1 Watesalonike

Baluwa ya Mwaluko ya Paoli kwa wanhu wa

Tesalonike

Chilongole

Baluwa ya mwaluko kwa Watesalonike nayandichigwa na mtumigwa Paoli (1 Watesalonike 1:1). Hanji yowa ndo baluwa ya mwaluko ya Paoli iwele kuli Bibiliya, nayandichigwa kuli mhela wa miyaka makumi gahano na umwe hala Yesu loyapondigwe. Paoli nayali ako Kolinto mhela loyandiche baluwa ayi kwa chilundo cha wanhu walingumkunda Kilistu wa ako Tesalonike, chilundo chiwele nakachidita chaluche loyawele kuli majendo ga keli kuli mbuli ya kumkolela mijito Nguluwi (Madito 17:1-10). Nayandichgwa kuli chitabu cha Madito kota chilundo cha wanhu walingumkunda Kilistu, nakwali na Wayahudi wamwe na Wagilichi wawele ndo nawali wenji.

Paoli hawele na mhumhu ya kikala ako Tesalonike, mhela loyachaluchize acho chilundo, ndo chiwalo nakawandichila baluwa ya kuwakangaza nhumbula wanhu walingumkunda Kilistu ako. Baluwa yangusima mbuli nyinji na malanguso menji galinguganigwa kukoleka kwa wanhu weng'ha walingumkunda Kilistu. Kahi kangulonga kwa ugazi mbuli ya kuhiluka kwa Yesu Kilistu. Hanji wanhu walingumkunda Kilistu w ako Tesalonike nawahagana ng'hatu honhu halingusima mbuli ayi ya kuhiluka kwa Kilistu. Paoli nakalonga mbuli ya kuhiluka kwa Yesu Kilistu kota chinhu chiwele chowadita wanhu wekale kwa kumnojeza Nguluwi (1 Watesalonike 5:6-8).

Gali mgati

1. Paoli kangwaluka baluwa kwa ulamso na kulonga malumbo kwa Nguluwi kwa chiwalo cha hewo (1 Watesalonike 1).

2. Hamba kangutang'hula madito ga heye na usenga woyegale. Timoteyi (1 Watesalonike 2-3).

3. Kahi Paoli kangulavya malajizo kwa weng'ha ndaze vyoilinguganigwa kikala kuli lumuli kwa chiwalo cha kuhiluka kwa Yesu Kilistu (1 Watesalonike 4:1-5:15).

4. Paoli kangusinda kwa kuwalamsa kahi wanhu weng'ha walingumkunda Kilistu na kahi kuwauza kota chila munhu kuli chilundo cha wanhu walingumkunda Kilistu kota chila yumwe yasome baluwa.