Wakolosai

Baluwa ya Paoli kwa wanhu wa

Kolosai

Chilongole

Baluwa ya Wakolosai nayandichigwa na mtumigwa Paoli (Wakolosai 1:1). Nakandika baluwa ayi loyawele mchinweng'ho, hanji nayali ako Loma mhela wa miyaka makumi sita kulawa Yesu loyapondigwe. Baluwa ya Wakolosai hamwe na Waefeso na Filemoni, zanguchemigwa baluwa za mchinweng'ho kwa vila Paoli nakazandika loyawele mchinweng'ho. Nakandika baluwa ayi kwa chilundo cha wanhu walingumkunda Kilistu ako kuli muji wa Kolosai. Paoli hachaluchize chilundo cha wanhu walingumkunda Kilistu ako Kolosai kota vyoyalonjile kuli sula ya 2:1, ila nakona yowa goya wone yomlapa yadite ahyo. Yangoneka kota Epafulasi ndo nakaluchiza acho chilundo cha wanhu walingumkunda Kilistu kwa vila nayali yalawile ako Kolosai.

Paoli nakona vibi kwa gala malanguso ga udesi kwa chilundo cha wanhu walingumkunda Kilistu ako Kolosai. Nakandika menji mli ayi baluwa galinguwala mbuli ayo. Nakwali na chilundo cha Wayahudi walingumuwinza Kilistu na walingujeza kuwakola lupichi Wakilistu wanji leka wawinze malajizo ga Chiyahudi kulawa kuli Ilagano lya katali, mzidi nawawagana wenjile ikumbi. Paoli nakandika kota munhu yalingumuwinza Kilistu, halingugana chinhu choneche ila Kilistu, leka yakundigwe na Nguluwi (Wakolosai 1:15-20). Na malajizo galinguwala Ilagano lya munhu hela gahela chinhu (Wakolosai 2:8).

Gali mgati

1. Paoli kangwaluka baluwa kwa kuchilamsa chilundo cha wanhu walingumkunda Kilistu ako Kolosai (Wakolosai 1:1-2).

2. Hamba nakandika ukulu wa Kilistu kuli chiwalo cha gala malanguso ga udesi ako Kolosai (Wakolosai 1:3-3:4).

3. Kota kuli baluwa nyinji za Paoli, nusu ya baluwa nakandika mbuli zitanganiche kuli mbuli ya kikala goya kuli makundo kwa weng'ha walingumkunda Kilistu (Wakolosai 3:5-4:6).

4. Paoli kangusinda kwa ulamso na malajizo gawele mli baluwa gasomigwe kwa lizi likulu hali vilundo vyeng'ha vya wanhu walingumkunda Kilistu (Wakolosai 4:7-18).