Esta

Esta

Chilongole

Chitabu cha Esta changusimila ndaze Waisilaeli vyowawele wapogozi wa ngondo kuli isi ya Pelisiya na vyowaloholigwe kulawa kuli moko ga mng'honyo yawele nayali yogana kuwadumya. Hanga itagwa lya Mkulu Nguluwi halichemigwe kuli chitabu cha Esta, yangoneka hazelu kota Nguluwi yuye nakawalavya Waisilaeli weng'ha kulawa kuli kugana kudumigwa. Haduhuli munhu yoneche yalingumzela yandiche chitabu achi. Kwa kiwhana na lizi lya ndonga ya Chiebulaniya iwele naitumika kwandika chitabu achi, yangujesigwa kota chitabu achi nachandichigwa kuli mhela wa miyaka miya zine (400) Yesu yang'hali kupondigwa.

Mbuli zilingusimilwa mgati mwa chitabu cha Esta zangulajila ndaze mnvina za Pulimu ziwele nazali zivinigwa na Wayahudi, vyozaluche. Muamaleki yalinguchemigwa Hamani nakejesa kuwadumya Wayahudi. Waisilaeli na Waamaleki nawali wang'honyo kulawa Waisilaeli lowawele kuli majendo wokola kugunuche leka kufika kuli isi iwele Nguluwi nayali yalagane na hewo kota kowapa leka iwe ya hewo (Kulawa 17:8-16). Kuli mhela wuwo Hamani loyawele yochijesa kuwadumya Wayahudi, Esta yawele nayali ndo Myahudi, nakawa mche wa mndewa wa isi ya Pelisiya. Kwa kuwinza majesa ga Molidekayi yawele nayali ndo mng'holoze, Esta nakaweza kugadumya majesa ga Hamani. Wayahudi lowawasumile wang'honyo wa hewo (Esta 9:20-22), Molidekayi nakawalonjela Waisilaeli wasangalale kwa kusumya ako. Ahi ndo Wayahudi vyowaluche kuidita mnvina ya Pulimu.

Gali mgati

1. Sula ya 1 na 2 zangulajila ndaze Esta vyoyawele mche wa mndewa wa Pelisiya.

2. Sula ya 3-7 zangusimila ndaze Hamani vyoyejesile kuwadumya Wayahudi na ndaze vyoyakopoligwe kwa chiwalo acho.

3. Sula ya 8-10 zangulajila ndaze Wayahudi vyowawasumile wang'honyo wa hewo na ndaze mnvina za Pulimu vyozaluche.