Luka

eNgʉlʉ Mbʉya ya Yesʉ Kirisito nga ko yashakawa na

Luka

Ekyɨngɨrɨro

Ni Luka yo washakaga ekɨtabo kɨno. Abyaga mʉshake, kandɨ athabyaga Muyuta. Mwashaka ekɨtabo kɨno mo maha w'erɨfʉlɨra abandʉ b'ebɨhanda bw'eNgʉlʉ Mbʉya y'obushabuli ɨtsʉkɨra kʉ Yesʉ Kirisito. Nɨna Luka oyo yo washakaga ekɨtabo ky'eMɨkolano y'aBathʉmwa. Luka mwathashʉnga kʉ Yesʉ, hewethuwe mwabʉlɨrɨtsya omwatsɨ w'obʉyɨngo bwa Yesʉ ko bandʉ bo babyaga hagʉma naye (soma Luka 1:1-3).

Mo kɨtabo kɨno Luka akangania ko Yesʉ Kirisito yo Mʉgala w'oMʉndʉ yo wahikaga ishondya n'ɨshabʉla abandʉ bo babyaga nɨ baherire (soma Luka 19:10). Kandɨ Luka akangania ko Yesʉ agenda akangania eshashi ko bandʉ basunzuyirwe nga: abatsene n'abakatsɨ n'abana. Kandɨ Luka anegena bʉshana n'omʉlɨmo w'oMʉthɨma Mwerʉ mo byo Yesʉ agenda akola.

Nɨ ekɨtabo kya Luka kyo kɨre kʉlenga ebɨtabo byoshi by'omo Ndagane Nyihya. Mw'ɨthanga ekɨtabo kɨno, Luka asonzomola bɨnwa bɨngɨ byo bɨsɨmolera erɨbʉthwa lya Yesʉ (soma Luka 1–2), ashʉba negena bʉshana n'ekithunga kya Yesʉ (soma Luka 3:23-38). Kandɨ anegena ko lubatiso lwa Yesʉ (soma Luka 3:21), n'erɨlengwako lɨwe n'eSitani (soma Luka 4:1-13). Ashʉba negena bʉshana n'omʉlɨmo wa Yesʉ (soma Luka 4–21), n'erɨbambwa lɨwe ko mʉsalaba (soma Luka 22–23), n'erilubuka lɨwe (soma Luka 24).

Honyuma kw'aho Luka anegena nga ko Yesʉ ayikangaya ngendo kangɨ kangɨ ko bɨga bʉwe amamala ilubuka. Mwathegekaniabo ko mʉlɨmo w'erɨfʉlɨra abandʉ bw'eNgʉlʉ Mbʉya. Ko nduli anegena kw'ɨrʉka lya Yesʉ mo lʉbʉla (soma Luka 24:50-51).

Ebyo bɨrɨmo

a) Ebɨnwa by'endangɨro (1:1-4)

b) Erɨbʉthwa lya Yesʉ n'obwana bʉwe (1:5–2:52)

c) Omʉlɨmo wa Yoani Mubatisya n'ɨrengwako lya Yesʉ (3:1–4:13)

d) Yesʉ akangɨrɨtsya bʉshana n'oBwamɨ bwa Gongo n'ɨkola ebɨthɨko-thɨko mo kɨhʉgo ky'iNgalilaya (4:14–9:50)

e) Yesʉ akangɨrɨtsya bɨngɨ bʉshana n'abo bagenda abashondya ɨmʉkwama, abere alɨ mo nzɨra y'erɨrʉkɨra ɨYerʉsalemʉ (9:51–19:27)

f) Yesʉ ɨngɨra mo muyi w'ɨYerʉsalemʉ n'ɨkangɨrɨtsya bʉshana n'ebɨro by'enduli (19:28–21:38)

g) Lʉholo lwa Yesʉ (22:1–23:56)

h) Ilubuka lya Yesʉ (24:1-53)