Wafilipi

Baluwa ya Paoli kwa wanhu wa

Filipi

Chilongole

Paoli nakandika baluwa kwa wanhu walingumkunda Kilistu kwa Wafilipi kuli mhela wa miyaka makumi sita na imwe (61) kulawa loyapondigwe Yesu, mhela awo Paoli nayali mchinweng'ho, yangukundigwa kota mhela awo nayali Loma. Baluwa ayi nayandichigwa kwa wanhu walingumkunda Kilistu ako kuli muji wa Filipi. Tochilangusa hado kwa chiwalo cha Filipi kulawa kuli chitabu cha Madito ga Watumigwa. Filipi nawali muji ukulu ako kuli honhu hawele nahachemigwa Makedoniya. Kahi nakwali na chilundo cha mwaluko cha wanhu walingumkunda Kilistu ako Makedoniya. Paoli na Sila nawali wa mwaluko kwaluchiza chilundo acho cha wanhu walingumkunda Kilistu lowawele hamwe, kahi nawawichigwa mchinweng'ho kwa nechilo imwe lowawele kuli muji awo (Madito 16).

Paoli nayali na mbuli nyinji ziwele nazimdita yandiche baluwa ayi. Nakatumiya baluwa ayi kota honhu ha kulonga malumbo kwa chilundo cha wanhu walingumkunda Kilistu kwa ndolendole zowampele hala lowahuliche kota nakawichigwa mchinweng'ho (Wafilipi 4:10-19). Kahi nakawazelesa vila vyoyolutilila kula mchinweng'ho kahi nakatumiya baluwa ayi kuwazelesa Timoteyi na Epafulodito kuli chila chilundo cha wanhu walingumkunda Kilistu (Wafilipi 2:19-30), leka waweze kuwabochela na kuhulichiza ulongozi wa hewo.

Gali mgati

1. Paoli kangwaluka kwandika baluwa kwa kuchilamsa chilundo cha wanhu walingumkunda Kilistu kula Filipi (Wafilipi 1:1-2).

2. Hamba kanguwalonjela mbuli zimwenga ziwele nakazona kota zangumtunya (Wafilipi 1:3-2:30).

3. Hamba nakawalonjela mbuli nyinji za kuwinza kuli kikala kwa kumkunda Kilistu kwa madito (Wafilipi 3:1-4:9).

4. Kuduma, Paoli kangulonga malumbo kwa chilundo cha wanhu walingumkunda Kilistu cha ako Filipi kwa ndolendole zowampele na kanguwalamsa (Wafilipi 4:10-23).