1 Petili

Baluwa ya Mwaluko ya

Petili

Chilongole

Baluwa ya Petili ya mwaluko nayandichigwa na Mtumigwa Petili. Petili nakaluka kwandika baluwa ya heye kwa kulonga, heye ka whaani na munhu wachi kangumwandichila. Nakandika baluwa kwa weng'ha wanhu walingumkunda Kilistu walingikala kuli isi kota wajenzi (1 Petili 1:1). Hanji heye kangulonga na walingusoma kwa itagwa ali. Kwa vila baluwa ayi iwhana na yila baluwa ya mtumigwa Paoli nayawandichile Waefeso na kwa mbuli ayi wenji wangukunda kota baluwa ya mwaluko ya Petili nayandichigwa mhela loimalile kwandichigwa yila baluwa ya Waefeso hali mhela wa makumi sita na gahano (65) loyavumbuche Yesu Kilistu. Petili nakandika baluwa ayi loyawele kuli muji wa Loma, ako heye nakakuchema Babiloni (1 Petili 5:13).

Petili nakalonga kota, nakandika baluwa ayi kwa chiwalo cha “Kuwakangaza hemwe na kutawiza kota awu ndo utambichizo wa kukomya wa Nguluwi. Mwime nzinzili kuli alyo” (1 Petili 5:12). Kuna kiwhana kwinji kuli baluwa ya mwaluko ya 1 Petili 2:11-3:7 na Waefeso 5:18-6:9 na Wakolosai 3:18-4:6. Zeng'ha azi zidatu zangulonga mbuli ya vila wanhu vyowalinguganigwa kikala kuli ivyazi na kuwahulichiza goya vilongozi. Kahi kanguwakangaza nhumbula wanhu walingumkunda Kilistu kwimilila magazo kwa vila Kilistu kahabehi kuhiluka (1 Petili 4:1).

Gali mgati

1. Petili kangizelesa yuye na kanguwachema walingusoma baluwa ya heye (1 Petili 1:1-2).

2. Hamba kanguta malumbo Nguluwi kwa ulohozi woyalingihanza hamwe na ulohozi ndo uwele na mana ng'hulu ng'hatu kwa ukomu wa hewo (1 Petili 1:3-2:10).

3. Kahi kanguwalajiza weng'ha walingumkunda Kilistu kikala goya mli isi ayi na kulonga vinhu vinji viwalapa wanhu kikala goya kota vila mlume na mche wake na mpogozi na mkulu wa heye (1 Petili 2:11-4:11).

4. Kulawa baho Petili kanguwakangaza nhumbula hewo kwimilila howofikwa na magazo (1 Petili 4:12-5:11).

5. Hamba kangugomanyiza baluwa ya heye (1 Petili 5:12-14).