Yoani 17

Yesʉ ashabɨra abɨga bʉwe

1Yesʉ abere amamala ɨnegena ebɨnwa ebyo, mwashʉmbɨra amesho w'elʉbʉla n'ɨnegena athɨ: «Thatha endambi yamahika. Ʉhe Mʉgalawe yo lʉkengerwa, bʉshana Mʉgalawe naye kuthyo akanganie olʉkengerwa lwawe. 2Kʉshangwa mowamʉha amaka ko bandʉ boshi, bʉshana ahe obʉyɨngo bw'ekera n'ekera abandʉ boshi wamʉhaga. 3N'obʉyɨngo bw'ekera n'ekera bo bʉno, bakʉmɨnye ɨwe Gongo mʉgʉma w'ekwenene, na bamɨnye Yesʉ Kirisito yo wathʉmaga. 4Ingye nyamakʉha olʉkengerwa mo kɨhʉgo, kʉshangwa nyamamala omʉlɨmo wo wanyɨhaga. 5Ewo mbe Thatha, ʉnyɨhe olʉkengerwa embere sawe, olʉkengerwa olo nyabyaga nalo hagʉma nawe embere ekɨhʉgo kɨhangɨkwe1. 6Monyakangania erɨtsɨna lyawe ko bandʉ bo wathokaya mo kɨhʉgo, bʉshana n'ɨnyɨhabo. Abandʉ abo babyaga bʉwawe, nawe mowanyɨhabo, mobashikitsye eKɨnwa kyawe. 7Bamalire ɨmɨnya kw'ebyoshi wanyɨhaga byathokaga ewawe, 8Kʉshangwa monyahabo ebɨnwa byoshi wanyɨhaga, nabo mobangɨrɨrabyo. Betsi ko kwenene ko nyathokaga ewawe, nabo mobɨkɨrɨtsye ko n'ɨwe wo wanyɨthʉmaga. 9Nangye enyɨshabɨrabo, nyɨthalɨ enyɨshabɨra abandʉ b'omo kɨhʉgo kɨno, hewethuwe abo wanyɨhaga, kʉshangwa ɨbo nɨ bandʉ bawe. 10Aho ebyoshi nyiwitheko nɨ bɨwawe, n'ebyoshi uwitheko nɨ bɨwaye, nangye nyamahalambwa mw'ɨtsʉkɨrabo. 11Ingye nyithishubabye mo kɨhʉgo kɨno, hewethuwe ɨbo balɨ mo kɨhʉgo kɨno. Thatha Mubuyirire, utheyebo ko maka w'erɨtsɨna lyawe, erɨtsɨna eryo wambaga, bʉshana babye mʉgʉma, ng'ɨwe nangye ko thʉlɨ mʉgʉma. 12Nyabere nyɨkɨnalɨ hagʉma nabo monyatheyabo mo maka w'erɨtsɨna lyawe, nalyo nɨ erɨtsɨna lyo wanyɨhaga. Monyatheyitsyebo na hathalɨ mʉgʉma wa kʉbo yo waheraga, athalɨ yo ʉtholere ɨhera, bʉshana aMashako Abuyirire aberere2. 13Ewo, lɨno nyashʉba ewawe, nangye nyamanegena ebɨnwa bɨno nɨ nyɨkɨnalɨ ko kɨhʉgo kɨno, bʉshana olʉmogo lwaye lʉnene kundu lubye emwishi sabo. 14Ingye nyamalire ɨfʉlɨrabo eKɨnwa kyawe, n'abandʉ b'ekɨhʉgo bamalire ɨbagabo, kʉshangwa ɨbo bathalɨ bandʉ b'omo kɨhʉgo, ng'ingye ko nyɨthalɨ w'omo kɨhʉgo kɨno. 15Nyɨthalɨ enyɨshaba nyɨthɨ uthokyebo mo kɨhʉgo, hewethuwe nyɨthɨ utheyebo n'omukoli w'ebɨbɨ Sitani3. 16Ɨbo bathalɨ b'omo kɨhʉgo ng'ingye ko nyɨthalɨ w'omo kɨhʉgo. 17Wetsyebo mo kwenene, nɨ eKɨnwa kyawe yo kwenene. 18Nga ko wanyɨthʉmaga mo kɨhʉgo, nangye kuthyo nyamathʉmabo mo kɨhʉgo. 19Nyamayihira mo minwe awe kundu, bʉshana nabo kuthyo bayihire mo minwe awe mo kundu-kundu. 20Nyɨthalɨ enyɨshabɨra aba kuroshi, hewethuwe enyɨshabɨra nabo bandɨkɨrɨtsya bʉshana n'amakangɨrɨtsya wabo. 21Thatha, enyɨshaba bʉshana babye mʉgʉma ng'ɨwe ko ʉlɨ mw'ingye nangye nga ko nyɨrɨ mw'ɨwe, nabo babye mʉgʉma mw'ithwe, bʉshana abandʉ b'omo kɨhʉgo bɨkɨrɨtsye ko nɨ ɨwe wo wanyɨthʉmaga. 22Ingye monyahabo olʉkengerwa olo wanyɨhaga, bʉshana babye mʉgʉma nga kw'ɨwe nangye thʉlɨ mʉgʉma. 23Enyɨshaba nyɨthɨ nyibye emwishi sabo, nawe ubye emwishi saye bʉshana babye mʉ bʉgʉma kwenene, bʉshana abandʉ b'omo kɨhʉgo bamɨnye ko kwenene ko nɨ ɨwe wanyɨthʉmaga na ko mowatsɨɨrabo nga ko wanyɨtsɨɨraga. 24Thatha, enyishondya nyɨthɨ: abo wanyɨhaga babye hagʉma nangye aho nyabya, na balole ko lʉkengerwa lwaye, nɨ olʉkengerwa olo wanyɨhaga, kʉshangwa mowanyɨtsɨɨra embere y'erɨhangɨkwa ly'ekɨhʉgo. 25Thatha mʉthʉnganene, namo bandʉ b'ekɨhʉgo kɨno bathanakʉmɨnyaga, ingye monyakʉmɨnya. N'abandʉ aba mobamɨnya ko nɨ ɨwe wo wanyɨthʉmaga. 26Monyakʉmɨnyɨsa kʉbo na nyagenda enyɨkʉmɨnyɨsa kʉbo, bʉshana olwanzo wanyanzagamo lubye mʉbo, na ingy'owene-wene nyibye emwishi sabo.»