2 Wakolinto

Baluwa ya Keli ya Paoli kwa wanhu wa

Kolinto

Chilongole

Baluwa ya keli kwa Wakolinto nayandichigwa na Paoli kuli mhela wa miyaka makumi gahano na zihano mbaka miyaka makumi gahano na sita loyavumbuche Yesu (2 Wakolinto 1:1). Ayi ndo baluwa ya keli ya Paoli iwele nakandika kwa chilundo cha wanhu walingumkunda Kilistu ako Kolinto. Wasomile wangukunda kota Paoli nakandika baluwa ya kuwang'hanuchila wanhu wa Wakolinto, twahela lyandiko linji lya baluwa ayi kota vyoyasimile kuli sula ya 2:3-4. Baluwa ya keli kwa Wakolinto nayandichigwa na Paoli loyawele Makedoniya (2 Wakolinto 2:13).

Baluwa ya keli ya Wakolinto, ya chiuyeng'ha kuli kusimila mbuli zitanganiche hali wanhu. Paoli kangulajila kusangalala kwa heye kwa mbuli yoyabochele kulawa kwa Tito kwachiwalo cha chilundo cha wanhu walingumkunda Kilistu ako Kolinto. Kuli baluwa ayi twangona mbuli ya ulanguso ulinguwala kulavya vinhu kuli ilagano lya linyale, honhu hawele heye Paoli yolavya malajizo kwa mbuli ya kukongoza sendi na kuluta kuwatanza wanhu walingumkunda Kilistu ako Yelusalemu (2 Wakolinto 8-9). Nayoneka kota watumigwa wadesi kulawa hanze ha chilundo cha wanhu walingumkunda Kilistu kwa ubuhu wawo, wangumhinduka Paoli yawele nayali yowakangaza nhumbula. Achi ndo chiwalo cha kulajila ludali lwa Paoli kulingulajila kukangala kwa heye yawele kota mtumigwa wa Yesu Kilistu kulutila kuduma kwa Wakolinto wa keli.

Gali mgati

1. Paoli kangwaluka baluwa ya heye kwa kuwalamsa chilundo cha wanhu walingumkunda Kilistu (2 Wakolinto 1:1-7).

2. Hamba Paoli kangulonga kwa chiwalo cha mbuli ya majendo na mbuli iwele nakabochela kwa chiwalo cha hewo na kwidichila kwa hewo kuli baluwa ikwete (2 Wakolinto 1:8-7:16).

3. Hamba Paoli kaungulavya malajizo kwa chiwalo cha kukongoza sendi kwa chiwalo cha kuwatanza wanhu walingumkunda Kilistu ako Yelusalemu (2 Wakolinto 8:1-9:15).

4. Kuduma Paoli kangulavya ulonzi wa kilewela kwa chiwalo cha utumigwa wa heye na makanyo kwa chiwalo cha majendo gayage galinguya (2 Wakolinto 10:1-13:10).