uwele habehi na chidunda cha Adumimu, uwele kusini mwa chikolola. Aho nauluta kuli nzasa ya Eni-shemeshi na kumalila Eni-logeli. 8Kulawila aho, mbaka awo naukolela kuli ibindi lya Hinomu, ubanzi wa kusini mwa chidunda cha Wayebusi, iwele ndo Yelusalemu, kuluta kuli chinhembenhembe mwa chidunda chiwele kolizinjilaga isanya mwa ibindi lya Hinomu na kumalila ubanzi wa kasikazini kuli ibindi lya Lefaimu. 9Kulawila aho, nauluta kuli chidunda mbaka kuli nzasa za Nefitoa, mbaka kuli miji ja chidunda cha Efuloni. Hamba nauhinduka na kuluta Baala, iwele ndo Kiliati-yealimu. 10Hamba mbaka nauzunguluta kulawa Baala kulutila ubanzi wa kolizinjilaga isanya mbaka kuli chidunda cha Seili, naulutilila mbaka kuli ubanzi wa chidunda cha Yealimu ubanzi wa kasikazini, awo ndo Kesaloni, hamba naudulichila kuli Beti-shemeshi na kulutila habehi na Timuna. 11Kulawila aho naulutilila ubanzi wa kasikazini mwa Ekiloni, na kuzunguluta kuluta Shikeloni kuwele naukola habehi na chidunda cha Baala mbaka Yabineeli na kudumila kuli bahali ya Mediteleniyani. 12Mbaka wa kolizinjilaga isanya nawali bahali ya Mediteleniyani. Hino ndo vyouwele mbaka wa honhu howapegwe wanhu wa nhanzi ya Yuda kota vyoziwele ng'holo za hewo.

Wanhu wa Kalebu wangikala honhu ha Hebuloni

13Kalebu mwana wa Yefune, nakapegwa honhu ha isi ya Yuda kota Mkulu Nguluwi vyoyamlajize Yoshua. Nakapegwa Kiliati-aliba iwele ndo Hebuloni. Aliba nayali mhaza wa Anaki. 14Kalebu nakaziwinga ng'holo zidatu za Anaki kulawa muji awo, ziwele ndo ng'holo za Sheshayi na Ahimani na Talimayi. 15Kulawa Hebuloni nakaluta kuwatowa wanhu wa Debili na muji uwele aho hamwande nawali uchemigwa Kiliati-sefeli. 16Kalebu nakalonga kota komuheseza mwanage Akisa kwa mlume yoneche youboka muji wa Kiliati-sefeli. 17Lelo Otinieli, mwana wa Kenasi, mng'holoze Kalebu, nakauboka muji awo. Kalebu nakamuheseza mwanage Akisa. 18Zuwa limwe Akisa nakamlonjela Otinieli yamlande Kalebu mgunda. Akisa nayali yakwinile idogowi, navyoyawele yodulika kuli idogowi lya heye, Kalebu nakamuuza, “Kwangugana ndikupe choni?” 19Akisa nakamlonjela, “Umhe utambichizo wa honhu hawele na nzasa kwa vila ako Negebu koumhele kukala.” Lelo Kalebu nakamha nzasa za mazi ziwele kuli isi za kuchanya na za hasi.

20Awu ndo uhalizi wa isi wowapegwe wanhu wa nhanzi ya Yuda, kota vyoziwele ng'holo za hewo. 21Miji jiwele ubanzi wa kusini ng'hatu mwa isi ya Yuda kuluta kuli mbaka wa Edomu, nayali Kabiseeli na Edeli na Yaguli 22na Kina na Dimona na Adada 23na Kedeshi na Hasoli na Itinani 24na Sifu na Telemu na Bealoti 25na Hasoli-hadata na Kelioti-hesiloni, mina Hasoli 26na Amamu na Shema na Molada 27na Hasali-gada na Heshimoni na Beti-peleti 28na Hasali-shuali na Beeli-sheba na Bisiotiya 29na Baala na Iyimu na Esemu 30na Elitoladi na Kesili na Holima 31na Sikilagi na Madimana na Sanisana 32na Lebaoti na Shilihimu na Aini na Limoni. Miji jeng'ha jowapegwe najali makumi meli na tisa hamwe na vijiji vyake.

33Miji jiwele hali ibalalika, najali Eshitaoli na Sola na Ashina 34na Sanowa na Eni-ganimu na Tapua na Enamu 35na Yalimuti na Adulamu na Soko na Aseka 36na Shaalaimu na Aditaimu na Gedela na Gedelotaimu. Miji jeng'ha jowapegwe najali kumi na jine hamwe na vijiji vyake.

37Nawapegwa kahi na muji wa Senani na Hadasha na Migidali-gadi 38na Dileani na Misipa na Yokiteeli 39na Lakishi na Bosikati na Eguloni 40na Kaboni na Lahamasi na Kitilishi 41na Gedeloti na Beti-dagoni na Naama na Makeda. Miji jeng'ha jowapegwe, najali kumi na sita hamwe na vijiji vyake. 42Kahi nawapegwa miji ja Libuna na Eteli na Ashani 43na Yifita na Ashina na Nesibu 44na Keila na Akisibu na Malesha. Miji jeng'ha jowapegwe, najali tisa hamwe na vijiji vyake. 45Vivila nawapegwa Ekiloni hamwe na miji jake midodo na vijiji, 46miji jeng'ha na vijiji viwele habehi na Ashidodi kulawa Ekiloni mbaka bahali ya Mediteleniyani. 47Kahi hana Ashidodi na Gasa hamwe na miji na vijiji vyake, mbaka kuli chikolola cha Misili mbaka hafungo ha bahali ya Mediteleniyani.

48Miji jiwele kuli isi ya vidunda ndo Shamili na Yatili na Soko 49na Dana na Kiliati-sana, mina Debili, 50na Anabu na Eshitemoa na Animu 51na Gosheni na Holoni na Gilo. Miji jeng'ha jowapegwe, najali kumi na imwe na vijiji vyake. 52Nawapegwa kahi miji ja Alabu na Duma na Eshani 53na Yanumi na Beti-tapua na Afeka 54na Humuta na Kiliati-aliba, mina Hebuloni na Sioli. Miji jeng'ha jowapegwe, najali tisa hamwe na vijiji vyake. 55Kahi nawapegwa miji ja Maoni na Kalimeli na Sifu na Yuta 56na Yesileeli na Yokideamu na Sanowa 57na Kaini na Gibeya na Timuna. Miji jeng'ha jowapegwe, najali kumi hamwe na vijiji vyake. 58Vivila nawapegwa miji ja Halihuli na Beti-suli na Gedoli 59na Maalati na Beti-anoti na Elitekoni. Miji jeng'ha jowapegwe, najali sita hamwe na vijiji vyake. 60Kahi nawapegwa Kiliati-baali, muji ulinguchemigwa kahi Kiliati-yealimu, na Laba. Miji jeng'ha jowapegwe, najali mili hamwe na vijiji vyake.

61Miji ja kuchiwala najali Beti-alaba na Midini na Sekaka 62na Nibishali na Muji wa Mwino na En-gedi. Miji jeng'ha jowapegwe najali sita hamwe na vijiji vyake.

63Ila wanhu wa Yuda hawawezile kuwawinga Wayebusi, wawele ndo wenyeng'haye wa Yelusalemu. Ila mbaka lehano Wayebusi wang'hali wochikala hali muji awo hamwe na wanhu wa Yuda.