1 Wakolinto

Baluwa ya Mwaluko ya Paoli kwa wanhu wa

Kolinto

Chilongole

Chitabu cha Wakolinto cha mwaluko nachandichigwa na mtumigwa Paoli kuli mhela wa habehi na miyaka makumi gahano na zihano loyapondigwe Yesu (1 Wakolinto 1:1). Ayi ndo baluwa ya mwaluko kuli baluwa mbili zandichigwe na Paoli kwa chilundo cha wanhu chilingumkunda Kilistu ako kuli muji wa Kolinto. Hanji nakandika baluwa ayi mhela loyekale ako Efeso kung'hali hanakwaluka majendo ga kuluta ako Kolinto kuwele kowa yoluta na kuhiluka kulawa Makedoniya (1 Wakolinto 16:5-9).

Baluwa ayi ndo kwidichila kwa Paoli kuwala mbuli zoyazibochele kulawa kwa wanhu wamwe kuli chilundo cha wanhu walingumkunda Kilistu kuwala mbuli zimwenga zohazikundigwe zilingukoleka mgati mwa chilundo cha wanhu walingumkunda Kilistu, ziwele ndo kibagula na ung'hondwa. Muji wa Kolinto nauzeleka ng'hatu kwa ung'hondwa, ahyo hambe tububuwale kona kota chilundo cha wanhu walingumkunda Kilistu cha honhu aho nachali chiting'hana na mbuli ayo. Chitabu cha Wakolinto wa mwaluko kahi china honhu hatanganiche halinguwala igano (1 Wakolinto 13).

Gali mgati

1. Paoli kanguwalamsa Wakolinto na kulonga malumbo kwa Nguluwi kwa chiwalo cha hewo (1 Wakolinto 1:1-9).

2. Hamba kangukola mijito kuwala mbuli zoyazibochele zilinguwala kibagula kuli chilundo cha wanhu walingumkunda Kilistu cha Kolinto (1 Wakolinto 1:10-4:21).

3. Hamba kangulonga kuwala mbuli ya ung'hondwa na madito gowalingiditila ga kihilika kuli chitala hewo kwa hewo.

4. Hamba kangulonga choni cha kudita kuli mbuli ilinguwala kuhesa na kulavya ndolendole kwa jimalukolo na kumlanda Nguluwi kuli honhu ha kiting'hana na utambichizo wa Muhe Yelile na mbuli zilinguwala kuzilipuka. (1 Wakolinto 7-15).

5. Kuduma kangulonga kuwala mbuli zimwenga za kukola na za chiuyeng'ha (1 Wakolinto 16).