Banyakolosayi

BANYAKOLOSAYI

Kyɨngɨrɨro

Kolosayi abyaga mʉrongo wa mo kɨhʉgo ky'iAsia Nge (bo Buturuki bw'iAsia ya munobwire). Ni muyi alɨ ku bilometere 200 n'obʉbʉkɨra ɨtsʉba bw'omuyi Efese. Alɨnga Polo mwathathanga ahika muwo. Ni mulikyabo Epafʉra muhimbani w'iKolosayi yo mumbere mbere wathwalagako Engulu Mbʉya (Col 1.7; 4.12).

Polo abyaga mo muliki (4.3,10,18), kʉthɨ mw'ɨRoma naho, Epafura mwitsa mubwɨra ko Banyakolisayi abathɨmwa na bandʉ abaletha makangɨrɨtsya mahya mahya. Abandʉ abo abanakangɨrɨtsya bathɨ: erɨmɨnya Gongo n'erɨshabʉlwa ebishondya niwaramya batsɨmʉ n'ɨtsɨga mɨkolano mɨgʉma mɨgʉma ng'erimonibwa, ɨkwama amathegeko ow'elebitsye akalyo, eby'erɨshoma, n'ebɨndɨ n'ebɨndɨ. Omʉthʉmwa Polo abere onvwa omwatsɨ oyo, mwashakɨra banyaKolosayi bʉshana ibukyebo kw'obushabuli bo bʉthoka ewa Gongo ɨtsʉkɨra Yesu Kirisito butosire. Alinga athʉmaga amarʉba wo na Tisike bana Onesime (4.7,9).

Abere amamala ɨketsyabo, mwakwamyaho mʉshabe w'ɨsima Gongo (1.1-14). Ekɨhande kɨmbere ekikangania ko Kirisito alɨ elʉgʉlʉ w'emɨtsɨmʉ yoshi, yo mʉkʉlʉ w'eKanisa (1.15–2.3).

Honyuma kw'aho, mʉthʉmwa Polo mwabwɨra abo ashakɨra athɨ babye mesho bʉshana na bandʉ bagʉma bo bathulagania iKolosayi yo bɨnwa bihengemire (2.4-25).

Ko nduli, ekɨhande kinyuma ekibukya emɨkolano y'obʉyɨngo buhya, obw'eribyaho hagʉma na Kirisito, mo lʉganda lw'abakirisito lo lwene-lwene na mo lʉganda na ko bandɨ bahimbani (3.1–4.6).

Amarʉba ahwere na myatsɨ imulebitsye yowene, na ngetsyo ishakirwe n'eminwe yɨwe (4.7-18).

Amakangɨrɨtsya mabɨ angahɨndʉka ko bʉlɨ mʉgʉlʉ. Na mw'erɨhɨndʉka eryo, bʉlɨ mʉhanda ashondya ithokya omwinihiro w'abɨkɨrɨtsya ku Kirisito. Kirisito yo ʉnaha abakobe bw'obwiranda bw'omʉthɨma.