Waefeso

Baluwa ya Paoli kwa wanhu wa

Efeso

Chilongole

Baluwa kwa Waefeso nayandichigwa mhela wuwula uwele nayandichigwa baluwa kwa Wakolosai kuli mhela wa miyaka makumi sita Yesu loyapondigwe. Yandiche baluwa ayi kangizelesa yuye kota ndo Paoli (Waefeso 1:1). Wasomile wangukunda kota Paoli nakandika baluwa kwa Waefeso hanga yahela ulamso wa chiwunhu kota vyoiwele kuli baluwa kwa Wakolosai. Kwa mbuli ayi ndo mina naihilikwa honhu halivinji kuli vilundo vya wanhu walingumkunda Kilistu kuli mkowa weng'ha. Paoli kahi kangulonga kota nayali mchinweng'ho mhela loyandiche baluwa ayi (Waefeso 3:1, 4:1 na 6:20). Paoli kaihilika baluwa kwa kukolela Tichikasi loyali mmajendo kuwajendela chilundo cha wanhu walingumkunda Kilistu ako Efeso (Waefeso 6:2-22).

Efeso nawali muji ukulu ako Loma kuli mkowa wa Asiya ndodo. Efeso nawali muji utanganiche kwa vila nauhaguligwa kuzenjigwa ng'handa ya mlungu Alitemi wa Ugilichi (Madito 19:23-31). Chilundo cha wanhu walingumkunda Kilistu ako Efeso nachaluka goya, ila hamba nachaluka kutweguka nhumbula (Ugubulo 2:1-7).

Paoli kangulonga kuli nusu ya baluwa ya heye kota ndaze Nguluwi vyoyawahagule wanhu wa heye na kuwalohola kulawila hali gehile ga hewo kukolela Yesu Kilistu. Kanguwhaniza chilundo cha wanhu walingumkunda Kilistu ndo lukuli na Kilistu ndo mutwi na kahi kota iganga lya nzingo ya ng'handa. Na nusu ya baluwa ya heye isigale, Paoli kangulavya malajizo kwa wanhu walingumkunda Kilistu kikala goya.

Gali mgati

1. Kuli sula ya 1:1-2 Paoli kangizelesa yuye na kuwalamsa Waefeso.

2. Hamba kangulonga vila wanhu walingumkunda Kilistu vyowalinguganigwa kilumba na Kilistu (Waefeso 1:3-3:21).

3. Hamba Paoli kangwandika vila wanhu walingumkunda Kilistu vyowalinguganigwa kikala (Waefeso 4:1-6:20).

4. Kuduma Paoli kangulavya ulonzi wa kuduma.