Ayubu

Ayubu

Chilongole

Chitabu cha Ayubu changusimila mbuli za munhu yawele nayali yomdumba Nguluwi yawele nakafichigwa na magazo makulu, ila munhu ayo haditile gehile kwa kumlonjeleza Nguluwi (Ayubu 1:22). Haduhu yoneche yalinguvizela whaani yawele nakandika chitabu cha Ayubu ama nachandichigwa kuli mhela wachi, ila yoweza kuwa Ayubu nakekala kuli mhela wa wasekulu kota Abulahamu, kwa vila Ayubu nakekala kwa mhela winji, uwele ndo miyaka miya imwe na makumi gane (140). Wasomile hawalingijesa kota Ayubu yuye ndo yawele nakandika chitabu achi. Yalingwandika yunji yawele halinguzeleka nakejesa kota inoga kuwasimila wanji mbuli ayi, ahyo nakandika mbuli ayi.

Chitabu cha Ayubu changuwala magazo. Limazoga nalikundizwa kumjeza Ayubu kwa magazo kwa vila nalijesa kota magazo ago gomdita Ayubu yaleche kumfugamila Nguluwi (Ayubu 1:12). Honhu hakulu ha chitabu achi hangusimila kuwala kulongasa koyawele nako Ayubu na goloko wa heye kuwala chiwalo cha kugazika kwa heye. Goloko wa Ayubu nawali wochijesa kota Ayubu nayali yogazika kwa chiwalo cha gehile goyaditile, ila Ayubu nayali yovizela kota nayali yalihela nongwa. Hamba, Nguluwi nakalongasa na Ayubu, ila Nguluwi hamlonjele lekachoni nakagazika ng'hatu kota vila. Ayubu loyavizele kota Nguluwi kanguweza kudita choneche choyalingugana na kota munhu howeza kugazela madito ga Nguluwi ga kububuwaza, nakatambichizwa kahi na Nguluwi kwa kupegwa lufufu lwinji na wana.

Gali mgati

1. Sula ya 1 na 2 zangusimila mbuli za magazo makulu ga Ayubu gawele nagambuzwa na Limazoga.

2. Sula ya 3-37 zangusimila kuwala kulongasa kuwele nakulutilila hali Ayubu na goloko wa heye kuwala magazo ga heye.

3. Kuli sula ya 38-42:6 Nguluwi kangulongasa na Ayubu na Ayubu kangumwidichila Nguluwi.

4. Kuli sula ya 42:7-17 yangusimila kuwala kikala kunji kwa Ayubu na ndaze Nguluwi vyoyamtambichize kuli kuduma.