పవిత్ర్ బైబిల్‍
లూకా 16
అకయమా హుయోతే అధికారిను ఉపమానం
ఏక్‍ ధనే యేసు ఇను షిష్యుల్‍తి అమ్‍ బోల్యొ; ఏక్‍ మ్హాజీన్‍నా ఘరే ఏక్‍ మాలిక్‍ కామ్‍ కర్తొ థో. యో ఇని ఆస్తినా నుక్చాన్‍ కరూకరస్‍ కరి ఇనఫర్‍ ఛాడి బోలామ.
యో మ్హాజీన్‍ ఇనా బులైన్‍, తార మ్హణీతూ క్హంమ్జాయుతే యో ష్యాను వాత్‍? కరి బోలిన్ తున అజు ఆ కామ్‍మా తున రాఖాన లాయక్‍ కోయిని, తూ కెత్రా ఖర్చు కర్యోకి యో క్హారు లెక్కల్‍వతాళ్‍ కరి బోల్యొ.
తెదె యో గుమస్తా దిల్మా ఆమ్‍ సోచిల్దొ; హాంకే మన ఆ కామ్మతూ కణ్నాకి దిస్యే, మే ష్యాత్‍ కర్నూ? క్హేతార్‍మా క్హొందాను కామ్‍తో కోకర్‍నారోని అజు భీమాంగీ జీవనాబి షరం లగ్గస్‍. కేదె హుయితో మన ఆ కామ్మతూ కణ్నాఖ్యోతొ, తేదె దోస్తుల్‍ మన కంధే కర్‍లేను కతో ష్యాత్‍ కర్నూకీ మన మాలంకరి లాహీజైన్‍.
తేదె ఇనా మాలిక్‍నా కోన్‍ కోన్‍ ఉధార్‍ ఛాకీ యూవ్నా బులైన్‍ మరా మాలిక్‍నా కేత్రా ఉధార్‍ ఛా కరి మోదుల్‍ అద్మి పుఛాయో. యో అద్మి ఖోః కేజీనూ తేల్‍ కరి బోలామా ఇమ్‍ హూస్యేతో తూ ఎగ్గీస్‍ బేసిన్‍ ఆ ఛీటిఫర్‍ ఆఢైఖ్‍ః మున్తా తేల్‍న లీఖ్‍ కరి బోల్యొ. పాసల్తి అజేక్‍ జణానబి ఇమ్మస్‍ బులైన్‍ తూ కేత్రా దేనూ కరి బోలామా, ఖోః గౌని సంచుల్‍ కరి బోల్యొ, ఇనబి ఆ ఛీటిఫర్‍ ఛారీఖ్‍ః సంచుల్‍నా లిఖ్కిలాకరీ బోల్యొ.
యో మాలిక్‍, మోసం కరవళొ గుమస్తాన తూ ఘాణు ఛలాక్‍ కరి ఇనా హాఃరైన్‍, ఉజాళునూ1 అద్మి ఆత్మీయతమా దేఖాడతే హూషార్‍తిబి, ఆ ములక్‍నూ అద్మీయే వఖ్వోనూ బట్టీ దేఖ్యాతో గ్హణు హూషార్‍తి ర్హాస్‍.
యేసు ఆమ్‍ బోల్తో హుయిన్‍ “ఆ ములాక్‍ను రఫ్యాతి దోస్తుల్‍నా కమైలేవో; కీమ్‍ కతో యో రఫ్యా తుమ్నా మ్హేందీన్‍ జావనివహఃత్‍ నిత్యంహుయితే ఘేర్మా యూవ్నే తూమ్నా ఆదిలీస్యే” కరి తూమారేతి బోలుకరుస్‍. థోడ విషయంమా నమ్మకంతి ర్హవళు, మోటా వీషయంమాబి నమ్మకంతి ర్హసే. పన్కి థోడ విషయాంమ మోసం కరవళు, గ్హణ విషయంమబీ మోసం కర్షే. ఇనటేకె తూమే అన్యయంను దౌలాత్‍న తూమే నమ్మకంగా నార్హయ్యాతో, హాఃఛి రఫ్యావ్‍నా తూమ్నా కోన్‍ దీస్యే. తూమే ఫరాయిను దౌలత్‍ను విషయంమా నమ్మకంతి నార్హయ్యాతో, తూమారు సోంత దౌలత్‍నా కొన్‍ దిస్యే?
ఖ్హయు దాసుడ్‍బి, భే మాలిక్‍ధార్నా సేవా కరనాకోహోయిని. ఇమ్‍ రైతో ఏక్‍నా ఫ్యార్‍కరీన్‍ ఏక్‍నాఫర్‍ ఛండాల్‍ ఖాసే, నైతో ఏక్‍ని వాత్ఫర్‍ ఛాలీన్‍ అజేక్‍నా ధకల్‍నాక్‍సే. తుమె దేవ్నా, దౌలత్‍నా యోస్‍ వక్హాత్‍మా సేవ కరానకోహూవాని కరి ఖఛ్చితంగా బోలుకరుస్‍.
పరిసయ్యుల్‍నా యేసు జావబ్‍ దేవాను
రఫ్యానూ లాంఛీను పరీసయ్యుల్‍ యో వాతేనా హఃమ్జీన్మ్జీ న్‍, యేసునా గేలీ కాఢుకరాతో, తేదె, తుమే క్హారు అద్మీవ్‍కనా నీతినూ అద్మీయేనితర ఛాలస్‍ పణికి, తూమారు దిల్‍ కీమ్‍నూ కీ దేవ్నా మాలం. “అద్మీయేనా అసేల్‍ కరి దేఖావతే, యో దేవ్నా డోలమా గ్హణు ఖరాబ్‍ దేఖవస్.”
బాప్తిస్మమ్‍ దెవ్వాలొ యోహాన్ను ఆవతోడీ ధర్మషాస్త్రంబీ, ప్రవక్తల్‍ బోధించాను థూ. తేప్తూ ధరీన్‍ దేవ్‍నూ రాజ్యంనూ సువార్ ప్రచార్‍ హూయు, హర్‍ ఏక్‍ జణు యో రాజ్యంమా జనూకరీ జభర్‍దస్తిఖు. మోషే ధర్మషాస్ర్తం మనూ ఏక్‍ న్హాను అక్చర్‍బి నామటీజావానుతీబి ఆకాష్‍బి జమీన్‍ గళిజావను హల్కు.
ఏక్జణు తలాక్‍ ఇని బావణ్‍నా లీక్కీన్‍ దినాకీన్‍ బుజేక్‍ బావణ్‍నా కరవాళు వ్యభిచార్‍ కరూకరస్‍. యో తలాక్‍ దేవాయిరీతె బాయికోనబి కోన్‍ య్హా కర్లేస్‍కీ యువ్నేబి వ్యభిచార్‍ కరూకరస్‍.
దవ్లత్‍వాలు, బుజు లాజర్‍
ఏక్‍ మోటొ మ్హాజీన్‍ థొ. యో భారి మోల్ను లుంగ్డా పేరిన్‍ ఖైన్‍ పీన్‍ రోజ్‍ సుఖ్‍తి ర్హాతొ థో.
ఇనా ధర్వాజనా ఖమేస్‍ లాజర్‍ కరి ఏక్‍ గరీబ్‍ థూ, యో ఆంగ్‍ అక్కు పోఢాతిస్‍ భరైన్‍, యో మ్హాజీన్‍ ఘర్‍నా భార్‍ పఢ్‍ర్హతూథూ. ఇనా భుక్‍ లగ్యూతో యో మ్హాజీన్‍ను ఖావనూ బల్లఫర్‍తూ ఇట్టా రోటానా టుక్డా పఢ్యుతో ఇనా ఖైన్‍ భుక్‍ తోణ్‍నూ కరి ఆహ్‍ఃతీ ర్హాతో థో. ఏత్రేస్‍ కాహేతిమ్‍ ఖుత్ర్యా ఆయిన్ యో ఫోఢావ్‍నా ఛాట్‍తూథూ.
తేదె గరీబ్‍ అద్మి మరీజైన్‍ దేవదూతల్‍నా హాతే లీ జైన్‍ అబ్రాహామ్‍ని ఖోళామా బేఖానా గయో. మ్హాజీన్‍బి తేదెస్‍ మరిన్‍ మాటీమా సమాధి కరమా.
తేదె యో పాతాళంమా పఢీన్‍ ఆగ్మా బాధపడ్తో హూయిన్‍ ఢోళపాఢీన్‍ దేఖమా అబ్రాహామ్‍ని మాంఢీఫర్‍ లాజర్‍ బెట్టోతే ఘణు దూర్‍తి దేఖైయూ.
భా హూయోతే అబ్రాహామ్ను! మే ఆగ్మాబధాపడుకరుస్‍ మారఫర్‍ గోర్‍ కరీన్‍, ఇని ఛీటిఆంగ్లీ పాణిమా భీజైన్‍ మారు జీబ్‍నా ఠంఢు కరానా టేకె లాజర్‍నా బొలిమోకల్‍; కరి రోతోహూయిన్‍ చిక్రీన్‍ బోల్యొ.
తేదె అబ్రాహామ్ను, మారో ఛీయ్యో! తూ జీవ్‍తో ర్హయ్యో తేదె తారు జీందగీమా ఖాధో, పీనూకి పీధో అసేలస్‍ సుఖపడ్యో. కానీ లాజర్‍ హాంకే నేమ్మదితి ఛా. తూ వేధన పడుకరస్‍.
ఆ కాహేతిమ్‍ దేక్‍ అజ్గానూ ఏజ్గా నా ఆవ్‍నూతిమ్‍ ఏజ్గాను అద్మిఅజ్గా నా ఆవ్‍నూతిమ్‍ బేహేనా ఇఛ్మా ఏక్‍ మోటు ఆగాధం ఛా.
తేదె యో మహీజైన్‍ భా ఇమ్‍ హూస్యేతో. మార భాన ఘేరే లాజర్‍నా బోలిమోకల్‍ కరి తూన బతిలాడుకరుస్‍.
ఏజ్గా మరా పాచ్‍ భైయ్యే ఛా! యూవ్నేబి మారీంతర అజ్గ నా ఆవ్‍నూ తిమ్‍ యూవ్నా ఆవాతే బోలుకరుస్‍.
ఇనటేకె అబ్రాహామ్ను, యూవ్నా కనా మోషేబి, ప్రవక్తల్‍ లిఖుతే పుస్తకం ఛా; ఇవ్నే ఖారు ఇవ్నూ వాతస్‍ ఖంజ్నూపడస్‍ కరి బోలామా, భా అబ్రాహామ్ను ఇమ్‍ నకో బోల్‍; మరీ హూయుమతూ కోన్‍బి గయూతో యూవ్నేపాపం బేదిన్‍, కరి యో మ్హాజీన్‍ బోల్యొ. అబ్రాహామ్ను, మోషేబి ప్రవక్తల్‍నూ వాతస్‍ ఖంజునాతో, మరిన్‍ జీవిహూయు ఏక్‍ జణో గయోతోబి యూవ్నే నమ్‍స్యేకోయిని కరి బోల్యొ.
Source notes (1)
- Footnote కతో దేవ్‍నూ లఢ్‍కా కరి మతలబ్‍.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.