పవిత్ర్ బైబిల్‍
ఫిలిప్పీ 3
హాఃఛిను నీతి
ఆఖరిమా మార భైయ్యే, ప్రభువుమా ఖుషితి ర్హవొ. యోస్‍ సంగతి తుమ్నా లిఖ్కను మనసాత్‍బి కష్టమ్‍కొయిని, యో తుమ్నా క్చేమకరమ్‍. కుత్ర్యాను విషయమ్మా జత్తన్తి ర్హవొ. దుష్టుల్‍హుయుతె కామ్‍వాలాన విషయమ్మా జత్తన్తి ర్హవొ, ఆ ఛేదనా ఆచారంనా పాటించతె ఇవ్నే విషయాల్మా జత్తన్తి ర్హవొ. సానటేకె కతొ ఆంగ్తాన్‍ఫర్‍ ఆహ్ః కరకొయిన్‍తిమ్‍ దేవ్ను ఆత్మను బారెమా ఆరాధించిన్‍, క్రీస్తుయేసుఫర్‍ గర్వ్ వతాలతె అప్నేస్‍ సున్నతి కరావవాలహుయతె. వోనుకతొ మే ఆంగ్తాన్‍నా ఆధారం కర్లిదతో; అజు కోన్బి ఆంగ్తాన్‍నా ఆధారం కర్లేనుకరిసోచిలిదోతొ తెదె మే అజు జాహఃత్‍ కర్లేవజాయ్‍. ఆఠ్‍ ధన్మా సున్నతి పొందిన్‍, ఇస్రాయేల్‍ హాఃదాన్‍హుయుతేయో, బెన్యామీన్‍ జాత్మా ఫైదాహుయిన్‍ హెబ్రీయుల్‍నా సంతానమ్‍నా హెబ్రీలుహుయుతే, ధర్మసాస్త్రంను విషయమ్‍ పరిసయ్యుల్‍వాలొహుయున్‍, ఆసక్తి విషయమ్మా సంఘంనా హింసించువాలొహుయీన్‍, ధర్మసాస్త్రంను బారెమా నీతివిషయంమా నిరపరాధిహుయీన్‍ ర్హయోథొ. అజుబి సాత్‍బి మన లాభంతారా రాస్‍కారి ఇనా క్రీస్తునునిమిత్తం నష్టంనా ఎంచిలిదొ. ఖఛ్చితనంతి మారొ ప్రభుహుయుతే యేసుక్రీస్తునా గూర్చిన్‍ ఘనుస్రేష్ఠంహుయుతే జ్ఞానమ్‍ నిమిత్తహుయిన్‍ సమస్తంనా ఫాల్తూనితరా యెంచిలెంకరూస్‍. క్రీస్తునా సంపాదించిన్‍, ధర్మషాస్ర్తంహుయుతే మారు నీతినాపన్కి, క్రీస్తుమా విష్వాస్‍హుయుతే నీతి, కతొ విష్వాస్‍నా హాఃజె దేవ్‍నా అనుగ్రహించొతే నీతిహుయుతె ఇవ్నే ఇనకనా దెహాఃను నిమిత్తం, కెహూ తరీగాతిహుయుతోబి ఘొరాఢమతూ మన పునరుత్థానంనా హోనుకరి, ఇనె మారణ్‍ను విషయంమా సమానానుభవంహుయుతె ఇవ్నె, యోబి యో పునరుత్థానమ్‍ తాఖత్‍ మాలంకరీన్‍ నిమిత్తం, యో మిన్హత్‍మా పాలివాలొహువానాటేకె కెహాఃనుకి మాలంకరీన్‍ నిమిత్తం, సమస్తంనా నష్టంకరీన్‍ ఇనా గూతి సమానంతి ఎంచిలెంకరూస్‍,
హంకేతొడి మే గెలిచితేహుయుతే, హంకేతొడి సంపూర్ణ సిద్ధిహుయుతోబి మే యేసుతి పొందితెహుయుతే మే అనుకొలిదొకొయిని పన్కి ఇను నిమిత్తం క్రీస్తు యేసుతి దార్హాహిన్‍ ఇనా దార్‍లేనుకారి మిలాకురుస్‍. భైయ్యే భేన్‍, మే హంకేతొడిబి దార్‍లిదొకారి తలంచిలిదొకొయిని. హుయుతొ ఏక్‍ కరూకురస్‍; పీటెను ఛాతె బులీజైయిన్‍ అగాఢిఛాతె ఇనాహాఃజె ప్రయసపాడుకురూస్‍ క్రీస్తు యేసుమా దేవ్ను ఉన్నతమ్‍గా హుయుతే పిలుపునా కాలాగ్స్‍తే బహుమానంనా పొందిలేను, యో కన గురి మిలావుకరూస్‍.
ఇనహాఃజె అప్నమా ఆత్మీయత సంపూర్ణులుహుయుతె హాఃరజనా ఎక్కస్‍భావమ్‍నా కలిగిన్‍ ర్హావొ. తెదె కినా బారెమాబి తుమ్న ఆలాదు భావమ్‍ కలిగితోబి, యోబి దేవ్ను తుమ్నా మాలంకరావ్సె. హుయుతోబి హంకెతోడి అప్నా నియమల్నా ఇనటేకెస్‍ క్రమంతి ఛాల్‍సు.
భైయ్యే బ్హేనె, తుమే మన జొడ్మా ఛాలొ; హమే తుమ్నా మాదిరిగా ఛాతె ప్రకారమ్‍ ఛాల్‍స్‍ ఇవ్నేనా గురిమ్హేందిన్‍ దెకొ. హాఃరుజను క్రీస్తు సిలువను మరణ్‍న వైరిహుయిన్‍ ఛాలుకురాస్; అవ్నా గూర్చి తుమారేతి హాఃరు పర్యాయములు బొలీన్‍ హంకేబి రొయిన్‍ బోలుకురాస్‍. నాషనమస్‍ ఇవ్ను అంతం, ఇవ్ను పేటస్‍ ఇవ్నా దేవ్‍; ఇవ్నే ఇవ్ను షరంహువను సంగతుల్‍కనా అతిసయపడుకరస్‍, ధర్తిను సంబంధహుయుతె ఇవ్నే దిల్‍రాఖుకురాస్‍. అప్నే స్వర్గంనువాలా; ఎజ్గతూనిఖిన్‍ ప్రభుహుయుతె యేసుక్రీస్తుకరి బఛ్చావాలొనా నిమిత్తం దెక్తా ర్హంకరియేస్‍. సమస్తంనా ఇనా లోపర్‍చునుకరి తాహాఃత్‍ హాఃజే యో అప్నా కంజోర్‍ ఆంగ్తాన్‍మా ఇను మహిమహుయుతే ఆంగ్తాన్‍నా సమాన్‍ పెరాహోః ఛాకరి బద్లాయిలిదొ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.