Waloma

Baluwa ya Paoli kwa wanhu wa

Loma

Chilongole

Chitabu cha Waloma hanji nachandichigwa na mtumigwa Paoli mhela wa makumi gahano na zine na mhela wa makumi gahano na nane loyavumbuche Yesu. Mbaka aho, Paoli nayang'halifika Loma, ila nakahilika baluwa kuwalajiza wanhu walingumkunda Kilistu ako Loma, weng'ha wawele Wayahudi na hawawele Wayahudi. Nakandika baluwa ayi yawele kuli muji wa Kolinto koyawele yochikala mhela awo. Paoli nakandika baluwa ayi yogana wanhu wa isi zeng'ha wamkunde na kumhulichiza Yesu Kilistu (Waloma 16:26).

Chitabu cha Waloma ndo chitanganiche kwa wanhu walingumkunda Kilistu chila honhu na chila mhela, kwa vila ndaze Paoli vyonayaliyotang'hula goya na hazelu kuwala ulohozi uwele wokuya kwa kukolela Yesu Kilistu. Paoli kahi nakalonga honhu hanji kwa kuwhaniza Ilagano lya Katali na Mbuli Inojile ya Yesu Kilistu. Wasomile wenji wa mbuli ya Bibiliya wangukunda kota msitali utanganiche kuli chitabu achi ndo sula ya 1:16 ulingulonga, “Hambe ndiyonele soni Mbuli Inojile, kwa vila ina ludali lwa Nguluwi lulingigala ulohozi, kwa chila munhu yalingukunda, mwaluko kwa Wayahudi na hamba kwa Myunani.” Honhu ha mwaluko ha chitabu cha Waloma (Waloma 1-11), ndo hawele honhu halingulangusa ng'hatu mbuli ya Nguluwi na honhu ha keli ha chitabu achi (Waloma 12-15) hana ulonzi ulinguwala madito ama kikala kwa Kikilistu kwa madito kuli ukomu wa heye.

Gali mgati

1. Paoli kangwaluka baluwa kwa kizelesa yuye na kulonga whaani yalinguwandichila (Waloma 1:1-15).

2. Hamba kangwandika mbuli ya chiwunhu hela na wula ulohozi ulinguya kwa kukolela kwa Yesu Kilistu (Waloma 1:16-11:36).

3. Kumala kwa aga Paoli kangulavya malajizo menji kwa madito kwa chiwalo cha kikala kwa wanhu walingumkunda Yesu Kilistu (Waloma 12:1-15:13).

4. Paoli kangusinda kwandika baluwa kwa Waloma kwa kulavya ulamso kwa wanhu wawele mli chilundo cha wanhu walingumkunda Kilistu ako Loma (Waloma 16).