Yona 3

Wanhu wa Ninawi wanguleka gehile ga hewo

1Ulonzi wa Mkulu Nguluwi naumuyila Yona lwa keli, naulonga, 2“Ulute Ninawi muji wula ukulu leka uwadamlile wanhu usenga wondikupa.” 3Lelo Yona nakamhulichiza Mkulu Nguluwi, nakaluta Ninawi kota Mkulu Nguluwi vyoyamlajize. Muji wa Ninawi nawali ukulu. Yona nayali kuli muji awo wa Ninawi kwa mazuwa gadatu. 4Yona loyafichile Ninawi, nakajenda kwa zuwa limwe, hamba nakaluka kudamla, “Nagapona mazuwa makumi gane hela, muji wa Ninawi wodumigwa!” 5Lelo wanhu wa Ninawi nawaukunda usenga wa Nguluwi, nawawikula kwesela kulya, wanhu weng'ha kwaluchila mkulu ng'hatu mbaka mdodo lukami. Nawavala mivalo ja migunila kota ulajilo wa kulombocheza kuleka gehile ga hewo.

6Mbuli azi nazimfichila mndewa wa Ninawi, naye nakoka kuli chigoda cha heye, nakavula ivalo lya heye na kuvala ivalo lya igunila na kikalisa kuli mivu. 7Hamba mndewa nakawawikulila wenyeng'haye wa Ninawi yolonga, “Heni mndewa hamwe na wakulu wa heni, ndangulavya mzilo awu, mleche kukunda munhu yoneche ne isenga ne igongolo lyoneche lya kufujigwa, yajeze kulya chinhu choneche. Mlongo kwa munhu yoneche ama igongolo kulya ne kunwa. 8Wanhu weng'ha na migongolo wavale mivalo ja migunila, chila munhu yamlande Nguluwi na kumdedeza kwa nhumbula. Chila munhu yaleche gehile ga heye na wihe wa heye. 9Hanji Nguluwi kogalula kunuwila kwa heye, koleka kutuzudila leka tuleche kudumigwa.”

10Nguluwi vyoyawene ndaze vyowaditile wanhu na kuleka wihe wa hewo, nakagalula kunuwila kwa heye, nakaleka kuwadumya.