Mdamla

Mdamla

Chilongole

Mdamla ndo chitabu chilingulangusa luhala kuli kikala. Ulonzi awu kwa Chiebulaniya una mana ya “munhu yalinguwakungajiza wanhu.” Wasomile wenji wangukunda kota Solomoni ndo nakandika chitabu achi, ila wanji hawalingukunda kuwala mbuli ayi. Wone Solomoni ndo nakandika chitabu achi, ahyo chitabu achi chowa nachandichigwa kuli mhela wa hagati ha miyaka 970-931, Yesu yang'hali kupondigwa, ndo mhela uwele Solomoni nakekala. Wasomile wanji wangukunda kota munhu yunji ndo nakandika chitabu achi, kwa vila chitabu achi changutumiya ndonga ya chiutumagwa kusinda ndonga ya chiundewa (Mdamla 5:8-9). Wasomile awo wangijesa kota chitabu cha Mdamla nachandichigwa hamba ng'hatu kusinda mhela uwele Solomoni nakekala, hanji nayali hagati ha miyaka 400-200, Yesu yang'hali kupondigwa.

Chitabu cha Mdamla changwaluka kwa kulonga kota chila chinhu ndo kota iyosi, kwa vila changwajilila himahima (Mdamla 1:2). Mbuli ayo ina mana kota ukomu wa hetwe na mijito ja hetwe ndo vya mhela uchefu hela na havilinguzeleka goya. Mbuli nyinji hali azo hatulinguweza kuzilongoza. Ndo mbuli inojile kikala na kupala kusangalala kuli vinhu vyouwele navyo (Mdamla 9:9). Chitabu changusinda kwa kulonga kota magazo na kusangalala kwa ukomu, ndo kumdumba Nguluwi na kuwinza malajizo ga heye (Mdamla 12:13). Ayo ndo mbuli inojile ng'hatu.

Gali mgati

1. Msitali wa 1 mbaka wa 11 kuli sula ya 1 ya chitabu achi, jangumzelesa munhu yawele nakandika chitabu achi na uwanzi wake.

2. Sula ya 1:12 mbaka sula ya 6:9 zangulonga kuwala kikala.

3. Sula ya 6:10 mbaka sula ya 12:8 zangulavya ulonzi unojile wa Mdamla.

4. Kuli kuduma, kuli sula ya 12:9-14 chitabu achi changusinda kwa kulonga kuwala kota kikala kweng'ha ndo kumdumba Nguluwi na kuwinza malajizo ga heye.