Yuda

Baluwa ya

Yuda

Chilongole

Baluwa ya Yuda iwhana na itagwa lya yandiche. Yuda kangizelesa yuye kota ka mng'holoze Yakubu, mng'holoze Yesu. Ahyo, ayu Yuda kahi kangukundigwa kota mng'holoze Yesu (Yuda 1). Hatuvizelele kota baluwa ayi nayandichigwa kwa chilundo cha wanhu walingumkunda Kilistu ama kota vyoilingulonjigwa mli Ilagano lya Katali yangoneka wasomile baluwa ya Yuda wenji nawali Wayahudi. Heye nakandika baluwa ayi kwa, “Weng'ha wachemigwe na Nguluwi na waganigwe na Nguluwi Mhaza na kuwichigwa goya kwa chiwalo cha Yesu Kilistu.”

Baluwa ayi nayandichigwa kuli mhela wa makumi sita (60) Yesu loyavumbuche. Chiwalo cha kwandika baluwa kwa weng'ha walingumkunda Kilistu ndo kuwakanya hewo kuli kulongozwa vibi na walangusa wa udesi (Yuda 4). Nakalavya honhu halingiwhana kuli usenga na madito nagalawile mli Ilagano lya Katali na kikangaza kuli kitwanza. Baluwa yangiwhana na kumema ulonzi uwele mli baluwa ya 2 Petili, imemile makanyo galinguwala walangusa wa udesi (Yuda 4 na 2 Petili 2:1). Vivyo du na ukumbuso wanguwawala wahilisi na miji ja Sodoma na Gomola.

Gali mgati

1. Yuda tandi kanguwalamsa walingusoma (Yuda 1:1-2).

2. Hamba, kangulonga chiwalo cha kwandika na kuwakanya kiyusa na walangusa wa udesi (Yuda 1:3-4).

3. Hamba kanguwakanya wala walingusoma kukolela mbuli ziwalawile wanhu kuli Ilagano lya Katali (Yuda 1:5-16).

4. Hamba kanguwalonjela hewo choni chowedichile kuli gala yawakanyile (Yuda 1:17-23).

5. Hamba kangugongomanya baluwa ya heye kwa kumtogola Nguluwi (Yuda 1:24-25).