Amosi 6

Utaguso kwa chiwalo cha kidaya

1Mochona hemwe mlingwesela ako Siyoni,

namwe mlingiwona kota mwa kuli kikala goya kuli chidunda cha Samaliya!

Mwangijesa kota ndo vilongozi wa wanhu wa isi ilinguzeleka,

wawele Waisilaeli weng'ha wangitumbila kwa hemwe.

2Ena! Mlute Kaline mkalole chila honhu,

mlawe ako mlute mbaka muji wula ukulu wa Hamati,

hamba mduliche mbaka Gati kwa Wafilisti.

Ndaze, ulongozi wa hewo hauwele unojile kusinda wa hemwe

na honhu ha hewo hakuwele kunojile kusinda ha hemwe?

3Mwangujeza kuliwinga zuwa lihile,

ila madito ga hemwe ganguligala habehi.

4Mochona hemwe mlinguwasa hali vinhanda vya mbalati za itembo

na kigolola hali vigoda vinojile,

kuno mulya miwunde ja ming'holo myana na ilogota!

5Mwangugana kwimba kwa lizi lya ving'weleng'wele

na kijesa kugongomanya vinhu vinyale vya muzichi na kudita kota Daudi.

6Mwangunwa divai kwa visaye,

na kibakaliza mafuta ganojile ng'hatu.

Ila hamlingijesa ne hado

kuwala kudumigwa kwa walelwa wa Yusufu, wawele ndo Waisilaeli.

7Ahyo mowa wa mwaluko kuhilikwa kuli isi ya chijenzi,

na mnvina za wagata zowa haduhu.

8Mkulu Nguluwi nakelaha kwa nhumbula ya heye,

Mkulu Nguluwi Yawele na Mong'ho kangulonga,

“Ndanguzudizwa ng'hatu na kidaya kwa walelwa wa Yakobo,

kahi ndanguzizudila ngome za hewo zinojile.

Muji wa hewo na vyeng'ha viwele amo ndowapa wang'honyo wa hewo.”

9Wone wosigala wanhu kumi kuli ng'handa imwe kwa kikala goya, wobagama. 10Hoyokuya mng'holoze yula yabagame leka yalavye itufi leka yalilakaze, yomuuza yoneche yawele mng'handa, hafungo mwa ng'handa, “Ndaze, hana munhu yoneche amu?” Naye komwidichila, “Hebu! Kuduhu!” Naye komwidichila, “Unyamalile! Tuleche kulonga ne itagwa lya Mkulu Nguluwi.”

11Lole! Mkulu Nguluwi kangulavya mzilo,

ng'handa ng'hulu yogwa na kubeneka vihande vihande

na ng'handa ndodo yobalaswa.

12Ndaze, falasi woweza kubilima kuli mhalika ndodo?

Ndaze, wanhu wangulima kuli bahali kwa mibuguma?

Ila, hemwe namuigalula hachi kuwa dunga,

na kutanganika kuwa usungu.

13Hemwe mlingusangalala kwa kulemwela kwa Lo-debali1,

na kulonga namuuhola muji wa Kalinaimu2 kwa mong'ho wa hemwe,

14Mkulu Nguluwi Yawele na Mong'ho kangulonga hino,

“Hemwe Waisilaeli,

ndikomya, ndowegala wanhu wa isi imwe woye kuwatowa hemwe,

nawo wowagaza hemwe kulawa Lebo-hamati kasikazini,

mbaka kuli chikolola cha Alaba, ubanzi wa kusini.”