1 Timoteyi

Baluwa ya Mwaluko ya Paoli kwa

Timoteyi

Chilongole

Chitabu cha 1 Timoteyi ndo baluwa yandichigwe kulawa kwa Mtumigwa Paoli yamwandichile mlanguswa wa heye Timoteyi. Chitabu cha 1 Timoteyi hanji nachandichigwa kuli miyaka ja makumi sita na meli mbaka makumi sita na gane hala Yesu loyapondigwe. Mhela uwele habehi na kuduma kwa ukomu wa mtumigwa Paoli. Paoli na Timoteyi nawali wochigana ng'hatu, Paoli nakamchema Timoteyi kota vila mwanage mala nyinji (Filimeni 2:22, 1 Timoteyi 1:2, 1:18).

Ayi ndo imwe hali baluwa zine kulawa kwa mtumigwa Paoli iwele nakandika kwa munhu yumweyumwe honhu ha chilundo cha wanhu walingumkunda Kilistu. Baluwa zinji zidatu, 2 Timoteyi na baluwa kwa Tito na baluwa kwa Filimeni. Baluwa ya mwaluko ya 1 Timoteyi naimema malajizo menji kuwala mhela wa chila juma kumfugamila Nguluwi (1 Timoteyi 2:1-15), lutogo lulinguganigwa kwa vilongozi wa chilundo cha wanhu walingumkunda Kilistu (1 Timoteyi 3:1-13) na makanyo galinguwawala walangusa wa udesi (1 Timoteyi 1:3-11, 4:1-5, 6:3-5). Baluwa ayi yangulajila ndaze mtumigwa Paoli vyoyamlanguse Timoteyi leka yawe chilongozi wa chilundo cha wanhu walingumkunda Kilistu. Chitabu cha 1 Timoteyi nachimema mbuli nyinji zakuwatanza vilongozi wa wanhu walingumkunda Kilistu kuli kulongoza goya vilundo vidodo vya walingumkunda Kilistu.

Gali mgati

1. Paoli kangwaluka kwa kumlamsa Timoteyi sula ya 1:1-2.

2. Hamba kangumkanya Timoteyi yeyuse kuli walanguswa wa udesi (1 Timoteyi 1:3-11).

3. Paoli kangulutilila kwa kulonga malumbo kwa Yesu Kilistu (1 Timoteyi 1:12-20).

4. Hamba kangumlajiza Timoteyi kwa chiwalo cha kumfugamila Nguluwi na vilongozi wa chilundo cha wanhu walingumkunda Kilistu (1 Timoteyi 2-3).

5. Paoli kangusinda kwandika baluwa kwa kumlonjela Timoteyi malajizo ga kuduma (1 Timoteyi 4-6).